Èsea gbìgbɔ̀ hlɛ̃ 16

Toŋutivayì be àzã

1Mìabe ŋùkuviwo ne nɔ̀ nukuyàya be wètria ji, ne mìa nɔ ɖù Toŋutivayì be àzãa na Tɔhonɔ̀, mìabe Mawu, ɖoa, nukuyàya hùenu ye Tɔhonɔ̀, mìabe Mawu ɖè mì to so Ejiptè be ànyigbã ji, èzã mè. 2Mì la sɔ àlɛ̃, ègbɔ ku ènyì nɔ wɔ̀ Toŋutivayì be vɔsaa na Tɔhonɔ̀, mìabe Mawu, lè tèpe kè Tɔhonɔ̀ cã be yèa sɔ yèbe nyikɔ ɖoa. 3Lè vɔsa kèa mèa, mì mu la ɖù mawɛ huãhuã be ènu ɖùɖu ɖekpe ò. Mì la ɖù kpɔ̃nɔ àkpiti, ŋùkèkè adrɛ̃, kpɔ̃nɔ àkpiti kè nyi àyàɖùɖu be ènu ɖùɖua, ɖoa kpàtà ye mì hɔ̃ jo lè Ejiptè be ànyigbã ji. Mì la nɔ wɔ̀ ekèa, ne mìa sɔ nɔ ɖoŋù gbè kè gbè mi jo lè Ejiptè be nyigbã jia, mìabe àgbè ŋùkèkèwo kpata. 4Ŋùkèkè adrɛ̃ kèawo mèa, wo mu la kpɔ mawɛ huãnu lè mìa gbɔ, lè mìabe ànyigbã bliboa ji ò. Èlã kè mì wù àzãa be ŋùkèkè cucugbãa be wètrɔ mèa, ɖo la vɔ̀ gbè ŋua gbè ke, eye, èŋù mu la kè do è ò. 5Mì mu kpɔ èmɔ la wɔ̀ Toŋutivayì be vɔsaa, lè èdù kèwo Tɔhonɔ̀, mìabe Mawu sɔ na mìawo dòmètɔ ɖekpekpe mè kpò ò. 6Tèpe kè Tɔhonɔ̀, mìabe Mawu cã, be yèa sɔ yèbe nyikɔ ɖoa, kpò ye mì la wɔ̀ Toŋutivayì be vɔsaa lè, wètrɔ mè, ne èwè le ɖoxɔ̀a, wàlɛbɛ kè tututu mì to lè Ejiptètɔwo be ànyigbã jia. 7Mì la wù èlãa, eye mì la ɖù ì, lè tèpe kè Tɔhonɔ̀, mìabe Mawu cã a, eye, ne èŋù kèa, mì la trɔ tùtà mìabe gòxɔwo mè. 8Mì la ɖù kpɔ̃nɔ àkpiti, ŋùkèkè àdɛ̃. Ŋùkèkè adrɛ̃ a gbèa ye la nyi àzã kè mì le ɖù na Tɔhonɔ̀, mìabe Mawu a be ènuwuwu. Mì mu la wɔ̀ èdɔ ɖekpe ò#16.8 Kpɔ Tot 12.1-20; Lev 23.5-8; Hɛ̃h 28.16-25..

Kuasiɖa adrɛ̃wo be àzã

9Mì la hlɛ̃ kuasiɖa adrɛ̃, eye, mì la tɔ kuasiɖa adrɛ̃ kèawo hɛ̃hlɛ̃, so gbè kè gbè mì tɔ nukuyàyaa jia. 10Eye mì la ɖù kuasiɖawo be àzã, sɔ do bùbu Tɔhonɔ̀, mìabe Mawu ŋuti. Mì la hɛ̃ ènu nana fàa va, ɖo lekè mì kpɔ be Tɔhonɔ̀, mìabe Mawu tusì na mì ɖoa nu. 11Mì la nɔ̀ jìjɔɛkpɔkpɔ mè ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo, mìabe sumɔ̃vi nyɔ̃nùwo, Levì kèwo lè mìabe èdùwo mèa, àmèjrowo, ècɔɛviwo kudo àhòsì kèwo ye lè mìa dòmèa, sɔ yì Tɔhonɔ̀ be ŋùkɔ̀, lè tèpe kè Tɔhonɔ̀, mìabe Mawu la cã be yèa sɔ yèbe nyikɔ ɖoa. 12Mìa nɔ ɖoŋù be mì nyi kluviwo kpɔ, lè Ejiptè, mìa le èse kèawo ɖo àsi, ne mìa nɔ wɔ̀ ɖo woa ji#16.12 Kpɔ Lev 23.15-21; Hɛ̃h 28.26-31..

