Ezayà 14
14
Izràɛl be àhùalewo trɔ gbɔ̀
1Tɔhonɔ̀ la ku ŋuzĩzĩ na Yakɔb be àxuea. Ɛ̃ɛ, e la gbà cã Izràɛl ɖe. Eye e la trɔ kplɔ̀ Izràɛlviwo gbɔ̀ va woabe ànyigbã ji. Dùkɔ̃ buwo la va wɔ̀ ɖèka ku wo, eye wo la ca kudo Izràɛlviwo.
2Dùkɔ̃wo la so àzɔ̀ge va kplɔ̀ wo yì woabe èdù mè. Eye Izràɛlviwo la trɔ sɔ wo wɔ̀ kluviwo lè Tɔhonɔ̀ be ànyigbã ji, lè ŋusù mè, lè nyɔ̃nù mè. Nène a ye Izràɛl la sɔ wo wɔ̀ kluvi sìgbè àlekè woa cã wo wɔ̀ ɛ̀a nène.
Èfũlòha ɖo Babɛ̀l be èfìɔa ŋuti
3Izràɛl, gbè ɖèkaa, Tɔhonɔ̀ la na wò la gbɔ̃jɛ̃ lè àyàɖùɖu, vevesèse kudo kluvi nyinyi sɛ̃ŋu kèwo mè wò to va yìa mè. 4Wàlɛbɛ ŋua, wò la jì èhàlo kèa ɖo Babɛ̀l be èfìɔa ta:
Ŋusɛ̃ vɔ̀ na àmè kè le zĩ mi ɖo ànyi sãa.
Yebe hũnyànyrã nu sò, bàbà na ɛ̀ sè!
5Tɔhonɔ̀ gbã àmè bàɖàwo be ŋusɛ̃,
e ŋɛ̃ àmè dèamènuwo be èkpò.
6Àmè kè pò dùkɔ̃wo lè
yebe jìbi be àdã mè ètèmàtɔ.
E gbà do àyà na wo sùsuiɖe.
7Fifìa, ànyigbã kpata kpɔ fàfa
eye àmèwo le do jìjɔɛ be àpa.
8Àtisuwo ŋutɔ cã kpɔ jìjɔɛ
ɖo ènu kè va na wòa ŋuti.
Èjètiwo kudo Libàn be sedàtiwo gblɔ̃ be:
“Kaka kè wò lè èyɔ̀do mèa,
àmè ɖekpe mu gbà va ɖe, la mù mi ò.”
9Èkuwodetɔwo le jràɖo la xɔ̀ wò
ku jìjɔɛ ne wò va ɖoa.
Kù ɖo ŋuti wò ye èkuwode le fɔ̃
ŋùãlìwo kudo xixea be àmègãwo.
E gbà na ànyigbã ji be èfìɔwo
sitè lè woabe àzìkpewo ji.
10Àmèwo kpata le gblɔ̃ ku ègbè ɖèka be:
“Wò cã, wò mu gbà ɖo ŋusɛ̃
sìgbè miawo ke nène ò.
Wò ɖì mi fifì!”
11Èhàwo ye wo sɔ kplɔ̀ àpo nyiɖìɖia yì èkuwode.
Ɖiɖɔɛ ye nyi àpo àba eye è yèwo trɔ zũ àpo àbajivɔ.
12Kpɔ àlekè wò gɛ̃a ɖa!
Èwò kè ɖì ŋùdekɛ̃nyɛ be wètrivia!
Wo sɔ wò pu ànyi, èwò kè mùnà dùkɔ̃woa!
13Wò le susu sã be:
“Mù la lia jiŋùkusi, mù la ɖo èfìɔzìkpe nyè
ɖo funu lè Mawu be wètriviwo ji.
Mù la ɖo nɔ̀pe ɖo èto kè ji vòduwo bɔ̀nà lèa,
lè èvègo ɖaa ji.
14Mù la lia lilikpo be ètamè,
eye mù la nɔ̀ sìgbè
Mawu èjihũitɔa nène.”
15Vɔ̀, èwò ye wo ɖiɖi ɖo èkuwode ke,
yì kaka ègũ titoa mè.
16Àmè kèwo la kè ɖo ŋuti wòa,
la le ŋùku ɖo ŋuti wò nyuɛ̃ ɖe.
Eye wo la nɔ gblɔ̃ be:
“Àmè kè nana hũnyà-hũnyà lè èdùa mèa
ye nyi àmè kèa tututua?
E ye kè tɔ̀nàzi èfìɔduwoa!
17Àmè kè trɔ xixe-dùwo wɔ̀ zògbè,
kè crɔ̃ èdùwo gbà gbe be yè mu la ɖègà
ègàkpamè nɔ̀tɔwoa ye ŋua?”
18Ɛ̃ɛ, dùkɔ̃wo kpata be èfìɔwo
yì gbɔ̃nàjɛ̃ lè bùbu tɔ̀xɛ mè,
àmè sia àmè lè yebe èyɔ̀do mè.
