Èsea gbìgbɔ̀ hlɛ̃ 34

Mosè be èku

1Kè Mosè so Mòab be bàlìa mè, lia Nebò be ètoa, yì Pisgà be ètoa tamè, jè ŋùkɔ̀ Yerikòa, Tɔhonɔ̀ ɖè ànyigbãa kpata fiɔ ɛ̀, so Gilead nutomè, kaka va ɖo Dàn be ànyigbã ji. 2E kpɔ ɛ̀, so Neftalì nuto bliboa mè, va to Efràyim ku Manasè, kudo Yudà be ànyigbãwo ji, va kɔ̀ ɖo èwèɖoxɔ̀pe be àpùa to. 3E gbà kpɔ ɛ̀, so àpùgo nutoa mè, va to Yerikò be bàlì mè kè nyi èdeti vivi be èdùa, kaka va kɔ̀ ɖo Soàr be ànyigbã a ji. 4E yomè a, Tɔhonɔ̀ gblɔ̃ na ɛ̀ be: “Ekèa ye nyi ànyigbã kè be àjɔ̀gbè mù fìã na Abràham, Izàk ku Yakɔb be: 'Àpo jìjimèviwo ye mù sɔ ɛ̀ le na'. Mù na wò kpɔ ɛ̀ ku wò ŋutɔ àpo ŋùkuviwo, vɔ̀a, wò mu la yì e ji ò#34.4 Kpɔ Gɔ̃m 12.7; 26.3; 28.13..”

5E yomè a, Mosè, Tɔhonɔ̀ be sumɔ̃via ku lè funu, lè Mòab be ànyigbã ji, zɔ̃ ɖo ènyà kè Tɔhonɔ̀ gblɔ̃a ji. 6Tɔhonɔ̀ ŋutɔ ɖì ì ɖo bàlìa mè, lè Mòab be ànyigbã ji, jè ŋùkɔ̀ Bɛt-Peɔr, eye àmè ɖekpe mu kpɔ yebe yɔ̀do kpɔ, kaka va na egbè ò.

7Mosè ɖo èpè èkà ètɔ̃, gà kè mè be kua; ŋùkuviwo mu ci na ɛ̀ ò; yebe àmètia mu gbɔjɔ ò. 8Izràɛlviwo fã Mosè, eye wo làmɔɛ̃, ŋùkèkè ègbã, lè Mòab be bàlìa mè. E yomè a, ècɔ wɔ̀wɔ be àzãwo nu va yì. 9Yosùa kè nyi Nun be èvia ɖɔ ku ènunya be gbɔ̃gbɔ̃, ɖoa, Mosè dà àlɔ̀ ɖo e ji#34.9 Kpɔ Hɛ̃h 27.18-23; ekèa ŋutia, Izràɛlviwo ɖona èto è, àleke be woa wɔ̀ ɖo Tɔhonɔ̀ be ègbè kè be ɖè na Mosè a ji.

10So gbè ŋua gbèa, gblɔ̃ɖɛtɔ ɖekpe mu gbà va, kè nɔ̀ sìgbè Mosè, kè Tɔhonɔ̀ ŋutɔ jèsi, àgbãŋùgbà a nène ò#34.10 Kpɔ Tot 33.11.. 11Mosè kè Tɔhonɔ̀ dɔ̃, be yì wɔ̀ ŋùdãdɔwo ku nùkunuwo keŋu, lè Ejiptè be ànyigbã ji, lè Faraɔ̀n ku yebe àgbònùglawo keŋu, kudo yebe dùkɔ̃ bliboa be ŋùmè a, 12Mosè kèa ye sɔ yebe àlɔ̀ be ŋusɛ̃ gã ŋua, sɔ do vɔ̃vɔ̃ eye be sò àdìka ŋutɔ na àmèwo, lè Izràɛlviwo be dùkɔ̃ bliboa be ŋùmè.

Currently Selected:

Èsea gbìgbɔ̀ hlɛ̃ 34: GEN

Highlight

Copy

Compare