Ezayà 15
15
Nyàgblɔ̃ɖɛ so Mòab-dùkɔ̃a ŋuti
1Àŋɛ̀dodo so Mòab ŋuti.
Ɛ̃ɛ, lè èzã ɖèka mè ke wo xa
Arò-Mòab eye wo crɔ̃ ɛ̀.
Ɛ̃ɛ, lè èzã ɖèka mè ke wo xa
Kirò-Mòab eye wo crɔ̃ ɛ̀.
2Dibɔ̀ntɔwo yì tèpe kɔ̀kɔ̀ɛa yì fã àvi.
Mòabtɔwo jì àviha lè Nebò kudo Mèdebà.
Wo plɔ èta na àmè sia àmè
eye wo sò ègɛ̃ na wo keŋu.
3Wo do ècɔwɔ̀wuwo lè èdùa mè
eye wo le jì àvihawo gbà
le fã àvi le do hèhè.
4Lè Hɛsbɔ̀n kudo Èlalèa, wo le ji àlɔ̀dotɔ kudo àpa.
Wo le sè woabe nyikɔ lè kaka Yahàs.
Ekèa ye na be Mòab be àhùakɔ̃a lè àpa ji.
Eye àgbɔ̃ kpe wo.
5Mù le biɔ àlɔ̀do sɔ kpe ɖo Mòab ŋuti.
Wo si keŋu-keŋu yì Soàr,
yì kaka Ègla-Sèlisìa.
Wo lia Lùhitò be èkpoa kudo àvi.
Wo le do àpa lè Horonayìm
be èmɔ̃a ji lelele gblɔ̃ be:
“Ènu sia ènu crɔ̃.
Gbledo vuɛ̃ kɛ ye nyi ekèa ò!”
6Nimrìm be sìdoa to trɔ zũ ŋuzĩzĩ be zògbè ɖe.
Àtiwo pu eye àmàwo bu keŋu-keŋu.
Eye àmà mumu ɖekpe mu gbà lè ò.
7Ekèa ŋuti ye àmèwo lɔ
woabe ènu kèwo kpɔ̀tɔ̀ na wo
kudo kèwo wo teŋu wlawo cã.
Wo lɔ wo yì kaka àti lɔ̀bɔ̀wo
be ètɔ̀ sàsra godo.
8Mi sè wo le do xɔ̀namè be
àpa trɔ do Mòab nyigbã kpata.
Mi le sè ècɔ be àpa kèa kaka yì
Èglayìm, kaka yì Elìm be vudoa to.
9Ètɔ̀ kè to Dimɔ̀n va yìa, trɔ zũ èhũ ɖèɖe.
Tɔhonɔ̀ gblɔ̃ be: “Mù la ɖo gbledo
àlo jɔ̀gbè vuɛ̃ buwo ɖoɖa Dimɔ̀n:
Jãŋùta la xa Mòab-tɔ kèwo kpɔ̀tɔ̀ lè àgbèa,
kèwo ci woabe ànyigbã jia!”
Mina Bible © Bible Society of Togo, 2014.