Òzeà 8
8
Izràɛl ŋlɔ̀be Mawu
1Sɔ èzèa do ènu ne wòa ku ì!
Kɛ̃tɔa zɔ̃ ɖo Tɔhonɔ̀ be àxuea ji sìgbè èhɔ̃ nène,
ɖo wo gble èzòɖùɖu nyèa
eye wo dà èse nyèwo ji.
2Wo la do àpa yɔ mù gblɔ̃ be:
“Tɔhonɔ̀ nyè, mi jèsi wò,
mia Izràɛlviwo!”
3Wo gbe ènu nyuɛ̃ wɔ̀wɔ.
Kɛ̃tɔa la tĩ woa yomè.
4Wo ɖo èfìɔwo na woa ɖokoewo
lè woa ɖokoe sinu.
Wo cã cãmìwo, mà biɔ mù ènyà ɖe sè.
Wo sɔ woabe klòsalò kudo
woabe sìka sɔ wɔ̀ legbaviwo.
Ye ŋutia, wo la crɔ̃.
5Sàmarìa, Tɔhonɔ̀ gbe àpo ènyìvia.
Àpe àdɔ̀mèzea lezò ɖo mìa ŋuti.
Kaka sɔna gà kɛ mè mì la kpɔ̀tɔ̀ nɔ̀
sìgbè àmè kèwo mu jè àgɔ̀ ɖe òa nène ò?
6Èdɔwɔ̀tɔ kè wɔ̀ ɛ̀a, so Izràɛl
mu nyi vòdu ɖe be nyi ò.
Ɛ̃ɛ, Sàmarì be ènyì-suvia,
wo la flì ì wuwli.
7Kè e nyi be wo do àyaa
wo la yà àya sɛ̃sɛ̃.
Ènu kè la mìɔ̃a, mu la na ènuɖùɖu ɖekpe ò.
Ne e va e mèa, eŋuã, àmèjrowo ye la ɖù ì.
8Izràɛl crɔ̃ fifìa, wo lè dùkɔ̃wo dòmè sìgbè
èze ŋua kè bu yebe àsìxɔ̀xɔa nène.
9Ɖo wo yì Àsirìa.
Ègbemè be èsɔàkɛtɛ nɔ̀nà ye ɖokoe sinu.
Vɔ̀a, Efràyim tu lɔ̃lɔ̃ be èfɛ̃a.
10To e gbɔ be wo le na ènu dùkɔ̃wo cã,
fifìa, mù la bɔ̀ wo ɖodu.
Eye zãɖea, èfìɔviwo be èfìɔa
be àgbã kè e la dro na woa,
la na be wo la ɖù àyà.
11Efràyim ɖì vɔsakpewo sùgbɔ
coa, èvuɛ̃ wɔ̀wɔ gbà dri àgbo.
12Ne mù gbà gbìgbɔ̀ ŋlɔ̀ èsewo na ɛ̀ cã,
Wo mu la sɔ èɖe lè e mè ò.
13Wo wùnà èlã sɔ wɔ̀nà vɔsa na mù
ɖo èlã ɖùɖu jɔ̀nàjì na wo.
Vɔ̀a, nyè mu kpɔna jìjɔɛ ɖe so ekèa ŋuti ò.
Fifìa, Tɔhonɔ̀ le ɖoŋùku woabe àgɔ̀jèjea ji,
e la dɔ̃to na wo ɖo woabe èvuɛ̃wo ŋuti.
Wo la trɔ yì Ejiptè.
14Izràɛl ŋlɔ̀be àmè kè ɖo èa,
àmè kè tù èfìɔsawo,
eye Yudà tù èxɔ̀ gãgã sùgbɔwo.
Vɔ̀a mù la ɖo èzò ɖoɖa woabe èdùwo mè,
ne bèa fiɔ̃ woabe èfìɔsawo.
Mina Bible © Bible Society of Togo, 2014.