Ezayà 25
25
Àkpe dodo be èhà na Mawu
1Tɔhonɔ̀, èwò ye nyi àpe Mawu.
Mù jèsi àpo gãnyinyi
eye mù le mlã àpo nyikɔ.
Ɛ̃ɛ wò wɔ̀ ènu jɔ̀ àsuwo.
Wo kpɔ̀tɔ̀ lè so kaka blèmà
eye wo likè goŋu màtrɔ màtrɔ.
2Wò trɔ èdù gãa sɔ wɔ̀ èglìkpowo ɖèɖe.
Wò gbã àgbògbò-dùa gudu-gudu.
Wò na be àmèjrowo be èdù sɛ̃sɛ̃a mu gbà ɖì èdù ò,
eye wo mu la gbà teŋu tù ì gbèɖe ò.
3Ekèa ŋuti ye dùkɔ̃ sɛ̃ŋu ɖe le na wò gogo.
Dùkɔ̃ nyrãkuwo be èdù ŋutɔ cã do bùbu ŋuti wò.
4Tutu, wò xɔ̀nà ènyà ɖo àmè gbɔjɔwo ta.
Wò nyi àkpoxɔ̀nu na wɔ̀amènɔ̀wo lè gbledo hùenu.
Àmè kè bè ɖo gbɔ wòa, èji mu pònà ɛ̀
kaka dɔ̃ŋùkusu la ɖù ì ò.
Ɛ̃ɛ, àmè nyrãkuwo be àdɔ̀mèze lè
sìgbè èji sɛ̃sɛ̃ kè le jà pò èglìa nène.
5E gbà lè sìgbè dɔ̃ŋùkusu jàse
kè le ɖù ànyigbã kè pu kpakplaa nène.
Wo cina àmèjrowo be hũnyà-hũnyà wɔ̀wɔ
sìgbè lekè lilikpo be vɔ̃vɔ̃lì
ɖènà zòzo kpɔ̀tɔ̀nàa nène.
Wo cina àmè nyrãkuwo
be jiɖùɖu be èhàjìji nu.
Tɔhonɔ̀ la ɖo ènuɖùɖu-kplɔ̃ na dùkɔ̃wo
6Tɔhonɔ̀ ŋusɛ̃kpatatɔ la tɛ èkplɔ̃
na dùkɔ̃wo kpata lè èto kɔ̀kɔ̀ɛ kèa ji.
Èlã doàmìwo kudo vɛ̃ sĩsĩwo la nɔ̀ ànyi,
ɛ̃ɛ, èlã doàmì viviwo ku vɛ̃ sĩsĩ
kèwo mè kɔ̀a, la nɔ̀ èkplɔ̃a ŋuti.
7Lè ètoa jia, e la ɖè èfũlòlo be ŋùmèxenua jo,
èku be àvɔ kè cɔ̃ dùkɔ̃wo kpata jia jo.
8E la crɔ̃ èku tɛ̀gbɛ̀dò.
Tɔhonɔ̀ la tutu àɖàsì lè ŋùkuwo kpata mè.
E la ɖè ŋùkpɛ̃ na yebe dùkɔ̃a.
Tɔhonɔ̀ ŋutɔ ye gblɔ̃ ɛ̀.
Mawu na èjì jɔ̀ Izràɛl, vɔ̀ e pò Mòab
9Wo la gblɔ̃ lè àzã ŋua gbè be:
“E ye nyi miabe Mawu.
Mi dojì ɖo e ŋuti eye e hlùɛ̃ mi gã.
Ɛ̃ɛ, Tɔhonɔ̀ ŋuti ye mi ɖoŋù ɖo.
Mi kpɔ jìjɔɛ ne mia ɖuwè ɖo e hlùɛ̃ mi gã.
10Tɔhonɔ̀ be àlɔ̀ lè èto kèa ji.”
Vɔ̀ Mòab la tùkù lè tèpe ɖèka,
sìgbè lekè wo tùkùnà èbè lè kɔkɔli be èdo mèa nène.
11Lè funua, e la ɖè àbɔ sìgbè èsìputɔtɔ̀ nène.
Vɔ̀, togbɔ be e le jè àgbàgba ŋutɔ cã a,
Tɔhonɔ̀ ɖiɖi yebe ègòyiyia.
12Eye Tɔhonɔ̀ mù àgbògbò
kèwo ŋuti wò donajì ɖo sãa jo.
E mù wo, gbidi wo ɖo ànyigbã be ɖiɖɔɛ mè.
Mina Bible © Bible Society of Togo, 2014.