Ezayà 28
28
Gbledo kè la va Sàmarì jia
1Bàbà na Sàmarì. Efràyim be àhànùmunɔ̀wo
kpɔna jìjɔɛ so èdù kèa ŋuti,
ɖo e lè sìgbè èfìɔkuku nène.
Wo ɖo àcɔ tɔ̀hɛ na ɛ̀ lè ètokɔ̃ɛ
kè lè bàlì kè sɛ̃na èku ŋutɔa ji.
Vɔ̀ e lè sìgbè sepòpo pupu lè àmè kèwo
vɛ̃ wù ɖo àgbàwo be èta nène.
2Mì kpɔ ŋusɛ̃ kàkò kè Tɔhonɔ̀ dɔ̃ ɖoɖaa,
e lè sìgbè èjikpe jàja,
èjiya sɛ̃sɛ̃ kè gblena ènu
eye yebe èsìa ɖènà ènuwo lè ànyigbã jia nène.
Ku àkpa sɛ̃sɛ̃ ye ŋusɛ̃ kèa la mù ènuwo keŋu.
3Ɛ̃ɛ, wo la tùkù èdù kè ɖo èfìɔkuku be nɔ̀nɔmè
eye Efràyim be àhànùmunɔ̀wo sɔ yinagòa.
4Wo la tùkù èsepòpo pupu kèwo ɖo àcɔ tɔ̀hɛ na ɛ̀ sãa,
lè ètokɔ̃ɛ kè lè bàlì kè sɛ̃na èku ŋutɔa ji.
Sàmarì la ci sìgbè èvòti be kusɛ̃sɛ̃ cucugbã kè ɖì,
jè na nukuyàya be àzãa yomè a nène.
Àmè kè kpɔ ɛ̀a, la hlà ɛ̀ ɖù.
5Gbè ŋua gbèa, Tɔhonɔ̀ ŋusɛ̃kpatatɔ ŋutɔ ye la nyi fìɔkuku ɖìnyia, èwlɔ xɔ̀asì na àmè kèwo la ci àgbè lè yebe dùkɔ̃a mèa. 6E la na jɔ̀jɔɛsòso be gbɔ̃gbɔ̃ kòjoɖotɔwo. E la ɖɔ kãlì kèwo kpena àkɔ kudo kɛ̃tɔwo lè èdùa be àgbonua ku ŋusɛ̃.
Ezayà be ènyà ɖì kòkoe
7Nène ke ye hũbonɔwo kudo gblɔ̃ɖɛtɔwo cã
gblɔ̃ ènyà kèwo mu jè òa ɖo vɛ̃ nùmu ŋuti.
Àhà na wo mu gbà lè tututu ò.
Kù ɖo àhà ŋutia, wo le gblɔ̃ ènyà ɖekpekpe kɔ
lè woabe àvìmè nukpɔkpɔwo mè.
Woabe sùsu mu gbà le nɔ̀
ènyà mè sòso kèwo wo le wɔ̀a ji ò.
8Wo tru kɔ̀ ɖo èkplɔ̃wo kpata ji,
ɖekpe mu lè kɔ̀kɔ̀ɛ ò.
9Àmè kèawo gblɔ̃ be:
“Àmè kɛ ye be ji la fiɔ ènu ò?
Àmè kɛ be ji la ɖè yebe àvìmènuwo gɔ̃mè na ò?
Na ɖèvi kèwo si ye wo le xɔ̀ ànɔ lèa?
Àlo na ɖèvi kèwo wo ɖè lè ànɔ nua?
10Mì ɖoto è, e le gblɔ̃ be:
“B-a, bà-bà; b-o, bò-bò;
d-a, dà-dà; d-o, dò-dò!”
11Eye fifìa, Tɔhonɔ̀ la pò nupo na dùkɔ̃ kèa lè ègbè bu mè,
e la gblɔ̃ ènyàti kèwo gɔ̃mè wo mu la teŋu sè òa, na wo.
12Co e gblɔ̃ na wo be:
“Fikèa nyi bɔ̀kɔ̀pe.
Àmè kè ènu tìkɔ̀ na a, ne gbɔ̃jɛ̃ fàa.
Tomè fàfa tèpe ye nyi fikèa.”
Vɔ̀, wo mu jro la sètonu ò.
13Ekèa ŋuti ye Tɔhonɔ̀ cã la gblɔ̃ ènyà ɖèka ŋùmèa na wo be: “B-a, bà-bà; b-o, bò-bò; d-a, dà-dà; d-o, dò-dò!” Nène a ye ne wo le zɔ̃a, wo la nɔ jè ànyi nɔ jè ŋɛ̃sì, àlì la ŋɛ̃ na wo eye wo la jè kɛ̃tɔwo be èmɔ̃ mè. Eye wo la le wo àhùale.
