Ezayà 29
29
Ènyà so Yèruzàlɛm ŋuti
1Bàbà Arìɛl, Arìɛl,
Yèruzàlɛm be èdù kè
èfìɔ David sɔ àhùa va xaa!
Wò teŋu nɔ le ŋùku ɖo àzãwo
ŋuti nyuɛ̃ ɖe so èpè ɖe yì èpè bu.
2Vɔ̀, nya kpò be mù la ɖiɖi èwò Arìɛl.
Wò la wo kudo àvi ku ènuhàha
eye wò la trɔ zũ tɔ̀ nyè sìgbè
vɔsakpea be fikè wo fiɔ̃na vɔ̀sawo lèa nène.
3Mù la ɖo àsàɖa nyèa trɔ do wò.
Mù la do àhùa-wu la va wɔ̀ àvũ kudo wò.
Mù la tre àvũwɔ̀wɔ be èmɔ̃ vòvòwo na wò.
4Wò la jè ànyi keŋu-keŋu kaka
àpo ègbè la ɖì sìgbè, kaka
ànyigbã be ètùmè be le so nène.
E la sɛ̃sɛ̃ ŋutɔ ne woa sè ègbè kèa lè ɖiɖɔɛ mè.
E la ɖì sìgbè ànyigbã be le ɖì so nène.
E la ɖì ŋùãlì be ègbè blɛ̀wù so ɖiɖɔɛ mè.
5Àpo kɛ̃tɔwo la sùgbɔ sìgbè hũhũ be lilikpowo nène.
Àmè kèwo le ji èku na wòawo lè sìgbè
dekpa pupu kè àya kplɔ̀ le yìa nène.
Eye zè ɖèkaa,
6Tɔhonɔ̀ ŋusɛ̃ kpatatɔa la va lè èji be ègbè ɖèɖe mè
kudo ànyigbã hũhũ gã ɖe ku àya sɛ̃sɛ̃ pòpo mè,
lè àya la sɔ yì èji sɛ̃ŋu ku èzò bì ènu hɛ̀hɛ̀ ɖe mè.
7Arìɛl, dùkɔ̃ kèwo kpata sɔ àhùa ɖo ŋuti wòa,
la bu sìgbè èdrɔ̃kuku nène.
Àmè kèwo le tre àhùa-mɔ̀ na wò
eye wo le xa wò gbà le ɖiki wòa,
la bu vĩi sìgbè èzã be àvìmènu kpɔkpɔ nène.
8E la nɔ̀ sìgbè àmè kè àdɔ̀ le wù
eye be le ku èdrɔ̃ be yè le ɖù ènua nène.
Ɖo ne e va fɔ̃a e la kpɔ be
ènu ɖekpe mu lè pòdo mè na yè ò.
Àlo àmè kè sìkɔ le tì
eye be le ku èdrɔ̃ be yè le nù èsìa.
Ne e va fɔ̃ ku gbɔ̀jɔ̀ gbɔjɔa,
èhlò mè la pu na ɛ̀ kpakpla.
Nène ye be la nɔ̀ na dùkɔ̃ kèwo
ye le sɔ àhùa ɖo Ziɔ̀n be ètoa ŋutia yeŋu.
Ènu mànya ɖèɖe ye bla wo
9Ne dãŋù do mì, ne mì mu gbà kè ènu ò.
Ŋùku ne gbã na mì, ne mì mu gbà kpɔ ènu ɖekpe ò.
Àhà ne mu mì, co mì mu nù vɛ̃ ɖekpe ò.
Mì nɔ kplà sìgbè àhànùmunɔ̀ nène, vɔ̀ mì mu nù àhà ò.
10Nyàwo, Tɔhonɔ̀ na mìabe àyèwo dɔ̃ àlɔ̃,
e miɔ̃ mìabe gblɔ̃ɖɛtɔwo be ŋùkuwo,
ne wo mu gbà kpɔ ènu ɖe ò.
E xe ŋùkumè na mìabe ènukpɔtɔwo
ne wo mu gbà kpɔ ènu ɖe ò.
