Èsea gbìgbɔ̀ hlɛ̃ 17

1Mì mu la sɔ ènyì, àlo àlɛ̃ kè ŋuti èdɔ̀lele ɖe lè, àlo, kè ŋuti ènu ɖe hùetè lèa, savɔ na Tɔhonɔ̀, mìabe Mawu ò, ɖoa, e nyi ènu nyɔŋu na Tɔhonɔ̀, mìabe Mawu a.

2Ne ŋusù ɖe, àlo nyɔ̃nù ɖe lè mìa dòmè, lè èdù kèwo Tɔhonɔ̀, mìabe Mawu sɔ na mìawo mè, kè le wɔ̀ ènu kè nyrã lè Tɔhonɔ̀, mìabe Mawu be ŋùmè, eye be le dà Tɔhonɔ̀ be èzòɖùɖua jia, 3ne e yì sumɔ vòduwo, eye be do èta gũ na woa, ne e do èta gũ na dɔ̃ŋùkusu, wètri, àlo jiŋùkusi be àhùakɔ̃ bliboa sɔ wɔ̀ ènu kè mù gbea, 4ne wo gblɔ̃ ènyà kèa na mì, àlo, ne mì sè, wo gblɔ̃ ɛ̀a, mì la kù ènu mè kito-kito, eye ne è nyi nyàwo be ènu nyɔŋu ŋua jɔ̀ lè Izràɛl-nyigbã jia, 5mì la kplɔ̀ ŋusù, àlo nyɔ̃nù kèwo wɔ̀ ènu nyɔŋu kèa to yì èdùa be àgbo nu, eye mì la pò wo èkpe wù#17.5 Kpɔ Lev 24.14; Dɔw 7.58; Heb 13.12.

6Keŋu gbɔ̀xue woa wù àmèa, e lè veveɖe be woa sè ɖaseɖùɖu lè àmè èvè, àlo ètɔ̃ nu, gbɔ̀xue woa wù àmè kè wo ɖo la wùa. Wo mu la wù àmè, lè àmè ɖèka kpò be ɖasedùɖu nu ò. 7Ɖàsèfoawo ye la pò èkpe àmèawo cucugbãa, gbɔ̀xue dùkɔ̃ bliboa la dà èkpea. Nène a ye mì la nɔ ɖè èvuɛ̃ to lè mìa dòmèa yeŋu#17.7 Kpɔ 1Kɔr 5.13.

Kòjo kèwo wo la ɖo lè Kɔ̀kɔ̀ɛpea

8Ne èhlɔ̃dãdã be kòjo, àlo, èhũ kɔ̀ ɖɛ be kòjo, àlo, àjrè, àbì do àmè ŋuti be kòjo ɖe ɖoɖo sɛ̃ŋu, eye be hɛ̃ ènyàdɔ̃dɔ̃ va, lè èdùa be kòjoɖopea, mì la jè èmɔ tùtà tèpe kè Tɔhonɔ̀, mìabe Mawu cã be yèa sɔ yèbe nyikɔ ɖoa. 9Mì la yì kpɔ Levì kèwo nyi hũbonɔwo ku kòjoɖotɔ kèwo ye lè èdɔa nu, hùe ŋua nua, mì la kpɔ wo, eye wo la sò kòjoa na mì. 10Mì la zɔ̃ ɖo kòjo kè wo sò, lè tèpe kè Tɔhonɔ̀, mìabe Mawu cã be yèa sɔ yèbe nyikɔ ɖoa ji, eye mìa kpɔ e gbɔ be mìa wɔ̀ ɖo ɖoɖo kè wo na mìa ji. 11Mì la wɔ̀ ɖo ɖoɖo kè wo do àsi na mì, ku kòjo kè wo sò na mìa nu, eye mì mu la trã èmɔ, yì ɖùsi mè, àlo, èmìɔ̃ mè, lè ènyà kè wo gblɔ̃ na mìa ŋuti ò. 12Vɔ̀, ne àmè ɖe sɔ ye ŋutɔ be jajra be susuwo, gbe be yè mu la ɖo èto hũbonɔ kè le wɔ̀dɔ na Tɔhonɔ̀, mìabe Mawu ò, gbe be yè mu la ɖo èto kòjoɖotɔa ò, eye be wɔ̀ ènu kè jro èa, àmè ŋua, mì la wù ì. Nène a, mì la ɖè èvuɛ̃ to lè Izràɛlviwo dòmè. 13Ne dùkɔ̃ bliboa sè a, vɔ̃vɔ̃ la ɖo wo, eye èzò mu la gbà blè àmè ɖe, be la gbà zã jajra be àgbè ŋua ò.

