Èsea gbìgbɔ̀ hlɛ̃ 24

Èsrɔ̃ gbegbe ku èsrɔ̃ gbìgbɔ̀ ɖè

1Ne ŋusù ɖe ɖè nyɔ̃nù, eye be nyi èsrɔ̃a, vɔ̀a e va kpɔ ènu ɖe le nyɔ̃nùa gbɔ, kè le wɔ̀ ŋùkpɛ̃ na ɛ̀, eye mu gbà le kpɔ nyɔ̃nùa gbɔ ò a, ne ŋusù ŋlɔ̀ xoma, na nyɔ̃nùa, sɔ gbe èa, 2ne nyɔ̃nùa jo lè ŋusùa gbɔ, yì ɖè àmè bua, 3ne ŋusù èvègɔ̃ kèa cã mu gbà va le lɔ̃ ɛ̀ ò, eye, be ŋlɔ̀ xoma na nyɔ̃nùa, sɔ gbe èa, eye be ɖè è to, àlo, ne ŋusù èvègɔ̃ kè ɖè èa kua, 4èsrɔ̃a cucugbãtɔ̀ kè ɖè àsi lè e ŋutia mu la gbà teŋu xɔ̀ ɛ̀ ɖè, kè e ŋuti mu gbà kɔ̀ ò. Ènu kèa nyɔnaŋu na Tɔhonɔ̀. Mì mu la sɔ ànyigbã kè Tɔhonɔ̀, mìabe Mawu sɔ wɔ̀ ècrɔ̃nu na mìa do èvuɛ̃ mè ò.

Èsrɔ̃dètɔ yeye

5Ne àmè ɖe ɖè èsrɔ̃, ye tèpe mu dìdì ò a, mu la yì àhùa ò. Àmè ɖe mu la va kpɔ ɛ̀ ku ènyà ɖe ò. Wo la ɖè ènyà sia ènyà lè èkɔ̀ na ɛ̀, ne bèa nɔ̀ àxomè, la do jìjɔɛ na nyɔ̃nù kè be ɖèa.

Àwòba-nu

6Wo mu la sɔ ètenùvi, àlo ète do àwòba ò; àmè kè tɔ̀ wo sɔa be àgbè blibo ye wo le xɔ̀ àwòba ŋua.

Ne wo le Izràɛlvi ɖe a

7Ne àmè ɖe le nɔ̀via Izràɛlvi ɖe, sɔ sà, xɔ̀ ègàa, àmè kè le àmè sàa, èku ye be la ku. Nène a, mì la ɖè èvuɛ̃ to lè mìa dòmè#24.7 Kpɔ Tot 21.16..

Èkpò be èdɔ̀lele

8Mì kpɔ nyuɛ̃ ɖe so èdɔ̀lele kèwo nyi èkpò-dɔ̀ hatiwoa ŋuti. Ekèa ŋutia, mì ɖo la nɔ ɖo èto ènu kèwo keŋu Levì, hũbonɔwo la nɔ fiɔ mìawo#24.8 Kpɔ Lev 13-14. Mìa jè àgbàgba, ne mìa nɔ zɔ̃ ɖo ɖoɖo kèwo mù sɔ do woa si na mìawo nu. 9Mìa ɖoŋù ènu kè Tɔhonɔ̀, mìabe Mawu wɔ̀ ku Mirìam, kè mì lè èmɔ ji so Ejiptè gbãnàa#24.9 Kpɔ Hɛ̃h 12.10.

Àwòba-nu be èsewo

10Ènu ɖekpekpe kè mì do na mìa nɔ̀via, mì mu la ɖo yebe àxomè, la yì sɔ àwòba-nu ɖe ò. 11Àgbo ji ye mì la nɔ̀, eye, àmè kè mì do ènua na a, la sɔ àwòba-nua to va na mì. 12Ne wɔ̀amènɔ̀ ye àmèa nyia, àwòba-nua mu la ci mìa gbɔ, èŋù la kè ò. 13Mì ɖo la trɔ yebe àwòba-nua gbɔ̀ va na ɛ̀, gbɔ̀xue èwè ne ɖoxɔ̀. Ne yebe àwù gã ye à, ne e do è, sɔ mlɔ̃ ànyia, e la tusì na mì, eye mì wɔ̀ ènu jɔ̀jɔɛ lè Tɔhonɔ̀, mìabe Mawu be ŋùmè#24.13 Kpɔ Tot 22.25-26.

