Òzeà 11
11
Mawu be lɔ̃lɔ̃ na Izràɛl, èvia
1Tɔhonɔ̀ gblɔ̃ be:
“Wàlɛbɛ kè Izràɛl nyi ɖèkajɛa,
mù lɔ̃ yebe ènyàgbɔ.
Mù yɔ ɛ̀ be èvi nyè,
kplɔ̀ ɛ̀ to lè Ejiptè.
2E yomè a, mù kpɔ̀tɔ̀ le yɔ wo
co wo le si boo lè gbɔ nyè.
Dùkɔ̃ nyèa le wɔ̀ vɔsa na vòdu Baal
wo le tɔzò lifi na vòduwo.
3Co ènyè ye fiɔ àfɔ̀ɖèɖe Efràyim
mù kɔ ɛ̀ ɖo àpe àlɔ̀wo mè.
Vɔ̀a, mu do è jèsìdo kpɔ be
mù le lebè na yè ò.
4Mù kplɔ̀ ɛ̀ ɖɔ̀ɖɔ̀ kudo àdòdò
kè lè mi kudo è dòmèa.
Mù lè na ɛ̀ sìgbè ètɔ kè kɔkɔ
èvia gba ɖo ye ɖokoe ŋuti,
gbà bɔ̀bɔ̀nà dona ènuɖùɖu na ɛ̀a nène.
5Izràɛlviwo mu la gbà trɔ yì Ejiptè ò,
vɔ̀ Àsirìa ye la va ɖù e ji.
Ɖo wo gbe be yèwo mu la trɔ va gbɔ nyè ò.
6Ekèa ŋuti ye èwui le gblenu lè yebe èdùgãwo mè
le gbã woabe àgbògbòwo, le crɔ̃ ènu sia ènu.
Ɖo Izràɛl wɔ̀ ɖoɖo gbegblewo.
7Dùkɔ̃ nyèa gbe mù eye e le sè vivi na ègbèji mà-nɔ.
Wo yɔ ɛ̀ ne bèa sitè co mu le ji ò.
8Efràyim nukɛ mù la wɔ̀ na wò ò?
Ma wɔ̀ kudo wò sìgbè Admà
àlo Sèboim be èdùwo nènea?
Mù titɔ kaka le hũhũ, so èta va àfɔ̀gɔ̃mè.
9Nyè mu la gbà zɔ̃ ɖo àpe àdɔ̀mèze be àdã ji ò.
Nyè mu la gbà gbã Efràyim be èdùa ò.
Ɖo nyè mu nyi àgbètɔ ò, vɔ̀ Mawu.
Efràyim Mawu ɖèka mù nyi na wò,
nyè mu la va gbɔ wò ku àdɔ̀mèze ò.”
10Àmè kèwo sò ci àmèjro nyigbã jia
la va jè Tɔhonɔ̀ kè le gbo
sìgbè jãŋùta nènea yomè.
Gbogbo kèawo mè ye èviawo
la trɔ gbɔ̀ so kaka àpùwo godo
va kudo èjicici gã ɖe.
11Wo la pu dù so Ejiptè,
sìgbè àfixèviwo be zòzro nène,
so Àsirìa sìgbè àhɔ̃newo be zòzro nène.
“Mù la trɔ kplɔ̀ wo gbɔ̀ va woabe ànyigbã ji.”
Tɔhonɔ̀ ye gblɔ̃ ɛ̀.
Mina Bible © Bible Society of Togo, 2014.