Òzeà 12
12
Izràɛlviwo be àjèɖàɖa so gɔ̃mèjèje
1Tɔhonɔ̀ gblɔ̃ be:
“Efràyim ɖɔ kudo àjè ɖèɖe,
eye Izràɛl be dùkɔ̃a ɖɔ ku àmèbèble.
Yudà gbà kpɔ̀tɔ̀ le zɔ̃ kudo Mawu,
vɔ̀a, e gbà ɖo kàdodo ku vòduwo cã.”
2Efràyim ɖànà àmì na Ejiptè
eye e wɔ̀ zòɖùɖu ku Àsirìa.
Nène a ye e nyi kplɔ̀tɔ na àya
eye e pu dù kplɔ̀ wèzɛ̃pe be àyaa do
ŋùkèkè bliboa.
Àjè ɖàɖa ku gbledo ɖɔ yebe àgbè.
3Tɔhonɔ̀ le hɛ̃ ènyà kudo Yudà.
E la biɔ àkɔ̃ŋùta Yakɔb be àxuedo a
ɖo yebe wɔ̀na gbegblewo ŋutia,
e la dɔ̃ èto na wo ɖo woabe àgbènɔ̀nɔ ŋuti.
4Lè ènɔa be àdɔ̀mè ke ye Yakɔb le nɔ̀via be àfɔ̀kpoji.
Kè e va sĩa, e wɔ̀ àvũ kudo Mawu.
5E drɛ̃ àvũ kudo àtikplɔtɔ ɖe, ɖù e ji
eye e fã àvi, blìbɔ̀ na ɛ̀.
E kpɔ ɛ̀ lè Betɛ̀l, funu ye e pò nupo na mi lè.
6Funua ye àhùadù Mawu
kè wo yɔna be Tɔhonɔ̀a gblɔ̃ lè be:
7“Wò ɖo la trɔ va ènyè àpo Mawu a gbɔ.
Wɔ̀ ènunyuɛ̃ eye wòa le jɔ̀jɔɛ ɖo àsi.
Dojì ɖo ènyè àpo Mawu a ŋuti tɛ̀gbɛ̀.”
8Sìgbè Kanànviwo nènea,
àjè be ènudànu lè àlɔ̀ mè na ɛ̀.
E sɔ tanafu àmè jìjɔɛtɔ̀.
9Efràyim gblɔ̃ be: “Ɛ̃ɛ mù kpɔ èci,
mù trɔ àdɔ̀kùnɔ̀.
Vɔ̀a, nyè mu wɔ̀ ènu dàda ɖe
sɔ kpɔ kɛ̀sìnɔ̀nu kèa ò!”
10Ènyè Tɔhonɔ̀ ye nyi àpo Mawu
so kaka Ejiptè ke fikè wò nɔ̀a.
Mù la trɔ kplɔ̀ wò va èmɔ̃zɔ̃tɔ be bònu,
sìgbè àlekè wò nɔ̀ wàlɛbɛ kè mi dogòa nène.
11Mù sɔ ègbè nyèa do àsi na gblɔ̃ɖɛtɔwo
dɔ̃ wo ɖoɖa, sɔ àvìmènukpɔkpɔwo kpata na wo.
Ɛ̃ɛ, woawo ji mù to sɔ gblɔ̃nà àpe ɖoɖowo.
12Gileadviwo wɔ̀ ènudakà nyàwo.
Ènu nyuɛ̃ ɖe mu kpɔ̀tɔ̀ lè woabe vava yì mè ò.
Lè Gilgàl be vɔsawɔ̀pea, wo wɔ̀ vɔsa
kudo ènyì-su sùgbɔwo.
Vɔ̀a, woabe vɔsakpewo trɔ zũ
èkpewo ɖèɖe lè ègbewo mè.
13Yakɔb si yì Aràm be àgblèji.
E yì wɔ̀ èdɔ, kplɔ̀ èlãwo ɖo nyɔ̃nù ŋuti.
14To gblɔ̃ɖɛtɔ ji ye Tɔhonɔ̀ kplɔ̀ Izràɛl to lè Ejiptè.
Eye gblɔ̃ɖɛtɔ ye be sɔ ɖo kplɔ̀tɔ na yebe dùkɔ̃a.
15Efràyimviwo do àdòmèze na Tɔhonɔ̀ veveɖe.
Woabe Mawu la trɔ ɖɔ̀lì èhũ kèwo wo sɔ̀ ɖo ànyi a,
kudo woabe èzũwo ɖo èta ji na wo.
Mina Bible © Bible Society of Togo, 2014.