Ezayà 16
16
Mòab biɔ àlɔ̀do so Yèruzàlɛm
1Mòab be gawo gblɔ̃ be:
“Mì ɖo ènyì-suwo so kaka zògbè ji
be àkpã gbɔ ɖoɖa èdùa be àpetɔ,
ɖoɖa Yudà be èfìɔa lè Ziɔ̀n be ètoa ji!”
2Mòab be nyɔ̃nùwo si yì fikè ye Arnɔ̀n
be èsìa do ènu àpù mè lèa.
Wo lè sìgbè xèvi kèwo wo nyà ɖo ènu
boo lè woabe nɔ̀pewo nène.
3Mòabtɔwo biɔ so Yèruzàlɛm gbɔ be:
“Mì kpe ɖo mia ŋuti ne mia ɖokpe ènyà ɖèka ji.
Mì cɔ̃ mia ji lè ŋùkèkè mè sìgbè àlekè
èzã cɔ̃na xixea ji kudo yebe vìvìtia nène.
Mì wla àmè kèwo wo nyà ɖo ègbea,
mì mu gbà ɖèha àmè kèwo sia ò.
4Mì na miabe àmè nyà ɖo ègbewo ne nɔ̀ mìa gbɔ.
Mì na wo nɔ̀pe lè ènugbletɔwo gbɔ.
Àmè kè le ɖiki àmèwo mu la nɔ̀ àgbè kaka yì ò,
ènucɔ̃crɔ̃wo nu la sò.
Eye ènucrɔ̃tɔa la jo lè miabe ànyigbã ji.
5Nène ye to àdɔ̀mè nyuɛ̃ mèa,
èfìɔ be èfìɔɖùɖua la likè.
E la kplɔ̀ David be fìɔdua kudo ànùkua.
E la nyi kòjoɖotɔ kè la nɔ wɔ̀ ɖo èsea ji
gbà le jɔ̀jɔɛsòso ɖotè.”
Àlɔ̀do ɖe mu la so Yèruzàlɛm na Mòab be fìɔdua ò
6Mi sè Mòab be hùɛ̃yiwɔ̀wɔ ku jajraa.
Ànyakoko kɛ, àmè ɖokoe
kpɔkpɔ kɛ ye nyi ekèa!
Mi kpɔ yebe kãkãɖoji
kudo yebe àmènya hɛ̃hɛ̃.
Co yebe ènyàwo mu ɖona kpɛ̃kpɛ̃ ò.
7Fifìa, Mòabtɔwo le fã Mòab be èdùa,
àmè sia àmè le do hèhè.
Wo le ŋɛ̃ sɔ le ɖoŋùku vɛ̃ku
be kekè kè wo wɔ̀nà lè Kir-Herɛ̀s.
Àgbɔ̃ kpe wo keŋu-keŋu.
8Hɛsbɔ̀n be àgblèwo ci gbalo
sìgbè Sibmà be vɛ̃-gblewo cã nène.
Sãa, vɛ̃ kèa ye muna dùkɔ̃wo be àpetɔwo.
Vɛ̃gble kèawo yì kaka Jàzɛr,
wo mìɔ̃ ɖo àfi sia àfi lè zògbè ji.
Woabe àlɔ̀zɛ̃wo yì kaka èjè be àpùa godo.
9Ekèa ŋuti mù le fã àvi ku Jàzɛr-viwo
ɖo Sibmà be vɛ̃-gblewo ŋuti.
Mù la kɔ̀ àvi nyèa ɖo ji wò
Hɛsbɔ̀n kudo èwò Elalè ji.
Nyàwo, àhùa-pa ɖì ɖo mìabe vɛ̃ku
kudo mìabe nukuyàyawo ji.
10Jìjɔɛ ku àyosòso bu lè
mìabe àtikusɛ̃sɛ̃ be àgblèwo mè.
Wo mu gbà sènà èhà ku nukòkoe
lè vɛ̃-gblewo mè ò.
Àmè ɖekpe mu gbà le fiɔ̃
vɛ̃kusɛ̃sɛ̃ lè vɛ̃fiɔ̃nu mè ò.
Eye mù ci jìjɔɛ be àpawo nu.
11Eŋuã ŋuti ye èjì nyè le fã Mòab.
Ènuxàxa nyè lè sìgbè èkàsãŋùgu be ɖìɖi nène.
Mù le ŋɛ̃ ɖo Kir-Hɛrɛ̀s nu.
12Wo kpɔ Mòabviwo le jè
àgbàgba la lia tèpe yìjiwo.
13Ekèa ye Tɔhonɔ̀ gblɔ̃ so Mòab ŋuti so blèmà. 14Eye fifìa, Tɔhonɔ̀ ɖè gblɔ̃ be: “Lè èpè ètɔ̃ yomè tututua, Mòab be àmègãwo kudo dùamètɔwo mu la gbà ɖo àsìxɔ̀xɔ ɖekpe ò. Àmè kèwo la kpɔ̀tɔ̀a cã mu la sù ne ènu ɖe ò, vitukui ɖe kpò wo la nyi.”
Mina Bible © Bible Society of Togo, 2014.