Gòxɔwo be àzã

13Ne mì yà nukuwo keŋu vɔ̀, eye mì fiɔ̃ vɛ̃kuwo keŋu vɔ̀a, mì la ɖù gòxɔwo be àzã ŋùkèkè adrɛ̃. 14Mì la nɔ̀ mìabe àzãa be jìjɔɛkpɔkpɔ mè ku mìabe ŋusùviwo, mìabe nyɔ̃nùviwo, mìabe sumɔ̃vi ŋusùwo, mìabe sumɔ̃vi nyɔ̃nùwo, Levì kèwo lè mìabe èdùwo mèa, àmèjrowo, ècɔɛviwo ku àhòsì kèwo ye lè mìa dòmèawo, lè mìabe èdùwo mè. 15Mì la wɔ̀ ŋùkèkè adrɛ̃ be èmɔzɔ̃zɔ̃, sɔ do bùbu Tɔhonɔ̀, mìabe Mawu ŋuti, yì tèpe kè Tɔhonɔ̀, la cã a, ɖoa, Tɔhonɔ̀, mìabe Mawu la tu sì na mì, to mìabe àgblè-nukuwo ji, ku to mìabe wɔ̀nawo keŋu mè, àleke be jìjɔɛ mè kpò mì la nɔ̀.

16Èpè ɖekpekpe mèa, mìabe dùkɔ̃ mè be ŋusùwo keŋu la yì Tɔhonɔ̀, mìabe Mawu be ŋùku mè, lè tèpe kè be la cã a, zè ètɔ̃; wo la wɔ̀ ɛ̀, na kpɔ̃nɔ àkpiti be èmɔzɔ̃zɔ̃a, wo la wɔ̀ ɛ̀, na kuasiɖawo be àzãa, eye wo la gbà wɔ̀ ɛ̀, na gòxɔwo be àzãa. Àmè ɖekpe mu la yì Tɔhonɔ̀ be ŋùmè, àlɔ̀ gbalo ò. 17Àmè sia àmè la sɔ yebe àlɔ̀ savɔ, ɖo sìtu kè Tɔhonɔ̀, mìabe Mawu kɔ̀ ɖo e jia nu.

Èsewo na kòjoɖotɔwo

18Mì la ɖo kòjoɖotɔwo ku ènuŋlɔ̀tɔwo na mìabe kɔ̀tawo, lè èdù kèwo keŋu Tɔhonɔ̀, mìabe Mawu sɔ le na mìawo mè. Woawo ye la nɔ ɖo kòjo na dùkɔ̃a, lè jɔ̀jɔɛwɔ̀wɔ mè#16.18 Kpɔ Tot 23.3, 6-8; Lev 19.15. 19Mì mu la nɔ sò kòjo gɔ̃glɔ̃ ò; mì mu la nɔ kpɔ àmè be ŋùmè, la sɔ nɔ sò kòjo ò. Mì mu la xɔ̀ èzãnu ò, ɖoa, èzãnu gbãnà ŋùku na àɖàŋùɖètɔwo, eye be gblena àmè kèwo be ènyà jɔ̀awo be ènyà. 20Mì la nɔ ji jɔ̀jɔɛwɔ̀wɔ, eye, jɔ̀jɔɛwɔ̀wɔ kpò, mì la nɔ ji, ne mìa teŋu nɔ̀ àgbè, ne mìabe àsi ne teŋu sù ànyigbã kè Tɔhonɔ̀, mìabe Mawu sɔ le na mìa ji.

Vòdu sɛ̃sɛ̃ nyi èse

21Mì mu la ɖì vòdu Aserà be àti ɖekpe, na mìa ɖokoewo, ɖo vɔsakpe kè mì la tù na Tɔhonɔ̀, mìabe Mawu a gbɔ ò. 22Mì mu la wɔ̀ kpèli kèwo Tɔhonɔ̀, mìabe Mawu crì ŋuawo dòmètɔ ɖekpe, na mìa ɖokoewo ò.

Currently Selected:

Èsea gbìgbɔ̀ hlɛ̃ 16: GEN

Highlight

Copy

Compare