Ezayà 1
1
Ezayà be xoma be àkpa cucugbã tɔ̀a
(So èta 1 yì èta 39 ji)
1Ekèa ye nyi àvìmènu kè Àmɔt be vi Ezayà kpɔ so Yudà be fìɔdu kudo Yèruzàlɛm be èdùa ŋuti. Ènu kèa jɔ̀ lè hùenu kè Òzias, Yotàm, Àhaz kudo Ezekìas wo ɖù èfìɔ lè Yudà nyigbã ji lèa.
Izràɛl mu gbà jèsi Mawu ò
2Jiŋùkusi, ɖo èto! Ànyigbã, kè èto ne wòa sè!
Tɔhonɔ̀ ye le pò nupo. E gblɔ̃ be:
“Mù nyì èvi wòwo, eye wo sĩ. Mù do wo ɖo ji,
vɔ̀, wo sitè ɖo ŋuti nyè.
3Ènyì jènàsi yebe àpetɔ
eye èsɔàkɛtɛ nyana fikè àpetɔa nana ɛ̀ ènuɖùɖu lèa.
Vɔ̀a, Izràɛl mu nya ènu ɖe ò,
dùkɔ̃ nyèa mu le sè e gɔ̃mè ò.”
Sìgbè Sodɔ̀m ke nène
4Bàbà, dùkɔ̃ jèagɔ̀! Dùkɔ̃ kè ɖɔ kudo èxlɔ̃dãdãwo!
Ènudrãwɔ̀tɔ be èviwo, èzãnuɖùtɔwo,
mì trɔ ŋùgbe do Tɔhonɔ̀,
mì crì Izràɛl be àɖèsã
eye mì si lè e gbɔ boo.
5Fikɛ tutu ye mù la gbà pò na mì ò?
Ètaa, e xɔ̀abì keŋu-keŋu;
èjìa, ye cã gble.
6Ènu ɖekpe mu gbà lè yebe tèpe
so èta kaka jè àfɔ̀gɔ̃mè ò.
Àbì lè àfi sia àfi na ɛ̀, èkubi,
èbabi yeye kèwo kpɔ̀tɔ̀ le to èhũa.
Wo mu tutu ŋùmè na wo, kaka
la va kɔ̀ àmì ɖo wo ji sɔ bla wo ò.
7Mìabe èdùa ɖì ŋuzĩzĩ be zògbè ɖe ji.
Èzò le fiɔ̃ mìabe èdùgãwo lè ŋùkɔ̀ na mì
eye àmèjrowo le hlà mìabe àgblèmènukuwo lè ŋùkumè na mì.
Àgblèwo ci àsi eye wo nyàmà wo, vɔ̀ gble wo ɖɛ.
8Ziɔ̀n be èdùa la ci siayi sìgbè bèpe ɖe lè vɛ̃-gble mè nène,
sìgbè àyaxɔ̀pe lè àbɔ mè nène,
sìgbè èdù kè gbãdãgbãwo xaa nène.
9Ne Tɔhonɔ̀ ŋusɛ̃kpatatɔa mu cɔ̃ àsi àmè ciàgbe ɖewo ji òa,
mi kè ɖì Sodɔ̀m eye mi la sɔ̀ kudo Gòmɔrà.
Sɛ̃sɛ̃ mà-ɖo jɔ̀jɔɛ
10Mìa Sodɔ̀m be àmègãwo, mì sè Tɔhonɔ̀ be ènyà,
mì kè èto ɖo miabe Mawu be ènufiɔàmèa ŋuti.
11Tɔhonɔ̀ gblɔ̃ be:
“Nukɛ ye mìabe vɔsa gbogbowo le wɔ̀ na mù ò?
Àgbò kèwo mì le fiɔ̃, ènyìvi be àmì kèwo
mì sɔ le wɔ̀ vɔsa na mù a, tì mù vɔ̀.
Nyè mu gbà le ji ènyì-su, ku àlɛ̃
kudo ègbɔwo be èhũ ke ò.
12Ne mì gbãnà la va ze lè àpe ŋùkɔ̀a,
àmè kɛ ye fiɔ mì be mù hiã ènu gbogbo
kèwo mì lɔna va ò? Mù biɔ mìa?
13Mì jìjɔ àlɛ̀nuwo hɛ̃hɛ̃ va àpe ŋùkɔ̀:
woabe àzìzɔwo mu le jè eji na mù ò.
Mì le ɖù wètri toto be àzã ku jɛ̃gbɔ̃zã,
mì nana àmè fuu bɔ̀nà eye lè hùe ŋuã nu kea,
mì gbà donajì wɔ̀nà ènu drã.
Nyè mu gbà teŋu le dojì ò.
14Mù crì mìabe wètri toto be àzã kudo gòdo tɔ̀hɛwo.
Wo trɔ zũ àgbã le kpɛ̃ mù.
15Mù ɖènà èkɔ̀ ɖo àkpa ɖèka
ne mì kɔ mìabe àlɔ̀wo yì ji la fãkuea.
Ne mì gbà le wɔ̀ kuefã gbogbo cã,
nyè mu ɖona èto ò.
