Èsea gbìgbɔ̀ hlɛ̃ 33
33
Mosè tusì na Izràɛl be kɔ̀ta woèvèawo
1Sìtu kèwo Mosè, Mawu be àmèa kɔ̀ ɖo Izràɛlviwo ji, gbɔ̀xue be kua ye nyi ekèawo.
2Mosè gblɔ̃ be:
“Tɔhonɔ̀ ɖì so Sinaì be ètoa ji va,
e hũ ɖo woa ji, sìgbè dɔ̃ŋùkusu nène, so Seir be ètoa tamè,
E klɛ̃ na wo, so kaka Paràn be ètoa tamè ke;
va ɖo Meribà, lè Kadɛs-nyigbã ji.
E va ɖo yebe dùkɔ̃a gbɔ ku àtikplɔtɔ àkpe-àkpewo,
eye be le èzò be èsea ɖo ɖùsi-lɔ mè.
3Ɛ̃ɛ Tɔhonɔ̀, èwò kè lɔ̃ Izràɛl be kɔ̀tawoa,
àmè kɔ̀kɔ̀ɛwo kpata lè àpo àlɔ̀ mè.
Woawo ya, wo lè àpo àfɔ̀nu,
le xɔ̀ àpo ɖoɖowo.
4Èse kè Mosè ŋlɔ̀ na mia,
nyi àdɔ̀kùnu xɔ̀ àsì kè be sɔ do àsi na Yakɔb be jìjimèviwoa,
5eye, kè dùkɔ̃a be àgbònùglawo
ku Izràɛl be kɔ̀tawo va bɔ̀a,
Yesùrun#33.5 Izràɛl dùkɔ̃a be nyikɔ bu ye nyi Yesùrun kpɔ yebe èfìɔ kè nyi Tɔhonɔ̀a
6Rubɛ̀n ne nɔ̀ àgbè tɛ̀gbɛ̀, mu gbà ku ò,
eye yebe xòmèa ne jì ɖo e ji kpe è.”
7Kuefã kè Mosè wɔ̀ ɖo Yudà be kɔ̀taa taa, ye nyi ekèa be: “Tɔhonɔ̀, ɖo èto Yudà be ègbè;
gbìgbɔ̀ kplɔ̀ ɛ̀ va yebe dùkɔ̃a gbɔ!
Ye ŋutɔ be àlɔ̀wo ne hlùɛ̃ ye ɖokoe gã,
vɔ̀a, wò ŋutɔ, nyi yebe àlɔ̀do, kpã ŋùkɔ̀ yebe kɛ̃tɔwo.”
8Ɖo Levì be kɔ̀taa taa, Mosè gblɔ̃ be:
“Tɔhonɔ̀, àmè kè wɔ̀ ànùkua na wòa, ye wò sɔ àpo Tumìm ku Urìm#33.8 Tumìm ku Urìm nyi èdɔwɔ̀nu ɖe kèwo hũbonɔwo so biɔna ènyà Mawu do àsi na.
Wò do yebe jìjimèviwo kpɔ, lè Masà#33.8 Lè Hebrùgbe mèa, “Masà” gɔ̃mè ye nyi “Dodokpɔ”,
eye wɔ̀ kplɔ̀ wo to àjrèwɔ̀wɔ mè, lè#33.8 Lè Hebrùgbe mèa, “Meribà” gɔ̃mè ye nyi “Àjrèwɔ̀wɔ”. Meribà be èsìa gbɔ#33.8 Kpɔ Tot 17.1-7; Hɛ̃h 20.1-13.
9Woawo ye ɖè woabe ànùkua wɔ̀wɔ fiɔ wò,
wàlɛbɛ kè wo mu kpɔ ètɔ, àlo, ènɔ̀ ò,
wàlɛbɛ kè wo mu kpɔ nɔ̀vi, àlo, èvi ò.
Wo le ènyà wòa ɖo àsi,
eye wo kù ɖo zòɖùɖu wòa ŋuti#33.9 Kpɔ Tot 32.25-29.
