2Samuɛl 23

David be ènyà gbɔ̃gblɔ̃ kpɔ̀tɛawo

1David be ènyà gbɔ̃gblɔ̃ kpɔ̀tɛawo ye nyì ekèawo:

Mì ɖo èto David, Jesè be èvia be ègbè,

ŋusù kè wo kɔ ɖo èjia,

Mawu be àmèsìamìnaa,

àmè kè Yakɔb be Mawu a cã, sɔ ɖo èfìɔ,

eye Izràɛlviwo jìnà èhà, sɔ kafuna ku jìjɔ̀ɛ a be ègbè.

2Tɔhonɔ̀ be gbɔ̃gbɔ̃a le pò nupo to ji nyè,

eye yebe ènyà lè àɖe ji na mù.

3Izràɛl be Mawu a gblɔ̃ ɛ̀,

Izràɛl be àkpãa gblɔ̃ na mù be:

“Èfìɔ kè le kplɔ̀ yebe dùkɔ̃a lè Mawu vɔ̃vɔ̃ mèa

kplɔ̀nà àmèwo lè jɔ̀jɔɛ mè.

4Àleke be èfìɔa lè sìgbè dɔ̃ŋùkusu kè hũ

ku kɛ̃klɛ̃ ŋùdekɛ̃nyɛ kè mè lilikpo

ɖekpe mu lè jiŋùkusi òa nène.

E gbà lè sìgbè kɛ̃klɛ̃ kè nana ègbe mìɔ̃nàa,

so ànyigbã mèa nène.

5Mu nyi lekea ye àpe àxue lè, lè Mawu be ŋùmè ò a?

Ɖoa, e ɖù èzò kòkòɖàbì kè be ɖoɖowo sɔ̀gbè pɛpɛpɛa

ku mù, eye wo wla ɛ̀ ɖɛ na mù.

Mawu kã ɖo èjiɖùɖu ji na mù, lè ènu sia ènu mè,

eye be nana àpe èjrowo keŋu vana e mè,

eye wo gbà jìnà ɖo e ji kpe è.

6Vɔ̀a, yàkàme kèwo ye crìnà Mawu a,

wo lè sìgbè àŋùjati kè wo sɔ dãŋùgbea nène.

Àmè ɖe mu sɔna àlɔ̀ gbalo, sɔ lɔna ɛ̀ ò.

7Àmè kè jro la tɔ ɛ̀ àsia,

ɖo la sɔ gàkpo ku gàjɛ̃ ɖo àsi,

eye be ɖo la tɔ ɛ̀ èzò,

la fiɔ̃ ɛ̀, zè ɖèka, lè funua.”

David be kãlìsuwo

(1Kro 11.10-47)

8David be gbãdãgbã kèwo ye wɔ̀nà kãlì, lè àhùagbe jia be nyikɔwo ye nyi ekèawo: Isbaal, Takmɔn ŋusùa lè kãlìwɔ̀tɔ ŋùkɔ̀nɔ̀tɔ ètɔ̃awo dòmè. Wo gbà yɔna ɛ̀ be Adìnɔ̀. E ye dà yebe èhuã sɔ wù àgbètɔ èkà-èwì, lè àhùa ɖèka mè.

9Àmè kè kplɔ̀ ɛ̀ do a ye nyi Eleazàr, Dodò kè nyi Ahohìtɔ ɖe be èvia be èvi. E nɔ̀ kãlìwɔ̀tɔ ètɔ̃ kèwo ye nɔ̀ David ŋuti, wàlɛbɛ kè wo ɖù Filistìtɔ kèwo ye bɔ̀ na àhùa wɔ̀wɔa jia dòmè. Izràɛlviwo be àhùakɔ̃a trɔ jo. 10Eleazàr ya ɖèka kpã ŋùkɔ̀ èkɛ̃tɔwo, eye be wù Filistìtɔwo, kaka na gà kè mè àbɔ va ku ì vɔ̀a, yebe àlɔ̀ le ɖo èwuia ŋuti, eye Tɔhonɔ̀ na èjiɖùɖu gã ɖe Izràɛlviwo gbè ŋua gbè. Ekè àhùakɔ̃a trɔ va Eleazàr gbɔa, ɖe kpò ye wo va xa gbãdãgbã kèwo ye ci ànyigbãawo be ènu zãzãwo.

11Eleazàr yomè a, mi la kpɔ, Samà kè nyi Agè, Hararitɔa be èvia. Ekè Filistìtɔwo va bɔ̀ lè Lehì, àfi kè èklui-gblè ɖe lèa, Izràɛlviwo be àhùakɔ̃a si le Filistìtɔwo nu. 12Samà va nɔ̀tè ɖo àgblèa be dòdòmè, nyà èkɛ̃tɔawo, wù Filistìtɔawo, eye Tɔhonɔ̀ na èjiɖùɖu gã ɖe.

