Òzeà 6
6
1Mì gblɔ̃nà be:
“Mì na mia trɔ yì Tɔhonɔ̀ gbɔ!
Ɖo e do mi àbì, vɔ̀a e ye la dà èdɔ̀ na mi.
E pò mi, vɔ̀a e la bla àbìa na mi.
2E la trɔ na mi àgbè.
Lè ŋùkèkè èvè, ètɔ̃ yomè a,
e la trɔ fɔ̃ mi ɖotè
eye mi la trɔ kpɔ àgbè lè E gbɔ.
3Mì na ne mia ji Tɔhonɔ̀ ne mia jèsi ì.
Kãkãɖoji lè yebe vava mè
sìgbè àlekè fɔ̃fɔ̃mè zena a nène.
E la va na mi sìgbè èji jàja
kè le wu èsì ànyigbãa nène.”
4Tɔhonɔ̀ ɖo e ŋuti gblɔ̃ be:
“Nukɛ mù la wɔ̀ na èwò, Efràyim?
Èwò Yudà ya ɖe?
Mìabe ànùkua wɔ̀wɔ na mù a,
lè sìgbè ŋùdekɛ̃nyɛ be lilikpo àlo
fɔ̃fɔ̃mè be àhũ jàja kè buna kabaa nène.
5Ekèa ŋuti ye mù le pò mì kudo gblɔ̃ɖɛtɔwo be ènyà,
eye mù le gblɔ̃ na mì be mì le yì cɔ̃crɔ̃ mè.
Kòjosòso nyèa la jè mìa ji sìgbè kɛ̃klɛ̃ nène.
6Ɖo ànùkua wɔ̀wɔ ye mù jina
mu nyi vɔ̀sawo ò.
Woa nya mù be mù nyi Mawu
sɔ wu be woa wɔ̀ numème be vɔ̀sawo.”
Izràɛlviwo be èhlɔ̃dãnuwo
7Sìgbè Adàm nènea, mì gbã zòɖùɖua
funu ye mì gbe mù lè.
8Gilead nyi ènu gbegblewɔ̀tɔwo be èdù
àmè kèwo be àlɔ̀wo pò èhũ.
9Sìgbè àjòglasu kèwo lè àjòhamè nènea,
Hũbonɔ be hasòso ɖewo le wù àmèwo
lè Sikɛ̀m be èmɔ̃ ji. Ènu jiŋɔ ɖe ye nyi ekèa!
10Lè Izràɛl nyigbã jia, mù kpɔ bùsunuwo
Efràyim be àhasìwɔ̀wɔa
kplɔ̀ Izràɛl ɖo mà-kɔ̀ mà-kɔ nyinyi mè.
11Eye Yudà cã be hùenu la sù sɔ̀sɔɛɖe.
E la nyi wàlɛbɛ kè mù la trɔ sɔ dùkɔ̃ nyèa ɖo yebe èbònua.
Mina Bible © Bible Society of Togo, 2014.