Ezayà 33
33
Bàbà na ènugbletɔa!
1Bàbà na èwò kè le gble ènua
co vɔ̀, wo mu gble wò ya ò.
Bàbà na wò, èwò kè le hlà àmèwo be ènua
eye wo mu kpɔ hlà tɔ̀ wò òa.
Wàlɛbɛ kè wò la gble ènu vɔ̀a,
wo la gble wò cã.
Wàlɛbɛ kè wò hlà àmèwo be ènu vɔ̀a,
wo la va hlà tɔ̀ wò cã. 2Tɔhonɔ̀ ku ŋuzĩzĩ na mi.
Èwò ŋuti ye mi dojì ɖo.
Nɔ do mi ŋusɛ̃ gbè sia gbè
eye wòa hlùɛ̃ mi gã lè gbledo be hùenu.
3Ne dùkɔ̃wo sè àpo ègbèa, wo sina,
ne wò sitèa, dùkɔ̃ pòpuwo kãnà hlɛ̃ gbɛ̀ɛ.
4Wo tɔ àmɔ̀nyɔ̀nuwo lɔlɔ bɔ̀ sìgbè hùesuviwo nène.
Wo le jè àdɔ̀kùnuwo ji sìgbè lekè
hùesuviwo jènà ɖo ègbewo ji vĩa nène.
5Tɔhonɔ̀ lòlò wu àmè sia àmè, ɖo e ɖo nɔ̀pe ɖo èji hũi.
E na jɔ̀jɔɛ kudo jɔ̀jɔɛsòso sò àxue ɖo Yèruzàlɛm.
6Èwò Mawu be dùkɔ̃, nɔ̀ ànyi lè èjìɖèɖe mè.
Ènunya kudo ènunyawo nyi àdɔ̀kùnɔ̀
kèwo hlùɛ̃nà àmè gãa. Bùbu ɖoɖo na
Tɔhonɔ̀ nyi àdɔ̀kùnɔ̀ kè wo wla ɖɛa.
Mawu la ɖè yebe ŋusɛ̃a fiɔ
7Kpɔɖa àmè kèwo so Arìɛl be èdùa mèa,
tɔ àpa dodo lè èmɔ̃wo to.
Ŋuti fàfa be àmèdɔ̃dɔ̃wo le fã àvi blòblò.
8Èmɔwo ji pò àya.
Àmè ɖekpe mu le to èmɔ̃wo ji ò.
Wo mu wɔ̀ ɖo ènyà kèwo wo gblɔ̃a ji ò.
Wo gbe ɖaseɖùtɔwo be ènyà.
Eye wo crì àmè sia àmè.
9Èdù kè le lòfũa, mè pu kpakpla.
Libàn be ètoa bu yebe ŋùmè jèjea
eye àtiwo mu gbà lè Bàcam
kudo Karmèl be ètowo ji ò.
10Tɔhonɔ̀ gblɔ̃ be: “Fifìa, mù la sitè,
la sitè ɖo woa ŋuti, fifìa mù la ɖè gogo nyèa fiɔ.
11Mìabe tamè susuwo lè kpò sìgbè ègbe pupu nène.
Susu kèawo ji wɔ̀wɔ ɖo nɔ̀nà sìgbè èbèyɔɛ nène.
Mìa ŋutɔ mìabe gbɔ̃gbɔ̃ be àya ye la nyi èzò kè la fiɔ̃ mìa.
12Dùkɔ̃ kpɔ̀tɛawo la fiɔ̃, trɔ zũ èzòka.
Wo la nɔ̀ sìgbè àŋɔ̀ka-ti kè
wo ŋɛ̃ ènu na eye be le bìa nène.
13Mì àmè kèwo lè dìdìpea,
mì ɖoto sè ènu kè mù wɔ̀a.
Eye mìa àmè kèwo lè kpòepea,
mì do jèsì àpe ŋusɛ̃a.”
