Èsea gbìgbɔ̀ hlɛ̃ 11

Ènu kè Mawu wɔ̀ na Izràɛlviwo

1Mì la lɔ̃ Tɔhonɔ̀ mìabe Mawu, eye mì la le yebe ɖoɖowo, èsewo, èkɔ̀dowo, ku ègbè kèwo be ɖè na mìawo ɖo àsi, gbè sia gbè. 2Egbèa, mì le ŋùku ɖo ènu kè mì nya, so Tɔhonɔ̀, mìabe Mawu a be gãnyinyi ŋuti. Mì le ŋùku ɖo yebe ŋusɛ̃ kè be sɔ vlũ yebe àlɔ̀ sɛ̃sɛ̃a ŋuti veveɖe. Mu nyi mìabe èvi kèwo mu nya, àlo mu kpɔ èmɔ kè mì zɔ̃ ku Tɔhonɔ̀, mìabe Mawu ò a, ye mù le gblɔ̃ ènyà kèa na ò. 3Mì kpɔ jèsìdo kèwo be ɖèfiɔawo ku yebe ŋùdãnuwo. Mì kpɔ ènu kè be wɔ̀ ku Faraɔ̀n, Ejiptè be èfìɔa, ku yebe dùkɔ̃a kpataa#11.3 Kpɔ Tot 7.14—12.36 4Mì kpɔ ènu kè be wɔ̀ ku Ejiptè be àhùakɔ̃a, yebe èsɔwo ku àhùakèkewo, wàlɛbɛ kè be na plãŋùpòfɛ̃ be àpùa cɔ̃ woa ji, gà kè mè wo le nyà mì ɖo èdù nua. Nène a ye Tɔhonɔ̀ crɔ̃ wo gbidi, kaka va na egbèa yeŋu#11.4 Kpɔ Tot 14.. 5Mì kpɔ ènu kè be wɔ̀ na mì, so zògbè a ji, kaka va ɖo tèpe kèa. 6Mì kpɔ ènu kè be wɔ̀ ku Datàn ku Abiràm kè nyi Eliab, Rubɛ̀n be èvia be èviwo, àmè kèwo ànyigbãa kè ènu, mì, lè Izràɛlviwo kpata be ŋùmè ku woabe àxuedowo, woabe gòxɔwo, kpe ɖo àmè kèwo keŋu gbe kplɔ̀ wo do kpòa ŋuti. 7Mìa ŋutɔwo, mì kpɔ ènu gã kè Tɔhonɔ̀ wɔ̀a ku mìabe ŋùkuviwo! 8Ekèa ŋutia, mì le èse kè mù sɔ le na mì egbèa kpata ɖo àsi, ne èjì kè mì la sɔ xɔ̀ ànyigbã kè ji mì le yìa, ne nɔ̀ mìa si, 9ne mìa nɔ̀ àgbè dìdi, lè ànyigbã kè be àjɔ̀gbè Tɔhonɔ̀ fìã na mìa tɔgbewo#11.9 Kpɔ Tot 3.8, be yè la sɔ na woa ku woabe jìjimèviwoa ji, ànyigbã kè ji nyìnɔsi ku ànyisi bɔ lèa.

Èdù kè Mawu lenabè na a

10Nyàwo ye be nyi be èdù kè mè mì le yì, la sɔ wɔ̀ mìa tɔ̀a, mu lè sìgbè Ejiptè be èdù kè mè mì to soa nène ò: ne mì do ènu lè Ejiptè-nyigbãa jia, mì ɖènà àfɔ̀-mɔ na èsì, sɔ wuna ɛ̀, sìgbè lè àbɔ mè nène. 11Ànyigbã kè ji mì le yì, la xɔ̀ ɛ̀, bèa zũ mìa tɔ̀a, èto-nyigbã ku bàlì be èdù be nyi, eye èji kè jànà, so jiŋùkusia be èsì ye be nùnà. 12E nyi ànyigbã ɖe kè Tɔhonɔ̀, mìabe Mawu ŋutɔ lenabè na. Tɔhonɔ̀, mìabe Mawu be ŋùkuviwo nɔ̀nà e ji, so èpèa be gɔ̃mèjèje, kaka sɔ yì yebe ènuwuwu.

13Ne mì ɖo èto àpe èsewo nyàwo#11.13 Kpɔ Hɛ̃h 15.37, èse kèwo mù sɔ le na mì egbèa, eye mì lɔ̃ Tɔhonɔ̀, mìabe Mawu a, mì sumɔ ɛ̀ ku mìabe èjì blibo, ku mìabe àmèti bliboa, 14Tɔhonɔ̀ la na èji la jà ɖo mìabe ànyigbãwo ji na mì, lè yebe hùenu, ènudo hùenu ku ènu mìɔ̃ hùenu, àleke be mìa teŋu yà èlù, àhà yeye ku àmì. 15Mù la na ègbe mìabe èlãwo la ɖù, lè ègbeɖùpe, eye mì la ɖùnu, la ɖɔpò.

