Èsea gbìgbɔ̀ hlɛ̃ 23

1Àmè ɖekpe mu la dɔ̃ ku ètɔa be èsrɔ̃ ò; eye àmè ɖekpe mu ɖo la klo àvɔ lè ètɔa be èsrɔ̃ ŋuti ò#23.1 Kpɔ Lev 18.8; 20.11. Lè ŋɔ̀ŋlɔ̃ ɖewo mèa, hɛ̃hlɛ̃ 1-26 va lè 22.30-23.25 tèpe.

Tɔhonɔ̀ be èhabɔ̀bɔa

2Ŋusù kè wo ta, àlo kè wo sò èvo jo na a mu la teŋu kpɔ èmɔ la nɔ̀ Tɔhonɔ̀ be èhabɔ̀bɔa mè ò.

3Àmè kè nyi àhasìvia mu la teŋu nɔ̀ Tɔhonɔ̀ be èhabɔ̀bɔa mè ò. Yebe jìjimèviwo cã mu la teŋu ɖo e mè, kaka na jìjimè èwogɔ̃a ò#23.3 Kpɔ Lev 18.6-20; 20.10-21. Kè Yudàvi àhùalewo gbɔ̀ so ègbejia, àmè kèwo ɖè èdù bu mètɔwoa be èviwo cã nɔ̀ na Yudàviwo sìgbè àhasìviwo nène (Zak 9.6; woa gbà kpɔ Neh 13.1-2; 23-28). 4Amɔ̀nìtɔ ku Mòabtɔwo#23.4 Kpɔ Gɔ̃m 19.37-38 mu la ɖo Tɔhonɔ̀ be èhabɔ̀bɔa mè ò. Woabe jìjimè èwogɔ̃a ŋutɔ cã mu la teŋu kpɔ èmɔ, la ɖo Tɔhonɔ̀ be èhabɔ̀bɔa mè ò. 5Ɖoa, wo mu sɔ ènu ɖùɖu ku èsì va dogò mì, kè mì lè èmɔ ji, so Ejiptè-nyigbã ji gbãnà a ò; wo gbà dà Bìleam, Beɔ̀r kè so Petɔ̀r lè Mɛ̀zòpotamìa-nyigbã jia be èvi ɖo mìa ŋuti, be ne sɛ̃kpɛ̃ na mì. 6Vɔ̀a Tɔhonɔ̀, àpo Mawu mu ɖo èto Bìleam ò, Tɔhonɔ̀, àpo Mawu trɔ kpɛ̃sɛ̃a zũ sìtu na wò, ɖoa, Tɔhonɔ̀ àpo Mawu lɔ̃ wò ŋutɔ#23.6 Kpɔ Hɛ̃h 22-24. 7Kaka kè wò lè àgbèa, wò mu la ji woabe ŋuti fàfa, àlo woabe nyɔna gbèɖe ò.

8Wò mu la kpɔ Edɔ̀mtɔ be e nyi àmè nyɔŋu ò, ɖoa, nɔ̀vi wò ye be nyi. Nène a ke ye wò mu la kpɔ Ejiptètɔ be e nyi àmè nyɔŋu ò, ɖoa, wò nyi àmèjro, nɔ̀ woabe ànyigbã ji kpɔ. 9Woabe jìjimè ètɔ̃gɔ̃a mèviwo la teŋu ɖo Tɔhonɔ̀ be èhabɔ̀bɔa mè fàa.

Àsàɖaa mè be kɔ̀kɔ̀ɛ nɔ̀nɔ

10Ne wò do àsàɖa, kpã ŋùkɔ̀ àpo kɛ̃tɔwo, lè àhùagbe jia, kpɔ nyuɛ̃ ɖe be wò mu gbà wɔ̀ ènu ɖe kè la na be ŋuti wò mu la kɔ̀ ò. 11Ne e va e mè be gbãdãgbã ɖe lè ku wò, kè ŋuti mu kɔ̀ ò, ɖoa, wàlɛbɛ kè be le kudrɔ̃ lè èzã mèa, e va na àfɔ̀a, e la to lè àsàɖaa mè, eye mu la gbà ɖo e mè kè ò. 12Ne wètrɔ le gogoa, gbãdãgbãa la lè èsì, eye ne èwè ɖo èxɔ̀ vɔ̀a, e la trɔ va ɖo àsàɖaa mè.

