Òzeà 4
4
Mawu ɖokòjo na yebe dùkɔ̃a
1Izràɛlviwo, mì ɖo èto Tɔhonɔ̀ be ègbè!
Ɖo e le ɖokòjo na dùkɔ̃a.
“Àdɔ̀mènyuɛ̃ ku ègbèji nɔ̀nɔ dɛ̃,
eye wo mu gbà nya mù sìgbè Mawu nène ò.
2Kpɛ̃sɛ̃sɛ̃, àjèɖàɖa, èhlɔ̃dãdã
èfĩ fìfi ku àhasìwɔ̀wɔ ɖɔ èdùa
eye èhũ kɔ̀kɔ ɖo ànyi bɔ fuu.
3Ekèa ŋuti ye ànyigbã a la nɔ̀ kuɖìɖi mè,
èdùamètɔwo kpata, ègbemèlãwo
kudo àyamè xèviwo la ɖìkù.
Àpùmèlãwo la dɛ̃.”
Hũbonɔwo ɖùzãnu
4Kpao, wo mu ɖo la dohùɛ do àmè ɖekpe
kaka la va lɔ èzũ cɔ̃ àmè ɖe ò.
Ɖo dùkɔ̃ wòa lè sìgbè àmè kèwo
hɛ̃nà ènyà kudo hũbonɔwo nène.
5Wò la klɛ̃ àfɔ̀ jè ànyi lè ŋùkèkè mè,
gblɔ̃ɖɛtɔ kè lè gbɔ wòa cã la klɛ̃nu jè ànyi lè èzã mè
eye mù la crɔ̃ ènɔ̀ wò.
6Dùkɔ̃ nyèa le crɔ̃ ɖo ènumànya ŋuti.
Kè wò gbe ènunyaa, mù la gbe wò
eye wò mu la gbà nyi gblɔ̃ɖɛtɔ nyè ò.
Kè wò ŋlɔ̀be Mawu wòa be nufiɔfiɔa,
nyè cã mù la ŋlɔ̀be àpo èviwo.
7Hũbonɔwo kpata jèagɔ̀ lè ji nyè.
Nène a mù la trɔ woabe gogoa sɔ wɔ̀ ŋùkpɛ̃ na wo.
8Dùkɔ̃ nyèa be àgɔ̀jèje vɔ̀sawo
ye wo sɔ kpɔna woa ɖokoe ji.
Woabe jrowo ye nyi be dùkɔ̃a ne jè àgɔ̀.
9Vɔ̀a, ènu kè la jè dùkɔ̃a jia
tutu ke ye la va na hũbonɔawo:
Nyè ŋutɔ mù la kplɔ̀ wo,
mù la trɔ ɖo woabe wɔ̀nawo ŋuti.
10Wo la ɖùnu co vɔ̀a, wo mu la ɖɔpò ò;
wo la wɔ̀ àhasì co vɔ̀a, wo mu la jì kpɔ ò.
Ɖo wo gbe mù ènyè Tɔhonɔ̀a
va yì le wɔ̀ àhasì.
11Àhasìwɔ̀wɔ kudo vɛ̃,
vɛ̃ yeyea nana dùkɔ̃a flùnà.
12Dùkɔ̃ nyèa le yì biɔ ènu gɔ̃mè so àti simè;
àtikpàkpa ye le ɖè ènuwawlawo fiɔ ɛ̀.
Àhasì be àya pò do wo eye wo bu.
Wo le wɔ̀ àhasì lè àzɔ̀ge boo na woabe Mawu a.
13Wo yì wɔ̀nà vɔ̀sawo lè ètowo be tamè,
wo tɔnazò lifiwo lè ètokɔ̃ɛwo ji.
Wo nɔ̀nà lokòti, àti gã kudo àti vùdùwo gɔ̃mè.
Ekèa ŋuti ye mìabe nyɔ̃nùviwo le wɔ̀ àhasì
eye mìabe lɔ̃xoyɔviwo le blè woa srɔ̃wo.
14Nyè mu la dɔ̃to na mìabe nyɔ̃nùviwo ɖo wo le wɔ̀ àhasì ò
àlo na mìabe ŋusùviwo be èsrɔ̃wo ɖo woabe àhasìwɔ̀wɔ ŋuti ò.
Ɖo mìabe hũbonɔwo ye kplɔ̀nà wo yì vɔsa kèawo wɔ̀pe.
Dùkɔ̃ kè mu teŋu dona jèsìdo ènu òa, crɔ̃na.
15Oò! Izràɛl, ne wò le wɔ̀ àhasìa,
Yudà mu gbà sɔ yeɖokoe wɔ̀ àgɔ̀jètɔ ò.
Mù gbà yì Gilgàl ku Bɛt-Avɛ̀n ò.
Mù gbà tànu gblɔ̃ be “Tɔhonɔ̀ lè àgbè ò”.
16Izràɛl jèagla sìgbè ènyìnɔ kè gbe àzɔ̃lì zɔ̃zɔ̃ a nène. Eŋuã fifìa Tɔhonɔ̀ la trɔ wɔ̀ ku wo sìgbè ègbɔvi kèwo wo kplɔ̀ yì ègbeɖùpe nènea? 17Efràyimviwo cakà kudo vòdu kpetatawo. Mì ɖè àsi lè woa ŋuti! 18Kè wo nù àhà mu kpɔ̀a, wo wɔ̀ àhasì. Wo lɔ̃ ŋùkpɛ̃ ɖo gogo tèpe. 19Àya la kplɔ̀ wo yì, eye woabe vɔ̀sawo la wɔ̀ ŋùkpɛ̃ na wo.
Mina Bible © Bible Society of Togo, 2014.