Ezayà 31
31
Bàbà na Ejiptè be àlɔ̀do
1Bàbà na àmè kèwo yì le ji àlɔ̀do so Ejiptè a.
Wo kãɖo èsɔwo ji, wo dojì ɖo
àhùakèkeviviwo ŋuti, ɖo wo sùgbɔ.
Wo dojì ɖo èsɔdotɔwo ŋuti, ɖo ŋusɛ̃ tɔ̀hɛ lè woa si.
Vɔ̀a, wo mu le ɖè èkɔ̀ kpɔ Mawu Izràɛl be kɔ̀kɔ̀ɛa ò.
Wo mu le ji Tɔhonɔ̀ ò.
2Co, ye ŋutɔ cã bi eye e la teŋu na gbledo la zɛ̃ àxue.
Mu trɔna lè yebe ŋùkumè kãkã ji ò.
E sinatè ɖo àmè bàɖàwo be bɔ̀bɔ ŋuti
kudo àmè kèwo la ji be yèwoa kpe ɖo woa ŋutia.
3Ejiptètɔwo nyi àgbètɔwo kpò,
mu nyi vòduwo ye wo nyi ò.
Woabe èsɔwo nyi èlãwo,
mu gbɔ̃gbɔ̃ ye wo nyi ò.
Wàlɛbɛ kè Tɔhonɔ̀ la kɔ yebe àlɔ̀a,
xɔ̀namètɔa la klì ènu la ɖiɖi
eye àmè kè wo le xɔ̀ na a, la jè ànyi.
Woa kpata la crɔ̃ ɖiwaa.
Tɔhonɔ̀ la ɖia Yèruzàlɛm
4Tɔhonɔ̀ gblɔ̃ na mù be:
“Ne jãŋùta àlo jãŋùta-vi
le tè ègbè sɔ le ɖia yebe àdè be èlãa,
àpa gbogbo kèwo àlɛ̃kplɔ̀tɔwo le do trɔ do èa,
mu wɔ̀nà ènu ɖekpe na ɛ̀ ò.
Nène a ke ye àhùadù Tɔhonɔ̀a
la ɖiɖi ɖo Ziɔ̀n be ètoa ji sɔ wɔ̀ àhùa yeŋu.”
5Sìgbè lekè kòklowo cɔ̃na èviawo jia,
nène ke ye àhùadù Tɔhonɔ̀ la cɔ̃ Yèruzàlɛm ji.
E la xɔ̀ na ɛ̀ eye e la tu èkà na ɛ̀,
E la ɖia ɛ̀ eye e la hlùɛ̃ ɛ̀ gã.
6Izràɛlviwo, mì trɔ va mìabe Tɔhonɔ̀ kè ŋuti mì ɖè èkɔ̀ lèa gbɔ. 7Gbè ɖèka àmè sia àmè la lɔ sìka kudo klòsalò be vòdu kèwo mì sɔ àlɔ̀ sɔ wɔ̀a, kɔ̀ŋùgbe.
8Mòab la jè ànyi lè èwui
kè mu nyi àgbètɔwo tɔ̀ òa nu.
Mu nyi àmè ye wɔ̀ èwui kè la crɔ̃ ɛ̀a ò.
E la si lè èwuia nu eye yebe àhùakɔ̃a
la ci gàtɔnugbe nɔ wɔ̀ kluvi be èdɔwo.
9Wo la hũhũ ku vɔ̃vɔ̃.
Ŋusùtiwo la si eye cãmìwo
la gbɔjɔ la kã gble àplãŋuga ɖɛ.
Tɔhonɔ̀ kè be èzò lè Ziɔ̀n,
èzò kè wo do ɖo Yèruzàlɛm nyigbã jia, ye gblɔ̃ ɛ̀.
Mina Bible © Bible Society of Togo, 2014.