Ezayà 13
13
Babɛ̀l be gbãgbã gogo
1Mawu be ènyà ɖì na Ezayà, Amɔ̀t be vi ŋusù ɖo Babɛ̀l ŋuti.
2Tɔhonɔ̀ gblɔ̃ be:
“Mì ɖì àplãŋuga ɖo èto puplua ji.
Mì kpà àbòbo sɔ sìa àhùawɔ̀tɔwo.
Mì wɔ̀ àsi na wo ne woa ɖo
cãmìwo be àgbowo mè.
3Mù do ègbè àsi na àmè
kèwo jo woa ɖokoe na mù a.
Mù yɔ àpe kãlìsuwo bɔ̀, àmè kèwo
kpɔna jìjɔɛ so àpe gãnyinyi ŋutia.
4Mì ɖoto hũnyà-hũnyà kè le ɖì lè ètowo jia.
E lè sìgbè àmèha gã ɖe tɔ̀ nène.
Mì ɖoto fìɔduwo be èzĩtɔ̀tɔ,
dùkɔ̃ kèwo bɔ̀ ɖodua.
Àhùadù Tɔhonɔ̀a ye le kpɔ yebe àhùakɔ̃wo ɖa.
5Àmè kèwo Tɔhonɔ̀ la zã sɔ ɖè
yebe àdɔ̀mèzea fiɔa, wo so àzɔ̀ge boo gbãnà,
so kaka xixea be vɔ̀vɔnu.
Wo la crɔ̃ dùkɔ̃a keŋu.
6Mì làmɔɛ̃, ɖo Tɔhonɔ̀ be ŋùkèkèa gogo.
E gbãnà sìgbè gbledo kè ŋusɛ̃ kpatatɔa
ɖo ɖoɖa ne bèa crɔ̃ ènuwo kpataa nène.
7Ènu kèa ŋuti àmè sia àmè gbɔjɔ,
ŋusɛ̃ vɔ̀ lè àmèwo be àbɔwo mè.
8Sùsumè caka na wo.
Wo le sè vève kaka le sè ŋutilã mè tɔ̀ cã
sìgbè lekè nyɔ̃nù lena èku nène.
Wo le kpɔ woa nɔ̀nɔwo be ŋùmè ku ŋùdã.
Woabe ŋùkumè ci jàjàjà.
9Kpɔɖa, Tɔhonɔ̀ be ŋùkèkèa gbãnà,
ŋùkèkè jiŋɔa, e ɖɔ ku jìbi be àdã ŋutɔ.
E la trɔ ànyigbã sɔ wɔ̀ zògbè pu kpakpla
eye e la crɔ̃ àgɔ̀jètɔwo.
10Wètrivi kudo wètrivi pòpuwo
mu la gbà na woabe kɛ̃klɛ̃wo ò.
Eye so kaka èwè be zɛ̃zɛ̃ mè
ke ye èwèa la ci vìgɔ̃,
eye wètri cã mu la kɔ̀ ò.
11Tɔhonɔ̀ gblɔ̃ be:
“Mù la dɔ̃ èto na xixea ɖo yebe èku nyànyrã ŋuti,
kudo àmèwo ɖo woabe èhlɔ̃dãdãwo ŋuti.
Mù la ɖè ègòyitɔwo be jàjrawo jo.
Eye mù la ɖiɖi àmè nyrãkuwo kpata.
12Mù la na àmèwo la dɛ̃ sìgbè
sìka kè kɔ̀ ceŋu-ceŋuã nène;
gbà wu Ɔ̀firò be sìka ŋutɔ cã.”
13Ekèa ŋuti ye jiŋùkusi la hũhũ
eye ànyigbã be dodoewo cã la hũhũ.
Ekèa la va e mè ɖo àhùadù Tɔhonɔ̀a
be àdɔ̀mèze la bì sìgbè èzò nène.
14Nène a, wo la trɔ gbɔ̀ va woabe dùkɔ̃a
dòmè sìgbè èzĩ kè wo le nyàa nène,
sìgbè àlɛ̃ kèwo mu gbà ɖo kplɔ̀tɔ òa nène.
Àmè sia àmè la si yì yebe ànyigbã ji.
15Eye wo la ŋɔ àmè kè ŋuti wo la kè ɖoa ku àŋùti.
Gbà wua, wo la crɔ̃ àmè kèwo ji woabe àsi la jèa.
16Wo la kpɔ woabe èviwo be cɔ̃crɔ̃ tèpe,
wo la hlà woabe àxuewo,
eye wo la do àvũ na woa srɔ̃ nyɔ̃nùwo, sɔ dɔ̃ ku wo.
17Tɔhonɔ̀ gblɔ̃ be: “Mù la ɖo Medìatɔwo ɖo woa ŋuti.
Wo mu jina klòsalò ò eye wo crì sìka cã.
18Woabe àŋùtiwo nana ɖèkajɛwo flina jè ànyi,
wo mu kpɔna ɖo e mè na ɖèviwo cã ò,
eye wo wɔ̀nà èhlɔ̃dãnu ku vifɛ̃wo.”
19Eye Babɛ̀l kè nyi èdùgã na fìɔdua la crɔ̃
sìgbè Sodɔ̀m kudo Gòmɔrà kèwo Mawu crɔ̃a nène.
20Àmè be àfɔ̀ la sò lè èdù kèa mè
eye e la ci toto (puplu)
Màlɛ̀ ɖekpe mu la gbà do àzàva ɖo funu ò
eye àlɛ̃kplɔ̀tɔ ɖekpe mu la gbà kplɔ̀ ègbɔ yì funu ò.
21Vɔ̀ ègbe-sewo ye la ɖo nɔ̀pe ɖo funu.
Àzexewo kudo tatabòli gbàkudo
gbɔgbɔɛwo la wɔ̀ nɔ̀pe ɖo funu sɔ nɔ jròwe.
22Ègbe-vũwo la nɔ do àpa lè yebe àsãŋuwo ji
eye gbètewo la bɔ lè yebe àzãɖùpewo.
Babɛ̀l be vɔ̀vɔnua ye gogo,
yebe ŋùkèkèwo nyi ènu hɛ̃hlɛ̃.
Mina Bible © Bible Society of Togo, 2014.