Ezayà 2
2
1Àmos be vi, Ezayà be ènyà kè be xɔ̀ so Yudà be èfìɔdu ku Yèruzàlɛm be èdùa ŋutia ye nyi ekè.
Dùkɔ̃wo kpata la va bɔ̀ lè Yèruzàlɛm
(Mik 4.1-3 na hɛ̃hlɛ̃ 2-4)
2E la va e mè gbè ɖèka be Tɔhonɔ̀
be gòxɔ be ètoa la yì ji wu ètowo kpata
eye e la to ètokɔ̃ɛwo kpata ŋuti.
Dùkɔ̃wo kpata la tɔ̀zĩ va kɔ̀ ɖɛ.
3Dùkɔ̃ gbogbo ɖewo la so jè èmɔ̃
eye wo la gblɔ̃ be:
“Mì va ne mia yì Tɔhonɔ̀ be ètoa ji,
yì Yakɔb be Mawu a be àxuea mè.
E la fiɔ mi yebe ɖoɖowo
eye mi la wɔ̀ ɖo wo ji.”
Ɛ̃ɛ, nyàwo ènufiɔfiɔ la so Ziɔ̀n
eye Tɔhonɔ̀ be ènyà la so Yèruzàlɛm.
4E la nyi kòjoɖotɔwo lè dùkɔ̃wo dòmè,
e la gbe ènyà na dùkɔ̃ sùgbɔ.
Wo la trɔ woabe èwuiwo sɔ wɔ̀ àgblèkèkewo be gàha
eye woabe èhuãwo la trɔ zũ àgɔ̃wo.
Eye èdù ɖe mu la gbà sitè ɖo èdù bu ŋuti ò.
Àhùakɔ̃wo mu la gbà nɔ wɔ̀ jàjràɖo na àhùawɔ̀wɔ ke ò.
5Mì va! Yakɔb be àxuedo a,
ne mia zɔ̃ lè Tɔhonɔ̀ be kɛ̃klɛ̃a nu.
Tɔhonɔ̀ be ŋùkèkè
6Ɛ̃ɛ, wò ɖè èkɔ̀ lè Yakɔb, àpo dùkɔ̃a ŋuti. Nukɛ ŋuti ò?
Ɖo yebe dùkɔ̃a ɖɔ ku èwèɖoxɔ̀pe be ènukãtɔwo (èsɔ̀mèkpɔtɔwo).
Wo sùgbɔ sìgbè àlekè wo lè Filistìtɔwo gbɔ kea nène.
Dùkɔ̃ wòa le do èha ku àmèjrowo.
7Èdù wòa ɖɔ kudo sìka ku klòsalò: àdɔ̀kùnuwo lè drì.
Èsɔ kudo àhùakèkeviwo cã bɔ kè wo mu la teŋu hlɛ̃ òa.
8Ànyigbã ɖɔ kudo vòduwo.
Wo dona ènugũ lè èkpe-tatawo be ŋùkɔ̀,
ènu kè wo sɔ woabe àlɔ̀wo sɔ wɔ̀a.
9Wo ɖo la xa gòbà eye wo la ɖiɖi.
Tɔhonɔ̀, mù gbà fɔ̃ wo ò!
10Mì yì wla ɖo àkpãwo mè.
Mì ɖo ànyigbã mè ne mìa si lè Tɔhonɔ̀
kè dona ŋɔji na àmè ku vɔ̃vɔ̃a gbɔ,
lè yebe gogo gãa gbɔ.
11Àmè kèwo kpɔna àmè ku ŋùku bàɖàwo la do èta ègũ
eye ègòyitɔwo be àdɔ̃ la jè ègũ#2.11 Àdɔ̃ la jè ègũ: Àdɔ̃ la jè ègũ àlo mu la teŋu kɔ ŋùmè yì ji ò.
Gbè ŋuã gbèa Tɔhonɔ̀ ɖèka be gogo kpò ye la ze.
12Ɖo àhùadù Tɔhonɔ̀ ɖo ŋùkèkè ɖe
kè ji e la sitè ɖo ègòyitɔ ŋuti.
E la ɖiɖi ɖo èdò.
13E la sitè ɖo Libàn be sedàtiwo kpata ŋuti,
àti yì ji vùdù ŋuawo,
kaka jè Bacàn be lokòti gãgãwo ji.
14E la sitè ɖo èto kudo ètokɔ̃ɛ yì jiwo kpata ŋuti.
15E la sitè ɖo mɔjikpɔxɔ̀ gãgãwo
kudo àgbògbò sɛ̃sɛ̃wo ŋuti.
16E la sitè ɖo àpùjihũ gãgãwo
kudo ekèwo dona àgbã àdodoewo ŋuti.
17Ègòyitɔwo be àdɔ̃ la jè ègũ,
wo la ɖiɖi àmè kèwo kɔna woa ɖokoewo yì jia.
Gbè ŋua gbèa, Tɔhonɔ̀ ɖèka be gogo kpò ye la ze.
18Eye vòduwo kpata la crɔ̃.
19Mì yì wla ɖo àkpãwo mè
eye mì yì ɖo ànyigbã mè ne mìa si lè
Tɔhonɔ̀ kè dona ŋɔji na àmè ku vɔ̃vɔ̃a gbɔ,
lè yebe gogo gãa gbɔ.
E la sitè eye e la hũhũ ànyigbã.
20Ɖo gbèŋuãgbèa, àmèwo la lɔ sìka
ku klòsalò be èkpetata kèwo wo wɔ̀
eye wo jènà èklò na a, àjè vòduwo
na èzãtɔ ku àwàwàviwo. 21Wo la yì wla ɖo àkpãdowo kudo ànyigbã mè
ne woa si lè Tɔhonɔ̀ kè dona ŋɔji na àmè,
lè yebe gogo gãa gbɔ;
wàlɛbɛ kè e la sitè sɔ hũhũ ànyigbã a.
22Nukɛ àgbètɔ nyi ò?
Àya gbɔ̃gbɔ̃ kpò be nyi!
Mu ɖo ŋusɛ̃ ɖe ò.
Mina Bible © Bible Society of Togo, 2014.