Bùbu na wɔ̀amènɔ̀wo

14Mì mu la tafu wɔ̀amènɔ̀ kè nyi ŋuzĩzĩme le wɔ̀ èdɔ na mìa ò. Ne e nyi nɔ̀vi wò, àlo àmèjro kè lè mìabe ànyigbã ji, àlo, lè mìabe èdùwo mèa, mì mu la tafu ì ò. 15Mì la nɔ tu yebe èdɔwɔ̀fɛ̃ na ɛ̀, gbè kè gbè be wɔ̀dɔa ke; èzã mu la do do yebe fɛ̃tu ò. Ɖoa, èhìãtɔ ye be nyi, ekèa ŋuti be le ciji, le nɔ̀tè kpɔ yebe fɛ̃tua ɖo. Mu la do àpa ɖo èta na mì, ɖoɖa Tɔhonɔ̀, gbɔ̀xue la xɔ̀ ɛ̀ ò; ne mu nyi nène ò a, mìawo ye la jè àgɔ̀ do Tɔhonɔ̀#24.15 Kpɔ Lev 19.13..

Àmè sia àmè la nɔ̀ ènu kè be wɔ̀a nu

16Wo mu la wù èvitɔwo ɖo ènu kè woabe èviwo wɔ̀a nu ò. Nène a ke ye wo mu la wù èviwo ɖo ènu kè woa tɔ wɔ̀a nu ò. Ne wo ɖo la wù àmè ɖe a, ye ŋutɔ be èvuɛ̃wo ŋuti ye wo la wù ì ɖo.

Wɔ̀amènɔ̀wo

17Wò mu la trɔ èta do ègũ na àmèjro, àlo ècɔɛ̀vi be ènyà jɔ̀jɔɛ ò. Wò mu la xɔ̀ àhòsì be àwù, àlo àvɔ àwòba-nu ò. 18Wò la nɔ ɖoŋù be wò nyi kluvi lè Ejiptè-nyigbã ji sãa, vɔ̀a Tɔhonɔ̀, àpo Mawu xɔ̀ wò plè, so funua. Ekèa ŋuti mù le ɖè ègbè na wò be wòa zɔ̃ ɖo ènyà kèa ji.

19Ne wò le yà nukuwo lè àpo àgblè mè, eye wò ŋlɔ̀ èɖewo be, ɖo àgblèa mèa, wò mu la trɔ va cã wo ò. Àmèjrowo, ècɔɛviwo ku àhòsìwo tɔ̀ ye wo la nyi, àleke be Tɔhonɔ̀, àpo Mawu ne tusì na wò, lè àpo wɔ̀nawo keŋu mè. 20Ne wò sɔ àti va gbã èkusɛ̃sɛ̃wo lè àpo àmìtiwo jia, wò mu la trɔ va, sɔ àlɔ̀ kɛ̃ kpɔ̀tɛawo ò. Ekè la kpɔ̀tɔ̀a, la nyi àmèjrowo, ècɔɛviwo ku àhòsìwo tɔ̀. 21Ne wò yà nukuwo, lè àpo vɛ̃-gble mèa, wò mu la trɔ va kɛ̃ ekèwo kpɔ̀tɔ̀awo ò. Wo la nyi àmèjrowo, ècɔɛviwo ku àhòsìwo tɔ̀#24.21 Kpɔ Lev 19.9-10; 23.22. 22Wò la nɔ ɖoŋù be wò nyi kluvi lè Ejiptè-nyigbã ji va yì. Ekèa ŋuti mù le ɖè ègbè na wò be wòa zɔ̃ ɖo ènyà kèa ji ɖo.

Currently Selected:

Èsea gbìgbɔ̀ hlɛ̃ 24: GEN

Highlight

Copy

Compare