14Vɔ̃vɔ̃ gã ɖe jè vuɛ̃wɔ̀tɔwo ji lè Ziɔ̀n.
Àmè bàɖàwo hũhũ ŋutɔ.
Wo biɔ woa ɖokoewo sè be:
“Àmè kɛ ye la teŋu dojì ò?
Èzò hɛ̀hɛ̀ ɖe ŋutɔ ye.
Àmè kɛ ye la teŋu nɔ̀tè lè
èzò màci gbeɖe kèa be ŋùkɔ̀ ò?”
15Àmè kè le nɔ̀ àgbè lè jɔ̀jɔɛsòso mè,
kè tona nyàwoa, mu jina àlè kè so tamèsɛ̃sɛ̃ mè ò,
mu dona èha ku èzãnuɖùtɔ kaka la va ɖù èzãnu ò.
E tuna èto do èhlɔ̃dãdã be ènyàwo
eye mu jina la kpɔ ènu bàɖà ò.
16Àmè kèa kpɔna nɔ̀pe lè
èji hũiwo mè lè èjì ɖèɖe mè.
Yebe bèbèpe la nyi àkpãdowo mè,
eye nuɖùɖu kudo èsì mu la hiã ɛ̀ kpɔ gbèɖe ò.
Yèruzàlɛm la kpɔ vòvo
17Wò la kpɔ èfìɔa lè yebe nyiɖìɖi gogotɔ̀a mè.
Wò la kpɔ ànyigbã a kpata ji kpedo.
18Wò la bù ètamè so ènu kè le do ŋɔji na wò sã a ŋuti
eye wò la gblɔ̃ be: “Fikɛ ye èdɔjikpɔtɔ
kèwo jɔ̀nà àmlɔ̀kɔɛa, wo lè ò?
Fikɛ ye àmè kèwo le hlùɛ̃ àgbògbòa, wo lè ò?
19Wò mu la gbà kpɔ dùkɔ̃ kè yinagò kèa ò.
Wò mu la gbà kpɔ àmè kèwo le do ègbè bàɖà bàɖà,
àmèjro be ègbè mà-ɖo gɔ̃mèsèse kèa ò.
20Glò Ziɔ̀n kpɔ, kpɔ Yèruzàlɛm
èdù kè mè mi va ɖùnà àzãwo lè.
E la ze na wò sìgbè àgbɔ̃jèpò be tèpe nène.
E lè sìgbè gòxɔ kè wo mu la gbà ɖè jo òa nène.
Wo mu la gbà hɔ̃ yebe èkpatiwo ò,
nènea ke ye wo mu la gbà ŋlɔ̀ yebe èkàwo jo ò.
21Funu ye Tɔhonɔ̀ la ɖè yebe nyiɖìɖia fiɔ lè.
Èsìdowo kudo ètɔ̀-sàsrawo la bɔ lè funua.
Àpùjihũ gãgãwo kudo àhùa be èsì-jihũwo
mu la gbà zɔ̃ to funu va yì ò.
22Tɔhonɔ̀ ye nyi miabe àpetɔ, e ye le kplɔ̀ mi.
Tɔhonɔ̀ ye nyi miabe Èfìɔa, e ye le hlùɛ̃ mi gã.
23Àpo kɛ̃tɔ be èkàwo la gbɔjɔ.
Wo mu la gbà teŋu bla àbaɖa ke ò,
eye wo la gbà teŋu do àplãŋuga ò.
Eŋuã, wo la kpɔ èmɔ̃ sɔ ma
àmɔ̀nyɔ̀nu gbogbo kè wo lɔa.
Eye kpòtɛ̃wo ŋutɔ cã la kpɔ woa tɔ̀.
24Àmè ɖekpe mu la gbà gblɔ̃ be:
“Lãmè mu le kɔ̀ na mi ò.”
Wo la sɔ Yèruzàlɛm be dùkɔ̃a be vuɛ̃ sɔ kè è.
Mina Bible © Bible Society of Togo, 2014.