Popular Bible Verses from Èsea gbìgbɔ̀ hlɛ̃ 11

Share

Mì fiɔ wo, mìabe èviwo. Mì pò nupo so woa ŋuti, lè mìabe àxuewo mè, àlo, ne mì le zɔ̃ èmɔa, àlo, ne mì mlɔ̃ ànyi, àlo, mì fɔ̃a.

Ènyà nyè kèawoa, mìa le wo ɖo mìa be àmètia mè, lè kaka màbe èjì mè ke, mìa sɔ wɔ̀ jèsìdo, la bla ɖo mìabe àlɔ̀tinu, jèsìdo, mì la sɔ ɖo mìabe ŋùkuviwo dòmè.

Ne mì ɖo èto àpe èsewo nyàwo, èse kèwo mù sɔ le na mì egbèa, eye mì lɔ̃ Tɔhonɔ̀, mìabe Mawu a, mì sumɔ ɛ̀ ku mìabe èjì blibo, ku mìabe àmèti bliboa, Tɔhonɔ̀ la na èji la jà ɖo mìabe ànyigbãwo ji na mì, lè yebe hùenu, ènudo hùenu ku ènu mìɔ̃ hùenu, àleke be mìa teŋu yà èlù, àhà yeye ku àmì.

Mì la lɔ̃ Tɔhonɔ̀ mìabe Mawu, eye mì la le yebe ɖoɖowo, èsewo, èkɔ̀dowo, ku ègbè kèwo be ɖè na mìawo ɖo àsi, gbè sia gbè.

Mì ɖo èto mù nyuɛ̃ ɖe: egbèa, mù le sɔ sìtu ku kpɛ̃sɛ̃ le ɖo mìabe ŋùku mè: Mì la xɔ̀ sìtu, ne mì zɔ̃ ɖo Tɔhonɔ̀, mìabe Mawu be èse kèwo mù sɔ do àsi na mì egbèa jia. Mì la xɔ̀ kpɛ̃sɛ̃, ne mì mu zɔ̃ ɖo Tɔhonɔ̀, mìabe Mawu a be èseawo ji ò, vɔ̀a, mì jo lè èmɔ kè mù fiɔ mì egbèa ji, va yì le kplɔ̀ vòdu kèwo mì mu jèsi ò a do a.

Mì ŋlɔ̀ wo ɖo mìabe àxuewo be hɔ̃tru-tiwo ŋuti, àlo, ɖo mìabe èdù be àgbowo nu, ne mìa ku mìabe èviwo, mìa nɔ̀ àgbè, lè ànyigbã kè be àjɔ̀gbè Tɔhonɔ̀, fìã be yè la sɔ na mìa tɔgbewoa ji tɛ̀gbɛ̀, sìgbè lekè jiŋùkusi cɔ̃ ànyigbã tamè tɛ̀gbɛ̀a nène.

Mì kpɔ nyuɛ̃ ɖe, ne àmè ɖe mu gbà flù mìabe èjìwo ò, ne mìa trã èmɔ, ne mìa va yì sɛ̃ vòduwo, ne mìa va yì do èta gũ na wo ò.