Mìabe àlɔ̀wo pò èhũ keŋu.
16Mì yì lè èsì. Mì lè mìa ɖokoewo ɖì.
Mì ɖè mìabe ènudrãwo lè ŋùkumè na mù.
Mì jìjɔ ènu bàɖà wɔ̀wɔ.
17Mì kpla ènyuɛ̃ wɔ̀wɔ.
Mì nɔ do bùbu àmè be jèna ŋuti.
Mì kplɔ̀ àmè kè le trã èmɔ̃a va èmɔ̃ jɔ̀jɔɛa ji.
Mì ji cɔɛviwo be jèna wè sia wè
eye mì xɔ̀ ènyà ɖo àhòsìwo ta.”
18Tɔhonɔ̀ gblɔ̃ be: “Mì va ne mia hɛ̃ ènyà.
Ne mìabe èvuɛ̃wo gbà bìa hɛ̀ sìgbè àvɔ jɛ̃ nène cã a,
wo la ɣe sìgbè ɖètifu nène.
Ne wo gbà bìa sìgbè èzò hɛ̀hɛ̀ nène cã,
wo la trɔ ɣe sìgbè bàlixue nène. 19Ne mì jro la sè ètonua,
mì la teŋu ɖù ànyigbã kèa be nuku àdodoewo.
20Vɔ̀a, ne mì trì èto gbe, eye mì kpɔ̀tɔ̀ le sitè ɖo ŋuti nyèa,
èwui ke ye la crɔ̃ mì.” Tɔhonɔ̀ ŋutɔ ye gblɔ̃ ɛ̀.
Wo lè Yèruzàlɛm ɖì
21Àleke ye èdù kè lè ègbè jia, va trɔ zũ àhasì-dù ɖo ò?
Sã xoxoa, bùbu nɔ̀nà àmè be jènà ŋuti lè Yèruzàlɛm.
Jɔ̀jɔɛ sòso be àgbè sò àxue.
Vɔ̀ fifìa, èdùa ɖɔ kudo èhlɔ̃dãtɔwo.
22Oò Yeruzàlɛm, ègà wòa trɔ zũ ènu pòɖi,
èsì kɔ̀ ɖo vɛ̃ nyuɛ̃ wòa mè.
23Àpo àgbònùglawo zũ àglajètɔwo
eye wo trɔ zũ fìãfìwo be èxlɔ̃.
Èzãnuɖùɖu jɔ̀nàjì na wo eye wo tona
èmɔ̃wo kpata nu sɔ xɔ̀nà ènu lè àmè si.
Wo mu sònà jɔ̀jɔɛ na cɔɛviwo ò,
eye wo mu xɔ̀nà ènyà ɖo àhòsìwo ta ò.
24Ènu kèa ŋuti ye àhùadù Tɔhonɔ̀,
Izràɛl be Mawu, ŋusɛ̃kpatatɔa gblɔ̃ be:
“Bàbà! Mù la biɔhlɔ̃ àpe kɛ̃tɔwo
eye mù la sitè ɖo woa ŋuti.
25Mù la trɔ àpe àlɔ̀a ɖo ŋuti wò, Yèruzàlɛm.
Mù la kɔ̀ ŋuti wò sìgbè èjè nène,
mù la ɖè èɖi wòwo kpata jo.
26Mù la na ye àpo kòjoɖotɔwo la gbà nɔ̀ sìgbè sãtɔwo nène,
eye àpo ètopòɖotɔwo cã la gbà nɔ̀ kpò sìgbè xoxotɔ̀awo ke nène.
Eye èyomè a, wo la teŋu gbà yɔ wò be “Jɔ̀jɔɛ wɔ̀wɔ be èdù”, “Èdù kè lè ègbèjia.”
27Wo la hlùɛ̃ Ziɔ̀n to jɔ̀jɔɛ sòso mè
eye Ziɔ̀n-vi kèwo la trɔ va Mawu gbɔa,
la kpɔ hlùɛ̃gã to jɔ̀jɔɛ wɔ̀wɔ mè.
28Vɔ̀a, ènu jiŋɔ ɖe ye e la nyi na àmèjèagla ku vuɛ̃wɔ̀tɔwo.
Nène a, àmè kèwo gbe ènu lè Tɔhonɔ̀ ŋutia, la crɔ̃ ɖiwa.
Ɖo vòdutiwo ŋuti
29Eye lokòti kèwo mì sumɔna sãa, la trɔ zũ èŋɔjidonu na mì.
Èŋù la kpɛ̃ mì ɖo àbɔ kèwo mè mì yì sɛ̃nà vòduwo lèa ŋuti.
30Eye mì la yrɔ̀ sìgbè vòdutiawo ke nène,
ɖo wo bu woabe àmàkpawo, àlo
sìgbè àbɔ kè mè èsì hùedo lèa nène.
31Àmè sɛ̃sɛ̃a la flà sìgbè èbèyɔɛ nène
eye yebe wɔ̀wɔwo la trɔ èzòka wowo
eye wo àmè èvèawo kpata la fiɔ̃.
Àmè ɖekpe mu la teŋu ci èzòa ò.
Mina Bible © Bible Society of Togo, 2014.