Èsea gbìgbɔ̀ hlɛ̃ 5

Èse èwoawo

1Mosè yɔ Izràɛlviwo kpata bɔ̀, eye be gblɔ̃ na wo be:

“Izràɛlviwo, mì ɖo èto, ne mìa sè èse ku ɖoɖo kèwo kpata mù la gblɔ̃ na mì egbèa. Mì la kpla wo, eye mì la le wo ɖo àsi, ne mìa wɔ̀ ɖo woa ji. 2Tɔhonɔ̀, miabe Mawu a ɖùzò ku mi, lè Horɛb be ètoa gbɔ. 3Mu nyi mia tɔwo ye Tɔhonɔ̀ ɖùzò kèa ku ò; miawo ye be ɖù ì ku, mi, àmè kèwo lè àgbè egbèawo ye be ɖù ì ku. 4Tɔhonɔ̀ pò nupo ku mì, àgbãŋùgbà, lè ètoa ji, so èzò mè. 5Wàlɛbɛ ŋua, nyè ya, mù nɔ̀ mìa ku Tɔhonɔ̀ dòmè, le ɖo yebe ègbè na mì#5.5 Tot 20.1-17: Leke wo ŋlɔ̀ èse èwoawo ɖo, lè Toto be xoma kèa mèa ze sìgbè ɖe ye be tovò vi ɖe nène, gãkea, vòvò toto gã ɖekpe mu lè e mè ò, ɖoa, mì le vɔ̃, lè èzòa gbɔ, eye mì mu yì ètoa ji ò.

6“Ènyè ye nyi Tɔhonɔ̀ àpo Mawu, kè kplɔ̀ wò to so Ejiptè be ànyigbã ji, àfi kè wò nyi kluvi lè sãa.

7Wò mu la sumɔ vòdu ɖekpe, bɔ̀ ɖo ŋuti nyè ò.

8Wò mu la wɔ̀ legba ɖekpe, àlo ènu ɖekpe kè lè jiŋùkusia, àlo ènu ɖekpe kè lè ànyigbã jia, àlo ènu ɖekpe kè lè èsì mè, lè ànyigbã gɔ̃mèa be nɔ̀nɔmè na ɖokoe wò ò. 9Wò mu la do èta gũ na èkpetata ŋuawo ò, eye wò mu la sumɔ wo ò, ɖoa, ènyè ye nyi Tɔhonɔ̀ àpo Mawu, Mawu kè hùãnàŋu, eye mù ɖona ètɔwo be èvuɛ̃ tèpe na èvi kèwo crì mùawo, kaka na jìjimè ètɔ̃gɔ̃a ku ènègɔ̃a, 10vɔ̀, ɖènà ànùkuawɔ̀wɔ fiɔ jìjimè èkà èwìvɔàtɔ̃ kèwo lɔ̃ mù, eye wo le èse nyèwo ɖo àsia.

11Wò mu la yɔ Tɔhonɔ̀ àpo Mawu be nyikɔ sɔ gble ò, ɖoa, Tɔhonɔ̀ mu la dokpò èto dɔ̃dɔ̃ na àmè kè la yɔ yebe nyikɔ sɔ gblea ò.

12Le ŋùku ɖo jɛ̃gbɔ̃zãa ŋuti, ne wòa wɔ̀ ɛ̀ kɔ̀kɔ̀ɛ, sìgbè lekè Tɔhonɔ̀ àpo Mawu ɖo è na wòa nène. 13Ŋùkèkè àdɛ̃ ye wò la wɔ̀ èdɔ, eye wò la wɔ̀ èdɔ wòwo keŋu. 14Vɔ̀a ŋùkèkè adrɛ̃gɔ̃ a ya nyi Tɔhonɔ̀, àpo Mawu be jɛ̃gbɔ̃zã. Wò mu la wɔ̀ èdɔ ɖekpe, lè e ji, wò ŋutɔ, ŋusùvi wò, nyɔ̃nùvi wò, sumɔ̃vi wò ŋusù, sumɔ̃vi wò nyɔ̃nù, ènyì wò, èsɔ-àkɛtɛ wò, èlã wòwo dòmètɔ ɖekpe, àmèjro kè zɛ̃ gbɔ wòa, ne sumɔ̃vi wò ŋusù ku sumɔ̃vi wò nyɔ̃nù, woa gbɔ̃jɛ̃, sìgbè wò ŋutɔ ke nène. 15Ɖoŋù be wò nyi kluvi lè Ejiptè be ànyigbã ji sã, eye Tɔhonɔ̀, àpo Mawu a vlũ yebe àlɔ̀ sɛ̃sɛ̃a, sɔ kplɔ̀ wò to so funua; ekèa ŋuti Tɔhonɔ̀ àpo Mawu ɖo è na wò be wòa do bùbu jɛ̃gbɔ̃zãa ŋuti ɖo.

16Do bùbu ètɔ wò ku ènɔ̀ wò ŋuti, sìgbè lekè Tɔhonɔ̀, àpo Mawu ɖo è na wòa nène, ne wòa nɔ̀ àgbè dìdi, eye ènu ne nyɔ na wò, lè ànyigbã kè Tɔhonɔ̀ àpo Mawu sɔ na wòa ji.