16Mì kpɔ nyuɛ̃ ɖe, ne àmè ɖe mu gbà flù mìabe èjìwo ò, ne mìa trã èmɔ, ne mìa va yì sɛ̃ vòduwo, ne mìa va yì do èta gũ na wo ò. 17Ne mì wɔ̀ ekèa, Tɔhonɔ̀ be àdɔ̀mèze la bì ɖo mìa ŋuti; e la tu jiŋùkusi, eye èji mu la gbà jà ke ò. Ne èji mu jà ò a, ànyigbãa mu la gbà na yebe nukuwo ò, eye mì la crɔ̃ kaba, lè ànyigbã nyuɛ̃ kè Tɔhonɔ̀ sɔ le na mìa ji#11.17 Kpɔ Lev 26.3-5. 18Ènyà nyè kèawoa, mìa le wo ɖo mìa be àmètia mè, lè kaka màbe èjì mè ke, mìa sɔ wɔ̀ jèsìdo, la bla ɖo mìabe àlɔ̀tinu, jèsìdo, mì la sɔ ɖo mìabe ŋùkuviwo dòmè. 19Mì fiɔ wo, mìabe èviwo. Mì pò nupo so woa ŋuti, lè mìabe àxuewo mè, àlo, ne mì le zɔ̃ èmɔa, àlo, ne mì mlɔ̃ ànyi, àlo, mì fɔ̃a. 20Mì ŋlɔ̀ wo ɖo mìabe àxuewo be hɔ̃tru-tiwo ŋuti, àlo, ɖo mìabe èdù be àgbowo nu, 21ne mìa ku mìabe èviwo, mìa nɔ̀ àgbè, lè ànyigbã kè be àjɔ̀gbè Tɔhonɔ̀, fìã be yè la sɔ na mìa tɔgbewoa ji tɛ̀gbɛ̀, sìgbè lekè jiŋùkusi cɔ̃ ànyigbã tamè tɛ̀gbɛ̀a nène.

22Eye, ne mì le èse kèa kpata kè ji, mù gblɔ̃ na mì, egbè be mìa zɔ̃ ɖoa, ɖo àsi nyàwo, mì lɔ̃ Tɔhonɔ̀, mìabe Mawu a, mì le to èmɔ kèwo be fiɔ mìa ji, eye mì le ɖo e ŋutia, 23Tɔhonɔ̀ la xɔ̀ dùkɔ̃ kèawo kpata be ànyigbãwo lè woa si, lè ŋùkɔ̀ na mì, àleke be mì la xɔ̀ dùkɔ̃ kèwo lòlò, eye wo sɛ̃ŋu wu mìawo ŋutɔ cã be ànyigbãwo lè woa si. 24Àfi sia àfi kè mì la ɖo àfɔ̀a, la trɔ zũ mìa tɔ̀. Mìabe ànyigbãa be lipò la so zògbè a ji, yì tɔ Libàn be ànyigbãa, la so Efratà be ètɔ̀a to, yì tɔ èwèɖoxɔ̀pe be àpùa. 25Àmè ɖekpe mu la teŋu nɔ̀tè ɖo ŋùkɔ̀ na mì ò, ɖoa, Tɔhonɔ̀, mìabe Mawu a, la ɖo vɔ̃vɔ̃ ku àdìka sò àmè mìa ŋuti, lè ànyigbã kè ji mì la ɖo àfɔ̀a kpata ji, sìgbè lekè be fìã yebe àjɔ̀gbè na mìa nène#11.25 Kpɔ Yos 1.3-5.

26Mì ɖo èto mù nyuɛ̃ ɖe: egbèa, mù le sɔ sìtu ku kpɛ̃sɛ̃ le ɖo mìabe ŋùku mè: 27Mì la xɔ̀ sìtu, ne mì zɔ̃ ɖo Tɔhonɔ̀, mìabe Mawu be èse kèwo mù sɔ do àsi na mì egbèa jia. 28Mì la xɔ̀ kpɛ̃sɛ̃, ne mì mu zɔ̃ ɖo Tɔhonɔ̀, mìabe Mawu a be èseawo ji ò, vɔ̀a, mì jo lè èmɔ kè mù fiɔ mì egbèa ji, va yì le kplɔ̀ vòdu kèwo mì mu jèsi ò a do a.

29Ne Tɔhonɔ̀, mìabe Mawu a, kplɔ̀ mì yì ànyigbã kè mì la xɔ̀, sɔ wɔ̀ mìa tɔ̀a jia, mì la sɔ sìtua ɖo Gerizìm be ètoa ji, eye mì la sɔ kpɛ̃sɛ̃a ɖo Ebàl be ètoa ji#11.29 Gerizìm be ètoa lè àpùgo na Sikɛ̀m be èdùa, eye Ebàl be ètoa lè àvego na Sikɛ̀m be èdùa. Èto èvèawo gla Sikɛ̀m be èdùa. Vɔsakpe ɖe nɔ̀ Ebàl be ètoa ji sãa, na Izràɛlviwo. Kpɔ Yos 8.30-33.. 30Èto kèawo lè ŋùkɔ̀, lè èwèɖoxɔ̀pe, lè Yɔrdàn be ètɔ̀a godo, lè Kanàn-nyigbã ji, lè Àrabà, kpãŋùkɔ̀ Gilgàl, lè Mɔ̀re be logòtiwo gbɔ. 31Ɖoa, ne mì sò Yɔrdàn be ètɔ̀a, mì la yì xɔ̀ ànyigbã kè Tɔhonɔ̀, mìabe Mawu a sɔ le na mìa. Mì la xɔ̀ ɛ̀, be la nyi mìa tɔ̀, eye mì la nɔ̀ e ji. 32Mì la kpɔ nyuɛ̃ ɖe, ne mìa wɔ̀ ɖo èse ku èkɔ̀do kèwo keŋu mù sɔ le do àsi na mì egbèa ji.

Currently Selected:

Èsea gbìgbɔ̀ hlɛ̃ 11: GEN

Highlight

Copy

Compare