Ezayà 24
24
Ànyigbã be cɔ̃crɔ̃
1Tɔhonɔ̀ crɔ̃ ànyigbã, lɔ yebe ènuwo.
E caka ànyigbã be ŋùkumè
eye e kãkã e jinɔ̀tɔwo ɖo ègbe.
2Nène ye be nyi na hũbonɔ kudo àmè gbalo,
àxuetɔ kudo kluvi,
àxuenɔ̀ kudo ɖèvi nyɔ̃nù,
àmè kè le sà kudo àmè kè le plèa,
àmè kè le do ènu na àmè
kudo àmè kè le do lè àmè sia,
àmè kè le do àwòba kudo àmè kè ɖù èfɛ̃a.
3Wo la crɔ̃ ànyigbã a kpata,
la lɔ yebe ènuwo keŋu;
ɖo Tɔhonɔ̀ ye gblɔ̃ ɛ̀.
4Ànyigbã jè èfũ gã ɖe mè, e le xànu.
Xixea keŋu crɔ̃ eye ènu tìkɔ̀ na ɛ̀.
Jiŋùkusi kudo ànyigbã cã crɔ̃.
5Ɛ̃ɛ àgbètɔwo dovlo ànyigbã.
Wo dà lè Tɔhonɔ̀ be èsea ji,
wo gbe ɖoɖoawo ji wɔ̀wɔ.
Wo gbã zòɖùɖu kè ca wo
kudo Mawu a gbidi.
6Ènu kèa ŋuti ye Mawu be kpɛ̃sɛ̃a vovo ànyigbã ɖo.
Ètodɔ̃a jè àgbètɔ kèwo lè ànyigbã jiawo ji.
Wo ku eye e kpɔ̀tɔ̀ viɖe kpò.
7Vɛ̃ yeye be èku ɖì eye vɛ̃kawo fiɔ̃.
Àzãɖùtɔwo le ŋɛ̃ lè èjì mè.
8Ègbè viviwo ci lè àsihũviawo nu,
àzãɖùɖu tɔ̀hɛwo ɖo àsitè.
Èkàsãŋùgu be èhà vivia nu ci.
9Àmèwo mu gbà le nù vɛ̃ lè èhàjìpe ò,
àhà sɛ̃sɛ̃wo ve kpàa lè àhànùtɔwo be àɖe ji.
10Èdù kè mè àmè ɖekpe mu gbà lè òa jè ànyi gblò.
Àxuewo kpata lè tùtu eye àmè ɖe mu xà la ɖo èdùa mè ò.
11Àmèwo le ji vɛ̃ kudo àpa lelele
lè èmɔ̃wo ji, jìjɔɛ mu gbà lè ò,
èglo tùtu bu lè èdùa mè.
12Èglìkpowo kpoe kpɔ̀tɔ̀ lè èdùa mè,
èdùa be àgboa gli eye ye cã gbã.
13Ɛ̃ɛ ènu gã ɖe mu gbà kpɔ̀tɔ̀ lè àmèwo dòmè lè ànyigbã ji ò.
E lè sìgbè àmìti kè ji wo gbã èkusɛ̃sɛ̃wo lè vɔ̀a nène,
sìgbè vɛ̃-gble kè mè wo yà vɛ̃ku sɛ̃sɛ̃wo lè vɔ̀a nène.
Jìjɔɛ kpɔkpɔ èdùgbàjà-tɔ̀
14Àmè kèwo ci àgbèa kɔ ègbè yì èji lelele
jì Tɔhonɔ̀ be gogo be èhàwo.
Wo do jìjɔɛ be àpa so èwèɖoxɔ̀pe va.
15Woa na gogo Tɔhonɔ̀ lè èwèzɛ̃pe,
woa na gogo Tɔhonɔ̀, Izràɛl
be Mawu a be nyikɔ, lè àpùkpowo ji.
16So kaka xixea be vɔ̀vɔnu
ye mi sè èhà le ɖì so be:
“Gogo na Mawu jɔ̀jɔɛtɔa!”
Vɔ̀ ènyè ya mù gblɔ̃ be:
“Mù ci àsi, mù ci àsi, bàbà na mù.”
Èzãnuɖùtɔwo sà nɔ̀viawo.
Èzãnuɖùɖu bɔ, èzãnuɖùtɔwo yì sà nɔ̀viwo.
17Vɔ̃vɔ̃, èdo kudo èmɔ̃tetre
wo ye nyi mìa ànyigbã jinɔ̀tɔwo tɔ̀.
18Àmè kè le vɔ̃a la jè èdo mè.
Àmè kè la teŋu to lè èdoa mèa,
la jè èmɔ̃tetre mè.
Jiŋùkusi kè ènumè dàɖɛ gbàa,
eye ànyigbã keŋu le hũhũ lè yebe dodoea ji.
19Ànyigbã le zɛ̃, e le flì,
eye e le kãkã.
20Ànyigbã trɔ sìgbè ènu kè mu àhàa nène ɖo mu gbà likè ò,
e zã sɛ̀ɛ sìgbè àzàva kè àya le do èwè na a nène.
Àgɔ̀ kè be jèa le kpɛ̃ ɛ̀ kaka be mù gblò,
eye mu la gbà teŋu sitè ò.
21Gbè ŋua gbèa, Tɔhonɔ̀ la sitè ɖo jiŋùkusi be àhùakɔ̃wo ŋuti lè èji, eye lè èdòa, e la sitè ɖo ànyigbã ji be èfìɔwo ŋuti. 22E la bɔ̀ wo àhùale ɖo èdo gã ɖe mè. E la tu wo ɖo ègàkpa mè. E yomè a, wo la va na àkɔ̃ŋùta.
23Èŋù la kpɛ̃ wètri, dɔ̃ŋùkusu la titɔ.
Nyàwo, Tɔhonɔ̀ ŋusɛ̃ kpatatɔa la nyi
Yèruzàlɛm ŋutɔ be èfìɔ lè Ziɔ̀n be ètoa ji.
Yebe gogoa la nɔ klɛ̃ lè èdùmègãwo be ŋùkɔ̀.
Mina Bible © Bible Society of Togo, 2014.