Òzeà 9
9
Izràɛl la yì gàtɔnugbe
1Izràɛl, mù gbà kpɔ jìjɔɛ kaka
sìgbè dùkɔ̃ kpɔ̀tɛawo nène ò.
Ɖo àhasì wòa dɔ̃ wò boo lè Mawu wòa gbɔ.
Wò jro la xɔ̀ yebe fɛ̃tu lè
tèpe kèwo kpata wo pònà èlù lèa.
2Vɔ̀ èlù kè wo le pò lè àgblèa
kudo àmì kè wo le ɖè lè àmì fiɔ̃pea
mu la nyi nuɖùɖu na wò ò.
Vɛ̃ yeyea cã la glo wò godo.
3Efràyim mu la gbà teŋu nɔ̀
Tɔhonɔ̀ be èdùa mè ò.
E la trɔ yì Ejiptè àlo
e la yì ɖù ènu mà-kɔ̀ mà-kɔ̀wo lè Àsirìa.
4Wo mu la gbà kɔ̀ vɛ̃ ɖo ànyigbã na Tɔhonɔ̀ ò,
woabe vɔ̀sawo mu la gbà jè ŋùkumè na ɛ̀ ò.
Woabe nuɖùɖua la nɔ̀ sìgbè èfũlòlo nuɖùɖu nène.
Àmè kèwo keŋu la ɖù ìa, la pòɖi woa ɖokoe.
Ɖo woa ŋutɔ kpò nuɖùɖu kèa la nyì
eye mu la va Tɔhonɔ̀ be àxuea mè ò.
5Leke mì la wɔ̀ lè gòdo be ŋùkèkè ŋua ji,
Tɔhonɔ̀ be ŋùkèkè be àzã ŋua ji ò?
6Kpɔɖa ne mì jo lè mìabe ànyigbã cɔ̃crɔ̃a jia,
Ejiptè la xɔ̀ mì, vɔ̀a Mènfis ye mìabe èyɔ̀dowo la nɔ̀.
Fikèa, àzrɔɛ la vũ cɔ̃ mìabe àdɔ̀kùnuwo,
eye àŋɔ̀ka la vũ trɔdo woabe àxuewo.
7Wo gbãnà, ŋùkèkè kèwo ji Tɔhonɔ̀ la va lèa.
Wo gbãnà, ŋùkèkè kèwo ji Tɔhonɔ̀ la biɔ èhlɔ̃ lèa!
E jè be Izràɛl ne nya ɛ̀.
Mì le gblɔ̃ be: “Gblɔ̃ɖɛtɔ kèa cibòmè,
àmèsìamìnaa le gblɔ̃ èsɔ̀nya.”
Nyàwo be nyi be mìabe àgɔ̀jèje kpòtoewo
kudo ètèsisi pòɖi kèwo mì le wɔ̀ va e gbɔa ŋuti ye.
8Ènyè gblɔ̃ɖɛtɔa ye le ɖia
gbà le kpɔ Efràyim be èdùa ji.
Mù lè kudo Mawu nyè.
Co, àmèwo le tre èmɔ̃ na mù
lè àfi kèwo kpata mù le toa.
Wo sitè ɖo ŋuti nyè lè
kaka Mawu nyè be àxuea mè.
9Mì gɛ̃ yì kaka gɔ̃mè boo na èvuɛ̃a
sìgbè lekè be nɔ̀ lè Gibea va yìa nène.
Vɔ̀a, Tɔhonɔ̀ mu ŋlɔ̀be mìabe èhlɔ̃dãdã kpɔ ò.
E la dɔ̃ yebe èto na mì.
Tɔhonɔ̀ gbɔjɔ lè Izràɛl ŋuti
10Mù kpɔ Izràɛl sìgbè rɛ̀zɛ̃
kèwo lè zògbè pupui jia nène.
Mù kpɔ mìa tɔwo sìgbè gboti
be kusɛ̃sɛ̃ cucugbã lè gboti jia nène.
Co kaka kè wo ɖo Bɛt-Pèɔr kpòa,
wo sɔ woa ɖokoewo do àsi na Baal
ŋùkpɛ̃ vòdua trɔ ènu nyɔŋu
sìgbè vòdu kè wo sɔ woa ɖokoewo na a ke nène.
11Efràyim be gogoa zrò
sìgbè àfi xèviwo be zòzro nène:
Èvi jìji mu gbà lè ò,
èfufɔfɔ mu gbà lè ò
eye èfudodo cã mu gbà lè ò!
12Ɖo ne wo gbà le kpɔ èviwo ji cã
gãke mù la crɔ̃ wo gbɔ̀xue wo la va sĩ.
Ɛ̃ɛ gbledo hùenu ɖe la nyi na Efràyim
wàlɛbɛ kè mù la gble wo ɖɛa.
13Mù kpɔ Efràyim sìgbè èdeti be àgblè
kè wo do ɖo zògbè kè ɖo èsì do mèa nène.
E sɔ èviawo wɔ̀ àdèlã na àdèdàtɔa.
14Tɔhonɔ̀, wɔ̀ ènu ɖe! Vɔ̀ nukɛ ye ò?
Ɖo wo nyɔ̃nù mà kpɔ èfu fɔ be bònu,
kaka woa va na ànɔ èviwo!
15“Woabe vuɛ̃wo ze lè Gilgàl.
Funua ye mù le crì wo lè.
Mù la nyà wo lè àxue nyèa mè
ɖo èvuɛ̃ kèa ŋuti, lɔ̃lɔ̃ nyè na woa bu!
Woabe ŋùkɔ̀nɔ̀tɔwo jèagla.
16Èkpò sù Efràyim sùsuiɖe.
Yebe èkèwo ŋutɔ cã pu,
kusɛ̃sɛ̃ ɖekpe mu la nɔ̀ e ji ò.
Ne nyɔ̃nùawo gbà ɖo èvi ŋutɔ cã,
mù la ɖo èku ɖoɖa wo”
17Mawu nyè la gbe Efràyimviwo
ɖo wo mu sè yebe ègbè ò.
Wo la nɔ dã lè dùkɔ̃ kpɔ̀tɛawo dòmè.
Mina Bible © Bible Society of Togo, 2014.