2Samuɛl 24

David na wo hlɛ̃ dùkɔ̃a

(1Kro 21.1-6)

1Gbè ɖèkaa, Tɔhonɔ̀ gbà do àdɔ̀mèze ɖo Izràɛlviwo be dùkɔ̃a ŋuti ke, eye Tɔhonɔ̀ dɔ̃ David ɖo woa ŋuti, gblɔ̃ be: “Yì ne wòa hlɛ̃ Izràɛl ku Yudà be dùkɔ̃awo.” 2Eye èfìɔa gblɔ̃ na Yoab, àhùagaa be: “To Izràɛlviwo be kɔ̀tawo keŋu mè, so Dàn, kaka va Bèɛr-Sebà, ne mìa hlɛ̃ dùkɔ̃mèviwo, àleke be mia nya woabe hɛ̃hlɛ̃ mè.” 3Yoab ɖo e ŋuti na èfìɔa be: “Tɔhonɔ̀, Mawu ne na dùkɔ̃a ne jì ɖo e ji, zè èkà èvè takpowo wu lekea, ne àpetɔ nyè èfìɔ bùbùtɔ ne kpɔ ɛ̀ ku ye ŋutɔ, yebe ŋùkuviwo! Vɔ̀a, nukɛ ŋuti ye àpetɔ nyè èfìɔ bùbùtɔ jro be yèa wɔ̀ ènu kèa ɖo ò?”

4Ekè e nyi be àmè ɖe mu la teŋu trɔ èfìɔ be ègbè kè be ɖèa òa, Yoab ku èfìɔ be àhùakɔ̃a be ŋùkɔ̀nɔ̀tɔwo jè èmɔ̃, ne woa yì wɔ̀ ɖo e ji, ne woa hlɛ̃ Izràɛlviwo be dùkɔ̃a. 5Wo sò Yɔrdàn be ètɔ̀a, eye wo tɔ e ji ku Àroà be èdùa kudo èdù kè lè Gad be ètɔ̀ wɔ̀adã be bàlìa mè be àpùgoa jia, eye wo yì e ji, tùtà Yazɛ̀r be èdùa. 6Wo yì ɖo Gilead-nyigbã ji, eye wo ɖì àbù a yì Hodsì, yì Dàn-Yaan, eye wo to èmɔ̃a yì Sidɔ̀n. 7Wo ɖo Tirò be àgbògbòa mè ku Hivìtɔwo kudo Kanàntɔwo be èdùwo keŋu mè. E yomè a, wo ɖota Yudà-nyigbãa be àpùgo, yì Bèɛr-Sebà. 8Nène a ye wo to dùkɔ̃a be ànyigbãwo keŋu ji, yì eye, lè wètri àsiɖèkɛ ku ŋùkèkè èwì yomè a, wo va ɖo Yèruzàlɛm. 9Yoab sɔ dùkɔ̃a be hɛ̃hlɛ̃ va na èfìɔa: Izràɛl dùkɔ̃a ɖo àhùawɔ̀tɔ hotu àlɔ̀ ènè, eye Yudà dùkɔ̃a ɖo àhùawɔ̀tɔ hotu àlɔ̀-èvè èkà-vè takpo. Àmè kèawo sɔ̀gbè la sɔ èwui wɔ̀ àhùa.

10Ekè David hlɛ̃ dùkɔ̃mèviwo vɔ̀a, àdìka sò è, eye be gblɔ̃ na Tɔhonɔ̀ be: “Mù wɔ̀ èvuɛ̃ gã ɖe. Gãkea, Tɔhonɔ̀, tɔ̀ wò jɔ̀; ŋɛ̃ ŋùkuvi pu sumɔ̃vi wòa be àgɔ̀jèje ji, ɖoa, mù wɔ̀ ènu mà-nyãtɔ be ènu.” 11Ekè èŋù kè, eye David fɔ̃a, Tɔhonɔ̀ pò nupo na Gad, gblɔ̃ɖɛtɔ kè kpɔna ènu mè na David èfìɔ, eye be gblɔ̃ na ɛ̀ be: 12“Yì to na David be: 'Tɔhonɔ̀ gblɔ̃ be: Mù la sɔ èto-dɔ̃ ètɔ̃ ɖo ŋùmè na wò. Ekè wò cã a, ye wò la xɔ̀.'” 13Gad yì kpɔ David, eye be do àŋɛ̀a na ɛ̀. E gblɔ̃ na ɛ̀ be: “Wò jro be àdɔ̀ ne to èpè adrɛ̃, lè àpo èdù mè loo, àlo, wòa si wètri ètɔ̃ sɔ̃ŋu, lè àpo èkɛ̃tɔwo be àhùakɔ̃ nu, àlo, èdɔ̀ vuɛ̃ ne jè dùkɔ̃ wò ji, ŋùkèkè ètɔ̃? Bù èta mè, ne wòa na mù ɖoŋuti kè mù la na àmè kè dɔ̃ mùa.” 14David ɖo e ŋuti na Gad be: “Mù ɖɔ ku àkpɔ̃ gã ɖe. Gãkea, e nyɔ na mù be ma jè Tɔhonɔ̀ be àlɔ̀ mè, wu be ma jè àgbètɔwo be àlɔ̀ mè, ɖoa, Tɔhonɔ̀ be ŋuzĩzĩkuku sùgbɔ!”

15Ekèa yomè a, Tɔhonɔ̀ ɖo èdɔ̀-vuɛ̃ ɖoɖa Izràɛl dùkɔ̃a, so ŋùdekɛ̃nyɛ ŋua kaka va na gbè kè gbè Tɔhonɔ̀ ɖoa ji, eye àmèwo ku lè dùkɔ̃a mè, so Dàn-nyigba ji, sɔ yì Beɛr Sebà-nyigbã ji. Àmè kèwo kuawo kpata lè ŋusù hotu ègbã vɔ àtɔ̃ (70000). 16Gà kè mè Tɔhonɔ̀ be àtikplɔtɔa vlũ àlɔ̀ ɖoɖa Yèruzàlɛm, la kɔ̀ èvuɛ̃a ɖo èdùa jia, Tɔhonɔ̀ be susu trɔ lè ètodɔ̃a yomè, eye be gblɔ̃ na àtikplɔtɔ kè le crɔ̃ dùkