Òzeà 7
7
1Wàlɛbɛ kè mù la dàdɔ̀ na Izràɛl,
Efràyim be àgɔ̀jèjea ku Sàmarìa be èhlɔ̃dãdãa la ze.
Nyàwo wo le wɔ̀ ènu mà-nyɔ̃,
Fìãfĩwo le gbã àmèwo be àxuewo,
àglajètɔwo le wɔ̀ ènu dakà lè èdùa mè.
2Eye àmè ɖekpe mu le gblɔ̃ lè ye ɖokoe mè be
fifìa mù ŋɔjè ènu gbegble kè wo wɔ̀a mè ò.
Nène a ye wo trɔ gàmènɔ̀tɔ na woabe gbegblewo,
wo lè ŋùkumè na mù.
3Woabe ènu gbegblewo wɔ̀wɔ
ye wo sɔ dona jìjɔɛ na èfìɔ ku ègawo.
4Woa kpata, wo nyi àhasìtɔwo
sìgbè kpɔ̃nɔkpo xɔ̀zò gegle
kè ŋuti kpɔ̃nɔwɔ̀tɔa ɖèkɔ̀ lè
wàlɛbɛ kè e nyà èmaa kaka bèa hɔ̃a nène.
5Lè miabe èfìɔ be ŋùkèkè nyuɛ̃ jia,
cãmìwo lena èdɔ to woabe àhà mumu ji.
E dona èha kudo wo.
6Ɖo wo dɔ̃nà gogo ku èjì xɔ̀zò
sìgbè kpɔ̃nɔkpo kè kpɔ̃nɔwɔ̀tɔa
gble dàɖɛ èzã blibo eye kè èŋù kèa
e xɔ̀zò sìgbè èzò hɛ̀hɛ̀a nène.
7Woa kpata, wo xɔ̀zò sìgbè èkpozo nène
eye wo crɔ̃ woabe kòjoɖotɔwo.
Woabe èfìɔwo jè ànyi ɖèka-ɖèka,
ɖekpe mu lè woa dòmè kè fã yɔ mù ò.
8Ènu gbegblea gɛ̃ ɖo Efràyim cã mè.
E trɔ sìgbè klàko kè wo mu trɔ òa nène.
9Àmèjrowo xɔ̀ ŋusɛ̃ lè e si
eye mu nya ŋutɔ cã ò.
Sĩsĩ le è sɔ bla, eye mu do è jèsi ò.
10Izràɛl dùkɔ̃a be jajraa,
mu ɖù ɖase nyuɛ̃ so e ŋuti ò.
Wo mu trɔ va Tɔhonɔ̀ woabe Mawu a gbɔ ò.
Eye wo mu ji àpe ŋùmè cã ò.
11Efràyim lè sìgbè àhɔ̃ne
kè si susu ɖe mu lè òa nène.
Wo mì àsi na Ejiptè,
eye wo jo woa ɖokoe na Àsirì.
12Ne wo le yìa, mù la dà èɖɔ cɔ̃ wo,
sìgbè àyamè xèviwo nène.
Mù la dɔ̃to na wo sìgbè àlekè
mù gblɔ̃ na wo lè bɔ̀bɔa mè nène.
13Bàbà na wo, ɖo wo trɔ lè yomè na mù.
Gbegble ne jè woa ji,
ɖo wo mu sè àpe ègbè ò.
Mù ɖo èjro be ma hlùɛ̃ wo gã
vɔ̀a, wo ɖà àjè ɖo àsi nyè.
14Ne wo le biɔ àpe àlɔ̀doa,
wo mu wɔ̀nà ɛ̀ kudo èjì mè kɔ̀kɔ̀ɛ ò.
Vɔ̀, lè ànyi mɔmlɔ̃ mèa, wo hànà ènu ɖo
ènu kè wo la ɖù kudo kè wo la nùa ŋuti.
Wo trɔ ŋùgbe do mù.
15Co ènyè ye na wo ŋusɛ̃,
vɔ̀a susu gbegble kpò
wo ɖènà so ŋuti nyè.
16Ne wo trɔ va àmè ɖe gbɔa,
mu nyi ènyè gbɔ ye ò.
Wo lè sìgbè àŋùdàti gbegble nène.
Woabe èfìɔviwo la crɔ̃ lè àhùa
ɖo woabe ènyà kpòtoe gbɔ̃gblɔ̃ ŋuti;
eye wo la nyi ènu ɖì kòkoe lè Ejiptè.
Mina Bible © Bible Society of Togo, 2014.