11Ènyà kèawo be ɖèɖèfiɔ lè na mì sìgbè ènu kèwo wo ŋlɔ̀ ɖo xoma mè eye wo tre xoma a nu nène. Wo sɔ ɛ̀ na xomanyatɔ eye wo gblɔ̃ na ɛ̀ be: “Hlɛ̃ ɛ̀ na mi”. Vɔ̀ e ɖo e ŋuti be: “Nyè mu la teŋu hlɛ̃ ɛ̀ ò, ɖo wo tre xoma a.” 12Wo sɔ ɛ̀ na àmè kè mu nya xoma òa be ne hlɛ̃. Vɔ̀a, e ɖo e ŋuti be: “Nyè mu nya ènu hɛ̃hlɛ̃ ò.”
13Tɔhonɔ̀ gblɔ̃ be:
“Dùkɔ̃ kèa tètè gogo na mù to ènyà mè kpò,
ènuyiwo ji ye be nana mù gogo lè.
Vɔ̀ yebe èjì lè boo lè gbɔ nyè.
Bùbu kè be nana mù a,
so àgbètɔ be nufiɔfiɔ mè kpò.
14Ekèa ŋuti mù la kpɔ̀tɔ̀ nɔ wɔ̀ ŋùdãnuwo na wo.
Wo ŋɔjè ènuwo mè co, wo mu la sè ènu ɖe gɔ̃mè ò.
Wo nya ènu co, woabe ènunyatɔwo
mu la teŋu ɖè ènu ɖe gɔ̃mè ò.”
15Bàbàa! Wo le jè àgbàgba lè ènu gɔ̃mè
sɔ wla woabe tamèsusuwo do Tɔhonɔ̀.
Wo le wɔ̀ woabe jàjràɖowo lè wìmè,
le gblɔ̃ ku èjì ɖèɖe be:
“Àmè kɛ ye teŋu kpɔ mi ò?
Àmè kɛ nya ènu kè mi le wɔ̀ ò?”
16Gãke mì le blè mìa ɖokoe ŋutɔ.
Wo la teŋu sɔ èze ɖo èzemètɔ tèpea?
Ènu wɔ̀wɔ ɖe teŋu gblɔ̃ so ènuwɔ̀tɔa ŋuti be:
“Mu nyi e ye wɔ̀ mù òa?”
Èze ɖe teŋu gblɔ̃ so èzemètɔa ŋuti be:
“Mu nya àɖàŋù ɖèɖe òa?”
17Sɔ̀sɔɛɖe kèa, Libàn be àvea
la trɔ àtikusɛ̃sɛ̃wo be àgblè
eye àtikusɛ̃sɛ̃ be àgblè la trɔ zũ àve ɖèɖe.
18Gbè ŋua gbèa, ètokunɔ̀wo la sè xoma a be hɛ̃hlɛ̃
eye ŋùkugbãgbãnɔ̀wo la to lè vìvìtia mè, la kpɔ ènu.
19Àmè bɔ̀bɔɛwo la kpɔ jìjɔɛ gã ɖe lè Tɔhonɔ̀ mè.
Wɔ̀amènɔ̀ kisɛ-kisɛwo la ɖu jìjɔɛ be èwè
ɖo Izràɛl be àɖèsãa ŋuti.
20Ɖo e la nyi àmè nyrãkuwo be vɔ̀vɔnu
eye wo la crɔ̃ ègòyitɔwo.
Wo la ɖè ènu bàɖàwɔ̀tɔwo jo,
21àmè kèwo dona èhùɛ do àmè ɖo àjè e ji
eye wo tùtùnà kòjoɖotɔwo
ne woa gblehùɛ do àmè mà-nyã ɖewo.
22Ènu kèa ŋuti ye Tɔhonɔ̀,
Yakɔb be àxuedo a be Mawu
kè hlùɛ̃ Abràham gãa, gblɔ̃ be:
“Gbèɖe, Yakɔb be àxuea
mu la gbà ɖù ŋùkpɛ̃ ò,
yebe ŋùmè mu la gbà ci kpɔ̃ ke ò.
23Ɖo ne wo kpɔ ènu kè mù wɔ̀ lè
woa kudo woabe viwo dòmèa,
wo la na ŋutikɔ̀kɔ̀ɛ àpe nyikɔ.
Wo la na ŋutikɔ̀kɔ̀ɛ Yakɔb be àɖèsãa
eye wo la jèɖɛ̀ lè Izràɛl be Mawu a be ŋùkɔ̀.
24Àmè kèwo be sùsumè titɔa, la sè ènu gɔ̃mè.
Ènyàdɔ̃tɔwo la lɔ̃ be woa fiɔ yèwo ènu.”
Mina Bible © Bible Society of Togo, 2014.