13Wò la jrà tèpe ɖe ɖo, lè àsàɖaa godo, funua ye wò la nɔ yì àfɔ̀ji lè. 14Wò la kpà àti ɖe ɖo àgbã wò mè; wò la sɔ nɔ kù èdo, eye ne wò yì àfɔ̀ji vɔ̀a, wò la nɔ kù èkɔ cɔ̃ èmia. 15Àpo àsàɖa mè ɖo la nyi tèpe kè ŋuti kɔ̀a, ɖoa, Tɔhonɔ̀ àpo Mawu ŋutɔ le yì, le gbɔ̀, sɔ le kpɔ ji wò, lè àpo àsàɖaa mè, ne bèa nɔ sɔ kɛ̃tɔ wòwo nɔ do àsi na wò. Tɔhonɔ̀ mu ɖo la kpɔ àfɛ̃nu ɖekpe lè àsàɖaa mè ò. Ne mu nyi nène ò a, e la trɔ lè yomè na wò.

Kluvi kè sia

16Ne kluvi ɖe si jo lè àpetɔa gbɔ, va ci gbɔ wòa, wò mu la kplɔ̀ ɛ̀ do àsi na àpetɔa ò. 17Gbɔ wò ye be la nɔ̀, lè mìa dòmè, lè tèpe kè be la cã lè mìabe èdùwo dòmè, be yèa nɔ̀, na yèbe nyɔnaa. Wò mu la tɛ ɛ̀ ɖoto ò.

Vòdu sɛ̃sɛ̃ be àhasì

18Vòdu mè be gbòlò ɖekpe mu la nɔ̀ Izràɛl nyɔ̃nùviwo dòmè ò. Vòdu mè be àhasìtɔ ɖekpe mu la nɔ̀ Izràɛl ŋusùwo dòmè ò#23.18 Kpɔ Lev 19.29; Yer 2.20. Ekèa nyi vòdu buwo be sɛ̃sɛ̃ ku Mawu sɛ̃sɛ̃ ɖodu, àlo vòduwo be sɛ̃sɛ̃. 19Nyɔ̃nù àlo ŋusù ɖekpe mu la sɔ àhasì wɔ̀wɔ be èci va ɖè àjɔ̀gbè lè Tɔhonɔ̀, àpo Mawu be àxomè ò. Ɖoa ekèa nyi ènu nyɔŋu na Tɔhonɔ̀, àpo Mawu.

Ègà jì-gà dodo

20Wò mu la do ènu ɖekpe kè la jì ɖo e jia na nɔ̀vi wò: wò mu la do ègà na ɛ̀ ò; wò mu la do ènu ɖùɖu na ɛ̀ ò; wò mu la do ènu ɖekpe, kè la jì ɖo e ji, wàlɛbɛ kè be la tu ìa ò. 21Wò la do ègà jì-gà na àmèjro fàa, vɔ̀a, wò mu la do è na nɔ̀vi wò ò, ne Tɔhonɔ̀, àpo Mawu ne tusì na wò, lè àpo àlɔ̀nudɔwo kpata mè, lè ànyigbã kè ji wò le yì, ne bèa nyi tɔ̀wòa ji#23.21 Kpɔ Tot 22.24; Lev 25.36-37.

Àjɔ̀gbèwo

22Ne wò fìã àjɔ̀gbè na Tɔhonɔ̀ àpo Mawu a, wɔ̀ ɖo e ji kaba, ne mu nyi nène ò a, Tɔhonɔ̀, àpo Mawu la va biɔ wò yebe èfɛ̃; ekèa la va nyi èvuɛ̃ na wò. 23Vɔ̀a, ne wò mu fìã àjɔ̀gbè ò a, mu la nyi àgɔ̀jèje na wò ò. 24Gãkea, ne ènu ɖe gbe to lè ènu mè na wò kpòa, kpɔ e gbɔ be wòa wɔ̀ ɖo e ji, zɔ̃ ɖo àjɔ̀gbè kè wò fìã ku àpo ènu, lè ɖokoe wò si na Tɔhonɔ̀, àpo Mawu a.

Àtikusɛ̃sɛ̃ gbãgbã ɖù

25Ne wò ɖo nɔ̀vi wò be vɛ̃-gble mèa, wò teŋu ɖù vɛ̃ku sɛ̃sɛ̃wo lekè be jro wò ɖoa fàa, be la sù wò; vɔ̀a, wò mu la gbã èku sɛ̃sɛ̃awo, la lɔ wo jo ò. 26Ne wò va èhavi wò be àgblè mè, eye wo le yà nukuwoa, wò teŋu sɔ àlɔ̀ ŋɛ̃ èbli, àlo èlù fàa, vɔ̀a, wò mu la sɔ àgɔ̃, la sɔ yà nuku lè èhavi wò be àgblè mè, sɔ jo ò.

Currently Selected:

Èsea gbìgbɔ̀ hlɛ̃ 23: GEN

Highlight

Copy

Compare