Tɔhonɔ̀ ɖo dodoe-kpe ɖo Yèruzàlɛm
14Mì ɖoto, mìa èvlodotɔ kèwo le kplɔ̀ Yèruzàlɛm dùkɔ̃a,
mì ɖoto sè Tɔhonɔ̀ be ènyà.
15Mì gblɔ̃ be: “Mi ɖù èzò kudo èku.
Mi wɔ̀ zòɖùɖu kudo èkuwode.
Ne bàɖà zɛ̃ àxue eye be le gble ènu va le yìa,
mu la kã mi èfɛ̃ ò, ɖo àjèɖàɖa
ye nyi miabe àkpoxɔ̀nu
eye mi wla ɖo lɛ̀gɛ̀dɛ̀ mè.”
16Eŋuã ŋutia, Tɔhonɔ̀ Mawu gblɔ̃ be:
“Mù ɖo àhlìhãkpe ɖo Ziɔ̀n ne bèa nyi dodoe.
Àmè kè gba ɖo e ŋutia, mu la jè ànyi ò.
17Jɔ̀jɔɛ ye la nyi àpe jijenu,
jɔ̀jɔɛsòso la nyi jijekà.”
Vɔ̀, èjiya sɛ̃sɛ̃ la mù miabe àjèɖàɖa be nɔ̀pewo,
èsì ɖɔɖɔ la ɖè mì lè miabe wlapewo.
18Èzò kè mì ɖù kudo èkua la gble,
èzòɖùɖu kè mì wɔ̀ kudo èkuwodea
cã mu la gbà nɔ̀ ànyi ò. Ne bàɖà zɛ̃ àxue
eye be le gble ènu va le yìa, e la tùkù mì.
19Gbè sia gbè be la va nɔ yì, èzã kudo kedè e la nɔ dà àsi ɖo mìa ji ne e va le yìa. Vɔ̃vɔ̃ la jè àmè kèwo la sè yebe ènyà gɔ̃mèa ji.
20Nyàwo wo dona èlo be:
“Àba hùe ŋutɔ ne woa teŋu drɛ̃ viɖe lè e ji.
Kùŋutua cã hùe ŋutɔ ne woa teŋu cɔ̃ ɛ̀.”
21Ɛ̃ɛ Tɔhonɔ̀ la sitè sìgbè
lekè be wɔ̀ ɛ̀ lè Pɛ̀rasìm be ètoa ji,
e la do àdɔ̀mèze sìgbè lekè be wɔ̀ ɛ̀
lè Gabaɔ̀n be bàlìa mè nène
wàlɛbɛ kè be le wɔ̀ yebe èdɔa.
Vɔ̀ èdɔ kɛ ŋùmè ye ò? Èdɔ jiŋɔa!
22Eye fifìa, mì jìjɔ àŋɔ̀nimè ŋɛ̃ŋɛ̃ na mìabe kɔ̀sɔ̀kɔsɔwo mu gbà miɔ̃ kpe è ò. Nyàwo, Tɔhonɔ̀ Mawu ŋusɛ̃ kpatatɔa gblɔ̃ ɛ̀ na mù be: E ɖo è be yè la crɔ̃ ànyigbã kpata.
Mawu na àɖàŋù àgblèdàtɔ
23Mì ɖoto, mì sè àpe ègbè.
Mì ɖoto, mì sè àpe ènyà:
24Àgblèdàtɔ kè le ji la va do ènua,
mu sɔna yebe gàmèa kpata sɔ gãnà ànyigbã,
la nɔ kù èkpowo àlo la nɔ ɖè èbòwo ò.
25Vɔ̀, e jrànà ànyigbã ɖo nyuɛ̃ ɖe gbɔ̀xue.
E yomè a, e wuna sukɔ̃nì kudo pɛplɛ̀
eye e wuna èlù àlo èbli, èpòvi ɖo àgbàkànu.
Eye e va dona nuku bu ɖo àgblèa be tomè tomè.
26Co, yebe Mawu a ye fiɔ ɛ̀
lekè be la wɔ̀ ènuwo ɖo ɖoɖonua.
27Àmè ɖe mu sɔna èmɔ̃
kè wo sɔ yànà sukɔ̃nì ku pɛplɛ̀a,
sɔ yànà èlù àlo èbli ò.
Àgblèkèke cã mu ɖo la zɔ̃ sukɔ̃nì ji ò.
Vɔ̀, àti ye wo sɔ pònà sukɔ̃nì ku pɛplɛ̀.
28Ne nukuyàtɔa le ɖè èlùkuawo lè ècro mèa,
mu pònà èlùtiawo ètèmàtɔ ò.
Ne e na èlãwo le dɔ̃ àgblèkèkea,
wo mu tona ènukuawo ji la tùkù wo ò.
29Ɖoɖo kèa cã so Tɔhonɔ̀
Mawu ŋusɛ̃ kpatatɔa gbɔ.
E nyi ètopòɖotɔ àdodoe.
E ɖɔ kudo ènunya gã ɖe.
Mina Bible © Bible Society of Togo, 2014.