Èse kèwo kã èfìɔa

14Ne mì ɖo ànyigbã kè Tɔhonɔ̀, mìabe Mawu sɔ le na mìa ji, eye mì ɖo àlɔ̀ e ji vɔ̀a, ne mì va gblɔ̃ be: 'Mi jro be mia ɖo èfìɔ, ne bèa nɔ kplɔ̀ mi, sìgbè lekè be lè lè dùkɔ̃ kèwo trɔ do miawo mèa nènea'#17.14 Kpɔ 1Sam 8.5. 15Eŋuã, àmè kè mì la ɖofìɔ ɖo mìa nua, ɖo la nyi èfìɔ kè Tɔhonɔ̀ mìabe Mawu ŋutɔ la cã a kòkòkò. Ne mì la ɖofìɔa, mìa nɔ̀viwo dòmè ye mì la sɔ àmè lè, ɖo mìa nu; mì mu la teŋu sɔ àmèjro kè mu nyi mìa nɔ̀vi ò a ɖo mìa nu ò. 16Ɖe kpò èsɔ sùgbɔ mu ɖo la nɔ̀ e si, àlo, bèa na dùkɔ̃a ne trɔ yì Ejiptè, la yì ji èsɔ sùgbɔ#17.16 Kpɔ 1Èfìɔ 10.26-28; 2Kro 1.14-16; 9.25-28, ɖoa, Tɔhonɔ̀ gblɔ̃ na mì be: 'Gbèɖe, mì mu la gbà trɔ to èmɔ kèa ke ò!' 17Èfìɔa mu ɖo la ɖè èsrɔ̃ sùgbɔ ò; ne mu nyi nène ò a, ekèa la trɔ ɛ̀ lè Tɔhonɔ̀ be èmɔ ji. Mu ɖo la ɖo ègà ku sìka wunu ò#17.17 Kpɔ 1Èfìɔ 11.1-8; Klòsalò ku sìkaKpɔ 1Èfìɔ 10.14-27; 2Kro 1.15; 9.13-27.

18Ne e va èfìɔzìkpea jia, èfìɔa la ŋlɔ̀ èse kèa be ènyà kèwo Levìwo be hũbonɔwo la va sɔ do àsi na ɛ̀a ɖo xoma ɖe mè, na ye ɖokoe. 19Èfìɔa la lebè na èsea, ɖo ye ɖokoe gbɔ, eye be la nɔ hlɛ̃ ɛ̀, lè yebe àgbè ŋùkèkèwo keŋu ji, la sɔ kpla lekè be la nɔ si Tɔhonɔ̀, yebe Mawu ɖoa, ne bèa nɔ wɔ̀ ɖo èsea be ènyàwo ku ɖoɖoawo keŋu ji, 20àleke be jajra mu gbà va ɖɔ ɛ̀, lè nɔ̀viawo be ŋùkɔ̀, ne bèa va trã èmɔ, yì ɖùsi mè, àlo, èmìɔ̃ mè na èsea ò, ne ye ku èviawo, woa teŋu nɔ̀ èfìɔzìkpea ji dìdiɖe, lè Izràɛlviwo dòmè.

Currently Selected:

Èsea gbìgbɔ̀ hlɛ̃ 17: GEN

Highlight

Copy

Compare