19Vɔ̀ èwò ya, wo sɔ wò
dàŋùgbe ɖo àzɔ̀ge boo
lè bùbu-yɔ̀do wòa gbɔ.
Wò lè sìgbè vifɛ̃ hũkɔ̃ɛ̃ kè trɔ ŋùgbe
lè yebe jìjimè kèa nène.
Wò lè sìgbè àmè kèwo wo flì lè èwui nu
eye wo hlɛ̃ wo ɖo èkpewo ji
lè èdo gã ɖe mèa nène.
20Vɔ̀a, wo mu la ɖì wò kudo wo ò,
ɖo wò crɔ̃ àpo èdùa,
eye wò gbã dùkɔ̃ wòa.
Wo la ŋlɔ̀be wò
èhlɔ̃dãtɔ kèa kaka sɔyì.
21Mì jràɖo sɔ crɔ̃ ɖèviwo
ɖo woa tɔwo be èvuɛ̃wo ŋuti.
Ne wo mu gbà va sitè sɔ xɔ̀ ànyigbã ò,
eye ne kɛ̃tɔwo ɖèɖe ne nɔ̀ xixea mè ò.
22Àhùadù Tɔhonɔ̀a gblɔ̃ be: “Mù la sitè ɖo Babɛ̀lviwo ŋuti, mù la tutu yebe nyikɔ kudo fikè be nɔ̀a jo, eye yebe jìjimèvi ɖe mu la gbà nɔ̀ ànyi ò. 23Mù la sɔ funua sɔ wɔ̀ bàbaji, fikè hlɔ̃màdɛ̃wo la kpɔ nɔ̀pe lè. Mù la kplɔ̀ ɛ̀ kudo èxa kè crɔ̃na ènua. Tɔhonɔ̀ ye gblɔ̃ ɛ̀.”
Àmè zĩzĩ ɖo ànyiwo nu la sò
24Àhùadù Tɔhonɔ̀a tànu gblɔ̃ be:
“Ɛ̃ɛ, ènu kè mù fìã a, la va e mè;
ènu kè mù ɖoa, la jɔ̀ godo godo!
25Mù la gbã Àsirìatɔwo
be ŋusɛ̃ lè àpe ànyigbã ji,
mù la tùkù wo lè àpe ètowo ji.
Eye mù la ɖè woabe kɔ̀kùtia jo,
mù la ɖiɖi àgbã lè woabe àbɔta.”
26Ɖoɖo kèa ye Tɔhonɔ̀
wɔ̀ ɖo xixea kpata ŋuti.
Lekè yebe àbɔ sɛ̃sɛ̃a la sitè
ɖo dùkɔ̃wo kpata ŋuti ɖoa yeŋu.
27Ne Àhùadù Tɔhonɔ̀a
ɖo ènu ɖe be yèa wɔ̀a,
àmè kɛ ye la nɔ̀tè è ò?
Ne e kɔ yebe ŋusɛ̃ bɔa yì jia,
àmè kɛ la teŋu kpe e ji ò?
Àfɔ̀ɖoàfɔ̀ji: Na Filistìtɔwo
28Ènyà kèa va e mè lè èpè kè mè èfìɔ Àkaz ku lèa.
29Mìa Filistìtɔwo,
mì mu gbà kpɔ jìjɔɛ be
èkpò kè le pò mì sãa ŋɛ̃ ò.
Ɖo nyàwoa, jàkpàtà
teŋu to lè èdã kukua mè.
Eye ekèa teŋu jì èhɔ̃ drìbà kè zrònà a.
30Nène a, wɔ̀amènɔ̀wo la kpɔ ènu ɖù nyuɛ̃ ɖe,
ènuwɔ̀donɔ̀wo la nɔ̀ àgbɔ̃jèpò mè.
Vɔ̀ mìa Filistìtɔwo ya,
mìabe kɛ̃tɔwo la na mì la ku àdɔ̀ ku
eye wo la wù àmè kèwo la ci àgbèa.
31Àgbowo, mì ŋɛ̃!
Mìa èdùgãwo mì fã àvi.
Filistì be èdùa kpata titɔ,
ɖo àhùakɔ̃ gã ɖe tɔ̀zĩ gbãnà
so èvègo sìgbè lilikpo nène.
Eye kɛ̃tɔwo dòmè tu kpi kpi kpi gbãnà.
32Ènyà kɛ mi la gblɔ̃ na
Filistìtɔwo be àmèdɔ̃dɔ̃a ò?
Mì gblɔ̃ kpò be:
“Tɔhonɔ̀ ŋutɔ ye ɖo Ziɔ̀n.
Funu ye be na yebe dùkɔ̃a
be wɔ̀amènɔ̀wo ne woa kpɔ àgbɔ̃jèpò lè.
Mina Bible © Bible Society of Togo, 2014.