10Woawo ye sɔ àpo ɖoɖowo sɔ fiɔnu Yakɔb,
eye wo sɔ àpo èsewo sɔ fiɔnu Izràɛl,
wo tɔnazò lifi kèwo huɛ̃na gbligbligblia,
sɔ wɔ̀nà vɔsa blibo na wò, lè vɔsakpe wòa ji.
11Tɔhonɔ̀, na woa gbà sɛ̃ŋu kpe è;
tusì na woabe àlɔ̀nu-dɔwo kpata;
ŋɛ̃ àlì na woabe kɛ̃tɔwo keŋu,
eye àmè kèwo keŋu crì woa,
ne ci ànyigbã, wo mu gbà sitè gbèɖe ke ò.”
12Ɖo Bɛnyamìn be kɔ̀taa taa, Mosè gblɔ̃ be:
“Tɔhonɔ̀ be lɔ̃lɔ̃tɔ ye Bɛnyamìn nyi.
E gã, wàlɛbɛ kè be cɔ̃ àkɔ
ɖo Tɔhonɔ̀ kè kpɔna e ta gbè sia gbèa gbɔ,
eye be va nɔ̀nà Bɛnyamìn be ètokɔ̃ɛ̃wo dòmèa#33.12 Yèruzàlɛm be èdùa lè Bɛnyamìn be ànyigbã ji. Ziɔ̀n be ètoa ye Tɔhonɔ̀ sɔ wɔ̀ yebe nɔ̀pe..”
13Ɖo Yosɛ̀f be kɔ̀taa taa, Mosè gblɔ̃ be:
“Tɔhonɔ̀ ne tusì na Yosɛ̀f be ànyigbãa;
ànyigbã kèa ne xɔ̀ jiŋùkusi bè ènu nana nyuɛ̃tɔawo,
àhũ fàfa ku èsì kè le gbɔ̃jɛ̃ lè ègũ mèa.
14Ne xɔ̀ ènuku kè nyɔ wu kèwo keŋu èwè nanaawo,
ku kèwo keŋu mìɔ̃nà, ne wètri yeye jè èjia.
15Ne xɔ̀ ènu nana xɔ̀asì kèwo tona so blèmà be ètowo mèa,
ènu ɖùɖu kè ànyigbã sɔ nyìnà ètokɔ̃ɛ̃ do àmàwo kòkòkòa.
16Ne xɔ̀ ènu nyuɛ̃ kèwo keŋu ɖɔ ànyigbã kèa jia be nyuɛ̃tɔawo,
ku àmè kè ze lè ègbe mumu kè bìzòa mèa be màje,
Ènu kèawo keŋu ne nyi jègbà, lè èta na Yosɛ̀f,
e ye kè xɔ̀ àmìsìsi, sɔ kplɔ̀ nɔ̀via kpɔ̀tɛwoa.
17Gogo na Yosɛ̀f, yebe ènyìsuvi, ŋùkɔ̀gbevia!
Ètò be àzòwo ye lè èta na ɛ̀.
E sɔ tùnà dùkɔ̃wo keŋu ɖoɖu,
kaka yì ànyigbã be ènukpòpewo keŋu.
Àzòa ɖèka nyi Manasè be àmè èkàwìvɔàtɔ̃wo,
èbu nyi Efràyim be àmè hotu àtɔ̃wo.”
18Mosè gbà gblɔ̃ ɖo Zabulɔ̀n ta be:
“Zabulɔ̀n, kpɔ jìjɔɛ, lè àpo àsìsàsa be èmɔ̃zɔ̃zɔ̃wo ji, lè àpù ji#33.18 Kpɔ Gɔ̃m 49.13
Èwò Isakàr, sò àyo lè àpo gòxɔwo mè.
19Mì la yɔ dùkɔ̃wo va ètoa ji,
va àfi kè mì la wɔ̀ vɔsa kè Tɔhonɔ̀ ɖo na mì lèa,
ɖoa, àpù ji ye mìabe àdɔ̀kùnuwo so,
ku àdɔ̀kùnu kèwo Tɔhonɔ̀ wla ɖo èkɔ mèa#33.19 Èkɔ ye wo sɔ wɔ̀nà kɔpò, àtùkpã ku klisì be àgbãwo.”
