Òzeà 5
5
Izràɛl be ènu bàɖàfiɔtɔwo
1Mìa hũbonɔwo, mì ɖoto ekèa!
Mìa Izràɛl be kplɔ̀tɔwo cã, mì sè!
Kaka jè mì, àmè kèwo lè fìɔsaa mèa ji:
Mì ɖo la sò kòjo jɔ̀jɔɛ.
Co lè Mispà be èdùa mèa,
mì nyi èmɔ̃tetre na dùkɔ̃ nyèa.
Lè Tabɔ̀r be ètoa jia, mì nyi èɖɔ kè wo ɖoa.
2Èhlɔ̃dãtɔwo yì ɖè èdo gã ɖe ɖo Sitìm
Eye mù la dɔ̃ èto na wo veveɖe.
3Mù jèsi Efràyim be kɔ̀taa
eye wo mu la teŋu wla Izràɛl do mù ò.
Ɖo fifìa, Efràyim wɔ̀ àhasì
Eye Izràɛl jè mà-kɔ̀ mà-kɔ̀ nyinyi mè.
4Ènu kè Izràɛlviwo wɔ̀a,
mu gbà na wo èmɔ̃ ne woa
teŋu trɔ va woabe Mawu a gbɔ ò.
Àhasì be àya lè woa dòmè,
eye wo mu nya Mawu be èmɔ̃a ò.
5Izràɛl be jajra ze glãlã.
Efràyim ku Izràɛl jèanyi
ɖo woabe àgɔ̀jèjea ŋuti.
Yudà cã jè è kudo wo.
6Wo la yì ji Tɔhonɔ̀ kudo woabe èlãwo
gbàkudo woabe ènyìwo
vɔ̀ wo mu la kè ɖo e ŋuti kpɔ ò.
Ɖo E tè yì àzɔ̀ge boo lè woa gbɔ.
7Wo mu nɔ̀ ègbèji na Tɔhonɔ̀ ò,
ɖo wo jì àhasìviwo.
So fifìa kaka na wètri ɖèkaa,
woabe ànyigbã a la crɔ̃.
Àhùa ɖo Yudà ku Efràyim ŋuti
8Mì ku èkpɛ̃ lè Gibea ku Ramà.
Mì sìa Bɛt-Avɛ̃n! Bɛnyamìn, trɔ kpɔ ŋùgbe!
9Lè ètodɔ̃ be gàmèa,
Efràyim la trɔ zògbè ɖèɖe.
Mù kã ɖo ènyà kè mù gblɔ̃a ji
Izràɛl be kɔ̀tawo kpataa!
10Yudà be ègawo be wɔ̀na ɖèfũ ŋutɔ.
Mù la ɖùɖù àdɔ̀mèze nyèa kɔ̀ ɖo woa ji.
11Wo tafu Efràyim, le tù àfɔ̀ yebe jènawo mè.
Ɖo e ji be yèa kplɔ̀ àya do.
12Eye mù la nɔ̀ na Efràyim sìgbè àbì sìɔ̃sì nène,
eye na Yudà, sìgbè àbì jè màku gbèɖe nène.
13Efràyim do jèsìdo yebe èdɔ̀a
eye Yudà cã kpɔ yebe àbìa.
Nène a ye Efràyim yì ji àlɔ̀do lè Àsirìa.
Wò dɔ̃ àmè ɖoɖa èfìɔ gãa gbɔ.
Vɔ̀, mu la teŋu dà àbì kèa na wò ò.
14Nyàwo, nyè ŋutɔ ye zɔ̃ ɖo Efràyim ji sìgbè jãŋùta nène,
eye mù zɔ̃ ɖo Yudà ji sìgbè èlã wɔ̀adã nène.
Ne mù jè àdèlã nyèa ji, sɔ ɛ̀ le yìa,
àmè dɛkpe mu lè la teŋu hlùɛ̃ ɛ̀ lè àsi nyè ò.
Tɔtrɔ va Mawu gbɔ
15Tɔhonɔ̀ gblɔ̃ be:
“Mù la trɔ yì gbɔ nyè,
kaka na gàmè kè wo la jèsi woa ɖokoe
eye wo la trɔ va gbɔ nyèa.
Wàlɛbɛ kè gbledo la jè woa jia,
wo la ji èmɔ̃ na mù.”
Mina Bible © Bible Society of Togo, 2014.