17Wò mu la wù àmè ò.

18Wò mu la wɔ̀ àhasì ò.

19Wò mu la fĩ èfĩ ò.

20Wò mu la ɖù àjè be ɖase ɖo èhawòvi ŋuti ò.

21Wò mu la bìaŋù ɖo èhawòvi be èsrɔ̃ ŋuti ò. Wò mu la bìaŋùku ɖo èhawòvi be àxue, be àgblè, yebe sumɔ̃vi ŋusù, sumɔ̃vi nyɔ̃nù, yebe ènyì, àlo yebe èsɔ-àkɛtɛ, àlo ènu ɖekpe kè nyi èhawòvi tɔ̀a ŋuti ò.”

22Ènyà kèawoa, mìabe àmèha a keŋu ye Tɔhonɔ̀ gblɔ̃ wo na, so èzò mè, so lilikpowo ku èzã be vìvìti cricri mè, ku ègbè sɛ̃ŋu, eye mu sɔ ènyà bu ɖekpe kpe ɖo e ŋuti ò. E ŋlɔ̀ wo ɖo èkpe èvè kèwo be sɔ do àsi na mùa ji.

Mosè nyi Mawu be ègbèɖotɔ

23Kè mì sè ègbè kè ɖì, so vìvìti mè, lè èto kè le bìzòa mèa, mìabe kɔ̀tawo be ègawo keŋu ku mìabe àmè sĩsĩwo keŋu dɔ̃ gogo mù, 24eye wo gblɔ̃ be: 'Tɔhonɔ̀, miabe Mawu a ɖè yebe gogo ku lekè be lòlò ɖoa fiɔ mi, eye mi sè yebe nupo pòpo, so èzò mè. Egbèa, mi kpɔ be Mawu teŋu pò nupo na àgbètɔ, eye be la gble àgbètɔ ɖo àgbè! 25Vɔ̀a ɖe, nukɛ ŋuti mi la gbà nɔ gogo èzò gã kèa, ne bèa fiɔ̃ mi wù ɖo ò? Ne mi kpɔ̀tɔ̀ le sè Tɔhonɔ̀, miabe Mawu a be ègbèa, mi la ku. 26Àmè kɛ ye sè Mawu àgbèagbèa be ègbè, so èzò mè, sìgbè miawo nène kpɔ, eye be ci àgbè ò? #5.26 Izràɛlviwo kã ɖo ji kplikpã be àmè ɖe mu teŋu kpɔ Mawu eye be la gbà nɔ̀ àgbè ò. Kpɔ 4.33; Kòj 13.22 27Eŋuã, èwò Mosè kpò ye la nɔ gogo è, ne wòa nɔ sè Tɔhonɔ̀, miabe Mawu a be ènyàwo keŋu. E yomè a, wò la trɔ va, nɔ gblɔ̃ ènu kèwo keŋu Tɔhonɔ̀, miabe Mawu a gblɔ̃ na wòa, na mi, eye miawo ya, mi la ɖo èto wò, eye mi la wɔ̀ ɖo woa ji.' 28Tɔhonɔ̀ ɖo èto ènyà kèwo keŋu mì gblɔ̃ na mùa, eye Tɔhonɔ̀ gblɔ̃ na mù be: 'Mù sè ènyà kèwo keŋu dùkɔ̃ kèa gblɔ̃ na wòa; wo wɔ̀ ɛ̀ nyuɛ̃ ɖe, kè wo gblɔ̃ ènyà ŋuawoa. 29Ne woabe susu la jro kpò be yèwoa nɔ si mù, ne yèwoa nɔ wɔ̀ ɖo èse nyèwo ji, gbè sia gbèa, e la na woa ŋutɔwo ku woabe èviwo be nyɔna, kaka sɔyì! 30Yì gblɔ̃ na wo be: 'Mì trɔ yì mìabe gòxɔwo mè!' 31Vɔ̀a, èwò ya, wò la ci fikèa, lè gbɔ nyè. Mù la gblɔ̃ èsea keŋu, ɖoɖoawo ku èkɔ̀do kèwo wò la fiɔ wo, ne woa nɔ zɔ̃ ɖo woa ji, ne wo ɖo ànyigbã kè mù sɔ le do àsi na woa jia.'

32Mì la kpɔ e gbɔ be mìa wɔ̀ ɖo ènu kè Tɔhonɔ̀, mìabe Mawu gblɔ̃ na mìa ji, ekè mì mu la zɛ̃ yì ɖùsi mè, àlo èmìɔ̃ mè ò a. 33Mì la nɔ zɔ̃, wè sia wè, lè èmɔ kè Tɔhonɔ̀, mìabe Mawu ta na mìa ji, àleke be mìa nɔ̀ àgbè, ne mìa nɔ̀ jɔ̀gbè nyuɛ̃ mè, ne mìabe àgbè ne dìdì, lè ànyigbã kè le sù mìa sia ji.

Currently Selected:

Èsea gbìgbɔ̀ hlɛ̃ 5: GEN

Highlight

Copy

Compare