Ezayà 27
27
Jiɖùɖu ɖo èhɔ̃ drìbàa ji
1Gbè ŋua gbèa Tɔhonɔ̀ la sɔ yebe èwui sɛ̃sɛ̃ kpɛ̃kpɛ̃a, eye kudo ŋusɛ̃a e la wɔ̀ àhùa kudo èhɔ̃ drìbà, èdã kè zrònà, èhɔ̃ drìbà, èdã kè ɖɔ kudo àyè gɛdɛa. Eye e la wù àpùmè be èhɔ̃ drìbà kèa.
Tɔhonɔ̀ ku yebe vɛ̃-gblea
2Gbè ŋua gbèa, mì la jì èhà
na vɛ̃-gble kè nana vɛ̃ vivia.
3Ènyè Tɔhonɔ̀ ye nyi vɛ̃-gble kèa be jikpɔtɔ.
Mù wuna ɛ̀ èsì ɖo àmèhùenu.
Mù kpɔna e ji èzã kudo kedè
ne àmè ɖekpe mu gbà wɔ̀ èvuɛ̃ kudo è ò.
4Nyè mu gbà le do àdɔ̀mèze ɖo e ŋuti ò.
Vɔ̀ ne mù yì dogò àfɔ̀klɛ̃ ɖe a,
mù la kpe àkɔ kudo è eye mù la crɔ̃ ɛ̀.
5Vɔ̀ àmè kè mù la nyi àkpoxɔ̀nu na a,
la nɔ̀ ŋuti fàfa mè,
ɛ̃ɛ, mù la wɔ̀ ŋuti fàfa kudo è.
Tɔhonɔ̀ la sɔkè Izràɛl-dùkɔ̃a
6Lè ŋùkèkè kèwo gbãnà mèa,
Yakɔb be àxuedo a la to èkè, Izràɛl la pò èse
eye e la ɖè kusɛ̃sɛ̃ be ènuwo to.
E la na yebe kusɛ̃sɛ̃wo la ɖɔ xixea gòdò.
7Tɔhonɔ̀ pò wo sìgbè lekè be pò
àmè kèwo pò wo va yìa nènea?
E wù wo sìgbè lekè be wù
àmè kèwo wù wo sãa nènea?
8Gbèɖe, vɔ̀ e dɔ̃to na wo, nyà wo,
ɖo wo ɖoɖa àmèjronugbe.
E kplɔ̀ wo jo sìgbè èwèzɛ̃pe
be àya sɛ̃sɛ̃ be ènu wɔ̀wɔ nène.
9Nène ye wo la tutu Yakɔb be àgɔ̀jèjea jo.
E la nyi yebe vuɛ̃ a be sɔsɔkè be kusɛ̃sɛ̃ be:
Wo la tùkù yebe vɔsakpewo gudu-gudu
sìgbè àkalo be èwɔ nène.
Wo la mù vòduti kudo woabe dàblawo pu ànyi.
Wo mu la gbà nɔ̀ ètè gbèɖe ò.
10Àmè ɖekpe mu gbà la nɔ̀ àgbògbò be èdùa mè ò.
Wo kã gble è ɖɛ eye e ci puplu sìgbè zògbè nène.
Funu ye ènyì-suvi la ɖù ègbe lè.
E la ɖì ɖo e mè lè funu eye be la ɖù ègbe do àmàwo.
11Ne àlɔ̀zɛ̃awo pua, wo ŋɛ̃na
eye nyɔ̃nùwo va tɔna wo èzò.
Co dùkɔ̃ kèa mu le ŋɔjè ènu ɖe mè ò.
Ekèa ŋuti ye yebe ɖotɔ a mu le kpɔ ɖo e mè na ɛ̀ ò.
Àmè kè wɔ̀ ɛ̀a, mu ku ŋuzĩzĩ na ɛ̀ ò.
Tɔtrɔ gbɔ̀ va àxue
12Gbè ŋua gbèa, Tɔhonɔ̀ la klɛ̃ èlùwo
lè woabe èlùtikpewo ŋuti so kaka Efratà
be ètɔ̀a to yì kɔ̀ ɖo Ejiptè be ètɔ̀ gã to.
Eye e la cã mì Izràɛlviwo
ɖèka-ɖèka bɔ̀ sìgbè èlùtikpewo nène.
13Gbè ŋua gbèa, wo la ku èlãzo gã.
Nène a, wo la trɔ gbɔ̀, wo àmè kèwo
wo nyà lè Ejiptè-nyigbã jia.
Eye wo la va jè èɖɛ̀ lè Tɔhonɔ̀ be ŋùkɔ̀
lè èto kɔ̀kɔ̀ɛa ji, lè Yèruzàlɛm.
Mina Bible © Bible Society of Togo, 2014.