13Gbè ɖèkaa, lè nukuyàya be hùenua, àmè ètɔ̃ so àmè ègbã be èhasòsoa mè va kpɔ David, lè Adulàm be àkpã-doa mè, ɖoa, Filistìtɔwo be àhùakɔ̃ ɖe va do àsàɖa ɖo Refaiviwo be bàlìa mè. 14David lè yebe àgbògbò be wawlapea, gà kè mè Filistìtɔwo xɔ̀ Bɛtlɛhɛ̀m be èdùa. 15David ɖè èjro kèa gblɔ̃ be: “Àmè kɛ ye la yì kù èsì, so èsì-do kè lè Bɛtlɛhɛ̀m be àgboa nua mè, va na mù, ma nù ò?” 16Kãlìwɔ̀tɔ ètɔ̃awo yì kɔ̀ ɖo Filistìtɔwo be àsàɖaa mè. Wo kù èsìa lè èsì-do kè lè Bɛtlɛhɛ̀m be àgboa nua mè, sɔ ɛ̀ va na David. Vɔ̀a, David mu ji la nù èsìa ò. E sɔ ɛ̀ wɔ̀ èsì kɔ̀ ɖɛ be èkɔ̀nu na Tɔhonɔ̀, 17eye be gblɔ̃ be: “Tɔhonɔ̀ ne sɛ̃kpɛ̃ na mù, ne mù wɔ̀ ekèa! Ɖoa èsì kèa lè sìgbè ŋusù kèwo ye yì Filistìtɔwo be àsàɖa mè, yì ku ìa be èhũ nène. Ɖoa, wo mu vɔ̃ be yèwo la bu yèwo be àgbè ò!” Ekèa ŋuti, David mu lɔ̃ nù èsìa ò.

Kãlìnu kè ŋusù àhùawɔ̀tɔ kèawo wɔ̀a ye nyì ekèa.

18Abisai, Yoab be nɔ̀vi, Seruyà be èvia ye lè ŋùkɔ̀ na gbãdãgbã kèwo dona ègà-wùa. Abisai kèa ye sɔ yebe èhuã, gbè ɖèka, ɖo gbãdãgbã àlɔ̀-ètɔ̃wo dòmè, eye be wù wo. Ekèa na be yebe nyikɔ ɖì lè àmè ètɔ̃awo dòmè. 19Wo do bùbu Abisai ŋuti, lè àmè ètɔ̃awo dòmè, eye be trɔ zũ woabe ŋùkɔ̀nɔ̀tɔ. Gãkea, ye ɖèka mu sù àmè ètɔ̃awo ò.

20Benayahu nyi Yehoyada be èvi. Yehoyada ŋutɔ nyi Kabseɛl ŋusù ɖe kè wɔ̀ kãlìnu sùgbɔa be èvi. Benayahu ye wù Mòab ŋusù kãlìwɔ̀tɔ Arìɛl èvèawo. Benayahu kèa ke ye ɖì yì wù jãŋùta, lè èsìdoa mè, gbè ɖèka, lè àvìvɔ hùenu kè èsì-wɔ le jàa. 21Benayahu kèa ke ye wù Ejiptè ŋusù kàkò ɖe. Ejiptè ŋusùa sɔ èhuã ɖo àsi, vɔ̀a Benayahu ya zɔ̃ ɖo ŋusùa ji ku yebe èmɔ̃-zɔ̃kpò. E xɔ̀ èhuãa lè ŋusùa si, eye Benayahu sɔ ŋusùa ŋutɔ be èhuã, sɔ wù Ejiptè ŋusùa. 22Ènu kèawo Benayahu, Yehoyada be èvia wɔ̀, sɔ xɔ̀ nyikɔ lè kãlìwɔ̀tɔ ètɔ̃awo dòmè. 23Wo do bùbu Benayahu ŋuti wu àmè ègbãawo, gãkea, ye ɖèka mu sù àmè ètɔ̃awo ò! David ɖè è be ne nɔ̀ ŋùkɔ̀ na gbãdãgbã kèwo ye nyi yèbe ɖiatɔwoa.

24Asamɛl, Yoab be nɔ̀via cã lè kãlìwɔ̀tɔ ègbãawo dòmè ku Elhanan ke nyi Dodò, Bɛtlɛhɛ̀m ŋusùa be èvia. 25Samà, Harodi ŋusù, Elika, Harodi ŋusù bu cã lè e mè. 26Helɛs, Paltìtɔa, Irà, Ekɛ̀s, Tekoa ŋusùa be èvi, 27Abiezɛr, Ànatɔt ŋusùa, Mèbunai, Husatitɔa, 28Salmɔ̀n, Ahohì be èdùmètɔa, Mahrai, Netofatɔa, 29Helɛ̀b, Baanà, Netofat ŋusùa be èvi, Hitai, Rivai kè so Gibeaa be èvi, kèwo so Bɛnyamìn be jìjimèviwo dòmèa. 30Benayahu, nyi Pireatɔ̀n ŋusù, Hidai kè so Gaas be ètɔ̀ sɛ̃sɛ̃wo be ànyigbã jia, 31Àbì-Albɔn, Arbat ŋusùa, Azmàvɛt, Barhumit-nyigbã jitɔa, 32Ɛlyahbà, Saalbɔ̀ntɔa. Yasɛ̀n be ŋusùviwo: Yehonatàn, 33Samà, kè so Arar-nyigbã jia, Àhiam, Sarar, Ararìtɔa be èvia, 34Elifelɛt, Ahasbai kè nyi Maakat ŋusù Eliam be èvia, Ahitofɛl kè so Gilɔnìa be èvi, 35Hɛ̀srai, Karmèltɔa, Paarai, Arbìtɔa, 36Yigeàl, Natàn kè so Sobàa be èvi, Banì Gaadtɔa, 37Sɛlɛk, Amɔ̀nvia, Nahrai, Yoab be àdèkplɔ̀vi kè nyi Beerɔtvi, kè Seruyà jìa, 38Irà, Yitritɔa, Garɛb, Yitritɔa, 39Urì, Hitìtɔa. Woa kpata, wo lè àmè ègbã vɔ adrɛ̃.

Currently Selected:

2Samuɛl 23: GEN

Highlight

Copy

Compare