20E yomè a, Mosè gblɔ̃ ɖo Gad be kɔ̀taa ta be:
“Kàfù Kafu na Tɔhonɔ̀ kè na Gad, nɔ̀pe kè kèkèa!
E cɔ̃ àkɔ ànyi, sìgbè jãŋùta nène,
e sɔ̀gbè, la vũvũ yebe àdè be èlãa, so àfɔ̀ gbɔ, kaka yì èta gbɔ.
21E dà ŋùkuvi ɖo ànyigbãwo ji,
eye be cã àkpa kè nyi àtikplɔa tɔ̀a.
E gla lè èfìɔwo dòmè,
eye be jè Tɔhonɔ̀ be jɔ̀jɔɛwɔ̀wɔa gɔ̃mè.
Yebe ènyà sòsòwo keŋu dɔ̃ Izràɛl ji.”
22Mosè gblɔ̃ ɖo Dàn ta be:
“Dàn nyi jãŋùta be èvi,
e tìkpo so Basàn be ànyigbã ji.”
23Mosè gbà gblɔ̃ ɖo Neftalì be kɔ̀taa ta be:
“Nyɔna la ɖɔpò na Neftalì,
Tɔhonɔ̀ be sìtu sù e si fuu.
Ne kèkè yebe ànyigbãwo yì èwèɖoxɔ̀pe ku àpùgo, ne bèa ɖo àlɔ̀ woa ji.”
24Mosè gblɔ̃ ɖo Àsɛr be kɔ̀taa ta be:
“Tɔhonɔ̀ ne tusì na Àsɛr, lè èviwo keŋu dòmè!
Yakɔb be èviwo keŋu be lɔ̃lɔ̃ ne nɔ̀ Àsɛr ŋuti,
eye yebe àfɔ̀ ne tɔ àmì mè.
25Gàyìbɔ ku gàjɛ̃ wo la sɔ tu àpo èdù be àgbowo,
eye àpo ŋusɛ̃ la nɔ̀ ànyi dìdiɖe,
sìgbè àpo àgbè ŋùkèkèwo ke nène.
26Àmè ɖekpe mu lè sìgbè Mawu nène ò,
Mawu kè le do jiŋùkusi ku lilikpowo,
sìgbè èsɔ nènea, la va hlùɛ̃ wò gã.
27Blèmà Mawu a, bèbèpe ye be nyi.
Àbɔ kè le wɔ̀ àvũ, so kaka gbè ɖe gbè, lè ànyigbã jia ye be nyi.
E ye nyà kɛ̃tɔwo lè ŋùkɔ̀ na wò,
eye be gblɔ̃ be: 'Crɔ̃ àmè!'
28Izràɛl la gbɔ̃jɛ̃ ku àgbɔ̃ jèpò.
Yakɔb be ètɔ̀a la nɔ srà kpoo, lè àkpa ɖèka;
tùtà èdù ɖe kè mè èlù ku àhà yeye bɔ ɖoa.
Jiŋùkusi ŋutɔ cã hlɛ̃na àhũ ɖo e ji.
29Nyɔna lè ji wò, Izràɛl!
Dùkɔ̃ kè Tɔhonɔ̀ hlùɛ̃ gãa,
àmè kɛ ye lè sìgbè èwò nène ò?
Tɔhonɔ̀ ye nyi àkpoxɔ̀nu kè va xɔ̀nà na wòa.
Tɔhonɔ̀ ke ye nyi èwui kè nyi àpo ŋusɛ̃a.
Èkɛ̃tɔ wòwo teŋu nyi àmèflùtɔ kèwo bi, ɖo ŋuti wò fàa;
woabe èdùwo ku woabe ètowo keŋu la nyi àpo àfɔ̀ɖojinu.
Currently Selected:
Èsea gbìgbɔ̀ hlɛ̃ 33: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
