Ezayà 26
26
Wo jì jìjɔɛ-ha na Tɔhonɔ̀
1Gbè ŋua gbèa, wo la jì jìjɔɛ-ha lè Yudà be:
“Tɔhonɔ̀ ŋutɔ nyi miabe àkpoxɔ̀nu,
sɔ xe èmɔ̃ na kɛ̃tɔa lè èdùa mè.
E tù èglìkpa èvè sɔ trɔ do èdùa.
2Mì hũ àgboawo! Ne dùkɔ̃
kè sènà ètonu na Mawu a ne ɖo e mè,
dùkɔ̃ kè lè ègbè jia.
3Mu nana ènu ɖe dona èŋɔji na ɛ̀ ò.
Tɔhonɔ̀, wò na ɛ̀ ŋuti fàfa sùsui,
ɖo e dojì ɖo ŋuti wò.
4Mì dojì ɖo Tɔhonɔ̀ ŋuti tɛ̀gbɛ̀,
ɛ̃ɛ, ɖo Tɔhonɔ̀ ŋuti, e ye nyi àkpã
màhuã-màhuã tɛ̀gbɛ̀dò.
5E na àmè kèwo lè èto jia, jè ànyi.
E gbã àgbògbò be èdùa.
E ɖiɖi ì va kaka ànyigbã ke.
E sɔ ɛ̀ dà ɖo ɖidɔɛ mè.
6Àmè kèwo mu ɖo àsìxɔ̀xɔ ɖe òa, la tùkù wò.
Wɔ̀amènɔ̀wo la zɔ̃ ji wò, va yì.”
Kuefã na Mawu
7Tɔhonɔ̀, àmè kè le sè ètonu na wòa be èmɔ̃ jɔ̀nà tutu.
Wò jrànà yebe àfɔ̀tope jɔ̀jɔɛa ɖo.
8Ɛ̃ɛ Tɔhonɔ̀, mi sɔ miabe ŋùɖo kpata dà ɖo ji wò lè èmɔ̃
kè be ègbè wò do àsi na mi be mia tɔ̀a ji.
Miabe èjro kpò ye nyi be mia yɔ wò,
eye miabe sùsu ne nɔ̀ ji wò tɛ̀gbɛ̀.
9Lè èzãa, mù jina wò so kaka èjì mè ke.
Ne wò sɔ kòjosòso wò sɔ do èdɔ wɔ̀wɔ mè lè ànyigbã jia,
àgbètɔwo kplana ènu kè jènà ŋùmè na wòa wɔ̀wɔ.
10Vɔ̀, ne wo le kpɔ ɖo e mè na àmè bàɖàwoa,
wo mu la kpla ènu kè jènà na wòa wɔ̀wɔ ò.
Wo mu kpɔna àpo gogo gã ò
eye èdù kè mè nyuɛ̃ wɔ̀wɔ bɔ lèa,
ènu bàɖà kpò ye woa yaa, wo wɔ̀nà.
11Tɔhonɔ̀, wò kɔ àlɔ̀ wòa yì ji ne wòa ɖɔ̃ èto,
vɔ̀, wo mu le kpɔ ɛ̀ ò.
Vɔ̀, wo la kpɔ lekè wò hùãnàŋu
ɖo àpo dùkɔ̃a ta eye èŋù la kpɛ̃ wo.
Èzò kè wo jràɖo na àpo kɛ̃tɔwo, la fiɔ̃ wo.
12Tɔhonɔ̀, wò na mi ŋuti fàfa.
Èwò ye le wɔ̀ ènu kèwo kpata
be sùsu mi le ɖèawo, na mi.
13Tɔhonɔ̀ miabe Mawu,
àpetɔ buwo nɔ̀ mia nu sãa.
Vɔ̀a, èwò ɖèka be nyikɔ kpò mi le yɔ.
14Àpetɔ kèawo ku vɔ̀, wo mu la gbà kpɔ xixe kèa gbèɖe ò.
Wo lè kpò sìgbè vɔ̃vɔ̃lì nène.
Wo mu la gbà fɔ̃ èta yì ji ɖe ò.
Wò na wo crɔ̃ eye woabe ŋùɖowo cã bu keŋu.
15Tɔhonɔ̀, wò na miabe dùkɔ̃a sĩ,
wò ɖè gogo wòa fiɔ.
Ɛ̃ɛ, wò na miabe dùkɔ̃a sĩ,
eye wò dɔ̃ dùkɔ̃ kpɔ̀tɛawo be lipòwo yì ŋùgbe.
16Lè gbledo mèa, Tɔhonɔ̀,
mi trɔna miabe ŋùkumè ɖoɖa gbɔ wò.
Ne wò le dɔ̃toa, mi nɔ̀nà
kuefã wɔ̀wɔ ji lè ènu bɔ̀ kpoo mè.
17Tɔhonɔ̀, mi nɔ̀ ŋùkumè na wò
sìgbè nyɔ̃nù kè le le èkua nène.
Eye e le ɖuku gbà le do vève sèse be àpa a nène.
18Miawo cã mi ɖo la na àgbè, mi sè vève sãa,
vɔ̀a, àya kpò ye mi jì sìgbè vifɛ̃ nène.
Mi mu hɛ̃ hlùɛ̃gã be ènyà va na ànyigbã ò,
eye mi mu na àmèwo jì ɖo ji cã ò.
Àmèkukuwo la gbà fɔ̃
19Dùkɔ̃ nyè, àpo àmèkukuwo la gbà fɔ̃,
woabe ŋutilã kukuwo la gbɔ̀ àgbè.
Àmè kèwo mlɔ̃ ɖiɖɔɛ mèa, la fɔ̃
eye wo la do jìjɔɛ be àpa.
Tɔhonɔ̀ la ɖo kɛ̃klɛ̃ be àhũjàja ɖoɖa wò
eye to e jia, ànyigbã la gbɔ̀ àgbè àmèkukuwo.
20Yì àpo nɔ̀pe ne wòa tu àgboa.
Wla ɖokoe wò viɖe ne Tɔhonɔ̀ be àdɔ̀mèzea nu ne fa.
21Ɖo Tɔhonɔ̀ ya to vɔ̀ ne bèa dɔ̃to
na ànyigbã ji nɔ̀tɔwo ɖo woabe àgɔ̀jèjewo ŋuti.
Ànyigbã mu la nù èhũ kè la kɔ̀a ò
eye mu la wla àmè kèwo la crɔ̃a ò.
Mina Bible © Bible Society of Togo, 2014.