Òzeà 13
13
Izràɛl be gbãgbãa gogo
1Wàlɛbɛ kè Efràyim le pò nupoa,
vɔ̃vɔ̃ gã ɖe nɔ̀ ànyi. E ɖo àlɔ̀ Izràɛl ji.
Vɔ̀a e jèagɔ̀, ɖo e sumɔ vòdu Baal
eye e kpɔ èku so e mè.
2Egbèa, wo kpɔ̀tɔ̀ le wɔ̀ èvuɛ̃:
Wo srè woabe klòsalòwo sɔ wɔ̀ bocɔɛviwo
legbaviwo na woa ɖokoe.
Àlɔ̀nudɔwo kpò wo nyi,
eye wo gblɔ̃nà be:
“Wo ɖo la wɔ̀ vɔsa na wo!”
Àmèwo le sumɔ ènyìviwo!
3Ekèa ŋuti ye wo la nɔ̀ sìgbè ŋùdekɛ̃nyɛ be lilikpo nène,
sìgbè àhũ jàja kè buna lè gàmè viɖe mèa nène,
sìgbè fòflo kè àya kplɔ̀ yì lè èlù pòpea nène
àlo àzìzɔ kè tù to flɛsɛ̀ mèa nène.
4So kaka Ejiptè a, mù nyi Tɔhonɔ̀ àpo Mawu.
Tovò lè ŋuti nyèa, wò mu jèsi Mawu bu ò
eye xɔ̀namètɔ ɖe cã mu lè na wò ò.
5Ènyè ya zògbè ji ye mù nya wò lè
lè ànyigbã pu kpakplaa ji.
6Kè mù kplɔ̀ wò yì ègbeɖùpea
wò ɖùnu ɖɔpò sùsuiɖe;
Vɔ̀a, wò ŋlɔ̀be mù
ɖo wò ɖɔ kudo ègòyiyi.
7Mù la nɔ̀ na wo sìgbè jãŋùta
àlo blèkpɔ̃ɛ nène lè èmɔ̃ to
sɔ nɔ ji ènu la le.
8Mù la jè mìa ji sìgbè sisiblìsi
kè si wo xɔ̀ èvia lèa nènea,
mù la zɛ̃ àkɔta na mì.
Mù la vũvũ mì sìgbè jãŋùtanɔ nène,
eye ègbemèlãwo la va flì
mìabe ŋutilãkukuawo.
9Fifìa wò crɔ̃ Izràɛl,
ɖo wò sitè ɖo ènyè
àmè kè dona wò àlɔ̀a ŋuti.
10Fikɛ ye èfìɔ wòa lè ò,
àmè kè la hlùɛ̃ wò gãa?
Fikɛ èga wòawo lè
lè èdùawo kpata mè ò?
Èwò ye biɔ mù sãa be:
'Na mù èfìɔ kudo ègawo'
11Nène a, mù na wò èfìɔwo,
vɔ̀a, mù do àdɔ̀mèze ɖo ŋuti wò;
eye mù trɔ xɔ̀ wo lè àsi,
lè àpe jìbibi dãjèjea mè.
12Wo pòtɛ Efràyim be àgɔ̀jèjewo ɖɛ
eye wo wla yebe èvuɛ̃ cã dàɖɛ.
13Vèvesèsewo la va sìgbè èkulele nène.
Vɔ̀a, Efràyim nyi ɖèvi kè nunya hùe do a:
ɖo kè gàmè sùa, e gbe be
yè mu la to lè yè nɔ̀ be àdòmè ò.
14Mù la xɔ̀ wò plè lè èkuwode be ŋusɛ̃ si.
Mù la hlùɛ̃ wò gã lè èku si.
Èku! Ŋusɛ̃ wòa ɖe?
Èku, ɖè àhùawɔ̀nu wòa fiɔ!
Nyè mu la kpɔ ɖomè ò.
15Wàlɛbɛ kè Efràyim nyi ànyigbã
sɛ̃ku ɖe lè nɔ̀viawo dòmèa,
zògbè ji be àya sɛ̃sɛ̃ ɖe la so
kè Tɔhonɔ̀ la dɔ̃ ɖoɖa a.
E la pu èsìdowo ku èsìjɔ̀sopewo.
E ye ke la kplɔ̀ àdɔ̀kùnuwo
ku ènu xɔ̀asìwo kpata sɔ yì.
Mina Bible © Bible Society of Togo, 2014.