Òzeà 14
14
1Wo la dɔ̃ èto na Sàmarìa,
ɖo e sitè ɖo yebe Mawu ŋuti.
Wo la jè ànyi lè èwui nu.
Wo la tùkù woa tɔgbeyɔviwo
eye wo la zɛ̃ pòdo na woa srɔ̃
nyɔ̃nù kèwo si èfu lèa.
Dùkɔ̃ mà-wɔ̀ ànùkua be èdɔ̀dàda
2Izràɛl, trɔ gbɔ̀ va Tɔhonɔ̀ àpo Mawu a gbɔ,
ɖo àgɔ̀jèje wòa na be wò jè ànyi.
3Trɔ va Tɔhonɔ̀ gbɔ
ne wòa gblɔ̃ ènyà kèawo na ɛ̀ be:
“Sɔ àgɔ̀ kèwo mi jèa kè mi
ne wòa lɔ̃ xɔ̀ miabe ènumè nyaawo fàa
sɔ wu ènyì-suwo be vɔsa.
4Àsirìatɔwo mu la gbà hlùɛ̃ mi gã ò,
mi mu la gbà lia èsɔwo ji ò
eye mi mu la gbà yɔ miabe
àlɔ̀nudɔwo be miabe Mawu ɖe ò.
Ɖo gbɔ wò cɔɛvia kpɔ àdɔ̀mè nyuɛ̃ lè.”
5Tɔhonɔ̀ gblɔ̃ be:
“Mù la dà ànùkua mà-wɔ̀ be èdɔ̀a na Izràɛl,
Mù la ɖo lɔ̃lɔ̃ na ɛ̀ veveɖe
ɖo àdɔ̀mèze nyèa nu fa.
6Mù la nyi ŋùdekɛ̃nyɛ be àhũ na ɛ̀.
Eye e la pò èse sìgbè flawà nène,
e la ɖo èkè sìgbè Libàn be àtiwo nène.
7Yebe àlɔ̀zɛ̃wo la vlũ kpe è
sìgbè àmìti nène,
eye e gbã yebe huɛ̃huɛ̃ gbigblia
sìgbè Libàn tɔ̀a nène.
8Izràɛlviwo la trɔ gbɔ̀ va àpe fàfagbè.
Wo la dà èlù gble,
eye wo la vlũ sìgbè vɛ̃ka nène.
Wo la ɖo àsìxɔ̀xɔ sìgbè Libàn be vɛ̃ nène.
9Efràyim, nukɛ mù la gbà sɔ àpo legbaviwo sɔ wɔ̀ ò?
Mù la sè yebe kuefãwo, mù la kpɔ e ji
mù la nɔ̀ na ɛ̀ sìgbè àti do àmà nène.
Ènyè ye nana wò àgblèmènukuwo.”
10Àmè kè nyi ènunyatɔa,
ne kpɔ ènu kèawo ji!
Àmè kè si susu lèa, ne sè e gɔ̃mè!
Ɖo Tɔhonɔ̀ be èmɔ̃wo nyi èmɔ̃ jɔ̀jɔɛ.
Àmè jɔ̀jɔɛwo la zɔ̃ to woa ji,
vɔ̀a, àmè jèaglawo la ɖiɖi jè ànyi lè wo ji.
Mina Bible © Bible Society of Togo, 2014.