Ezayà 17
17
Nyàgblɔ̃ɖɛ so Dàmaskò ku Izràɛl ŋuti
1Ènyà so Dàmaskò ŋuti.
Zãɖe kèa, Dàmaskò mu la nyi èdù ò,
ɖo e la trɔ zũ èglìkpo ɖèɖe.
2Wo la ɖè èkɔ̀ lè èdù kèwo
lè gɔ̃mè na ɛ̀ sãwo ŋuti kaka sɔyì.
Wo la trɔ zũ èlãhawo be èkpa
eye wo la sò nɔ̀pe na wo ɖo funu
eye àmè ɖe mu la do ŋɔji na wo ò.
3Àkpoxɔ̀nu be èglì mu gbà la nɔ̀ Dàmaskò ò
eye Aràm be àmè kèwo la kpɔ̀tɔ̀a,
la nɔ̀ kpò sìgbè Izràɛlviwo tɔ̀ nène.
Tɔhonɔ̀ ŋusɛ̃ kpatatɔa ye gblɔ̃ ɛ̀.
4Gbè ŋua gbèa, Izràɛl be ŋusɛ̃ la ɖiɖi.
Mu la gbà ɖo kpɛ̃kpɛ̃ mè kè lè e si sã ò.
5E la nɔ̀ kpò sìgbè nukuyàya hùenu yomè nène.
Ne àgblèdètɔ yà nuku vɔ̀
eye e ɖo yebe àvà vɔ̀ nène.
E la nɔ̀ kpò sìgbè Rèfayitè be bàlì mè
ne wo yà nukuwo vɔ̀a nène.
6Izràɛl be àkpa viɖe kpò ye la kpɔ̀tɔ̀.
E la ci sìgbè àmìti kè ji wo gbã
àmìku sɛ̃sɛ̃wo lè vɔ̀a nène.
E la kpɔ̀tɔ̀ kusɛ̃sɛ̃ ɖèka ku èvè lè àtia be àɖɔ̀ mè
eye lè àlɔ̀zɛ̃ kè sɛ̃ sùgbɔa jia,
wo mu la gbà kpɔ sɔ wu ènè àlo àtɔ̃ cã ò.
Nène ye Tɔhonɔ̀, Izràɛl be Mawu a gblɔ̃.
7Gbè ŋua gbèa, àgbètɔwo la trɔ ɖoɖa woabe Ɖotɔ a gbɔ. Wo la kɔ ŋùmè yì ji ɖoɖa Mawu Izràɛl be àɖèsãa gbɔ. 8Wo mu la trɔ yì woabe vɔsakpe kèwo wo sɔ woabe àlɔ̀ sɔ wɔ̀a gbɔ ò. Wo mu la gbà dojì ɖo àtikpo-vòdu kudo lififiɔ̃nu kèwo wo wɔ̀a ŋuti ɖe ò.
9Gbè ŋua gbèa, Izràɛl be èdù sɛ̃sɛ̃wo la ci puplu, sìgbè Hivitè kudo Àmorìtɔwo nène wàlɛbɛ kè Izràɛlviwo va ɖoa.
10Izràɛl, wò ŋlɔ̀be Mawu kè hlùɛ̃ wòa.
Wò mu gbà ɖoŋù àkpã kè nyi àkpo na wòa ò.
Eŋuãti ye wò le do àti kèwo jè ŋùku mè na wòa
kudo nuku kèwo so àmèjro-nyigbã jia.
11Gà kè mè wò le do woa,
wò le kpɔ wo le mìɔ̃ zè ɖèka.
Ènu kè wò do ŋùdekɛ̃nyɛ̃a,
to àmà kudo flawɔ̀a gbè ŋua gbè ke.
Vɔ̀a, lè gbledo be gàmèa,
nukuawo kpata bu eye
gbledo kèa be èvè mu lè ò.
Kɛ̃tɔwo be ènu ci lè Tɔhonɔ̀ be ègbè ɖèɖe nu
12Gbledo kɛ kèa ò!
Dùkɔ̃ gbogbo le wo sìgbè
àpù be ègbè ɖèɖe nène.
Wo le wɔ̀ àdã sìgbè èsì kè jè àglaa nène.
13Dùkɔ̃wo be àdãwɔ̀wɔ le ɖì
àpù gãgãwo be àgla jèje.
Tɔhonɔ̀ wo do wo eye wo si yì àzɔ̀ge boo.
Wo nyà wo sìgbè àlekè ètowo ji
be àya kplɔ̀nà bèyɔɛ nène,
sìgbè àlekè àya sɛ̃sɛ̃ kè soa,
nyànà hũhũ kè bla kɔ̀tɔ̀a nène.
14Lè wètrɔ mèa, vɔ̃vɔ̃ gã ɖe jè ànyi.
Gbɔ̀xue èŋù la kèa, wo bu keŋu-keŋu.
Ekèa ye la jɔ̀ ɖo àmè kèwo hlà miabe ènuwo ji.
Nène be la nyi na àmè kèwo lɔ miabe àlɔ̀nudɔwoa yeŋu.
Mina Bible © Bible Society of Togo, 2014.