Ezayà 32
32
Èfìɔ jɔ̀jɔɛ be fìɔdu nyɔna
1Eye èfìɔ ɖe la va, kè la kplɔ̀
fìɔdua lè jɔ̀jɔɛsòso mè.
Àgbònùglawo la kplɔ̀
àmèwo lè nyàwo tututu mè.
2Wo la nɔ̀ na àmèawo sìgbè àya be ŋùmèxenu nène,
sìgbè wlape do èjijàja nène,
sìgbè èsì kè le srà lè zògbè jia nène,
sìgbè àkpã gã ɖe be fàfanapè
lè zòzo be èdù ɖe mè nène.
3Àmè kèwo ɖo la kpɔ ènua
be ŋùkuwo mu la gbà miɔ ke ò.
Eye àmè kèwo ɖo la sèa
be ètowo la sè ènu nyuɛ̃ ɖe.
4Àmè màxɔ̀ èjì gbɔ̃ɖɛwo
la bù ètamè sɔ ŋɔjè ènu mè.
Eye àmè kèwo kukuna àɖewo
la pò nupo eye e mè la kɔ̀.
5Wo mu la gbà to na sùkunɔ̀
be e nyi ènunyatɔ ò.
Eye wo mu la gbà to na àmè kè àyè gɛdɛ na a
be e nyi àmè ɖìnyi ò.
6Nyàwo, sùkunɔ̀wo gblɔ̃nà sùkunɔ̀ be è nyàwo.
Ènu bàɖà wɔ̀wɔ be sùsu kpò ye nɔ̀nà woa si,
wo wɔ̀nà ènudrãwo. Eye wo zũnà Mawu.
Wo mu nana nuɖùɖu àmè kè le ku àdɔ̀a ò,
wo mu nana èsì àmè kè sìkɔ le tìa cã ò.
7Àyè gɛdɛtɔ ɖènà sùsu bàɖà.
E blènà àmè gbɔjɔɛwo
dona èku mè to àjèɖàɖawo mè.
Co, àmè kèawo mu le ji
ènu bu sɔ wu jɔ̀jɔɛ tututu ò.
8Vɔ̀, ènunyatɔ ɖènà sùsu tututu,
eye yebe wɔ̀na jènàgà.
Kù ɖo Yèruzàlɛm be nyɔ̃nùwo ŋuti
9Mìa nyɔ̃nù màsɔɖelèmèwo,
mì sitè ne mìa ɖoto mù.
Mìa tùgbɛ̀jɛ màsũ èzò ɖo ènu ŋutiwo,
mì sè àpe ègbè.
10Ne èpè ɖèka va yìa,
mì àmè màsũ èzò ɖo ènu ŋutiwo, mì la ci siayi.
Ɖo vɛ̃kusɛ̃sɛ̃ gbãgbã nu la ci eye nukuyàya la sò.
11Mì pò tìtìtì! Mìa nyɔ̃nù màsɔɖelèmèwo,
mì àmè màsũ èzò ɖo ènu ŋutiwo, mì ci siayi.
Mì ɖè mìabe àwùwo ne mìa sã èfũlòvɔwo ɖo àlì.
12Ne wɔ̀ ŋuzĩzĩ na mì
ne mìa fã àvi ɖo àgblè nyuɛ̃wo
kudo woabe vɛ̃ka kèwo sɛ̃ kplìnyàwo ta.
13Mì fã ɖo dùkɔ̃ nyèa be ànyigbã ji,
fikè àŋùjawo le vũ ɖo,
mì fã ɖo èdùa be àxue ɖìnyi
kèwo lè jìjɔɛ mèa ji.
14Wo la hũ gble fìɔsaa ɖɛ,
èdù kè mè hũnyà-hũnyà nɔ̀nàa, la ci gbalo.
Ofɛ̀l be èkɔa kudo èjikpɔxɔ̀a, la ci puplu.
Funu ye ègbemè be èsɔ àkɛtɛwo la jròwe lè
eye èlãwo la sɔ wɔ̀ ènuɖùpe.
Ŋuti fàfa: Jɔ̀jɔɛsòso be kusɛ̃sɛ̃
15Gbè ɖèka Tɔhonɔ̀ la ɖùɖù gbɔ̃gbɔ̃a so jiŋùkusi ɖoɖa mia ji.
Nène a, zògbè la trɔ zũ àbɔ kè mè àtikusɛ̃sɛ̃wo la bɔ lè.
Àtiwo la mìɔ̃ lè àbɔwo mè, la wɔ̀ àve.
16Jɔ̀jɔɛ la sò àxue ɖo zògbè ji
eye jɔ̀jɔɛsòso la kpɔ nɔ̀pe
lè àtikusɛ̃sɛ̃ be àbɔwo mè.
17Jɔ̀jɔɛsòso be kusɛ̃sɛ̃ la nyi ŋuti fàfa.
E la hɛ̃ ètomè fàfa va
eye èjìɖèɖe la nɔ̀ ànyi tɛ̀gbɛ̀.
18Dùkɔ̃ nyèa la sò nɔ̀pe ɖo èto cɔ̃ ànyi tèpe,
lè àxue kèwo ŋuti kãkãɖo e ji lèa,
lè jɛ̃gbɔ̃pewo.
19Vɔ̀ èsìkpe la jà kɔ̀ ɖo àvea ji
eye èdùa la mù gblòo.
20Sìtuɖèɖe ye e la nyi na mì.
Ɖo mì la teŋu do ènu ɖo àfi ɖekpekpe kè èsì lèa.
Mì la ɖè èkà mìabe ènyì kudo èsɔ-àkɛtɛwo
lè èjìɖèɖɛ mè ne woa ɖìsà fàa.
Mina Bible © Bible Society of Togo, 2014.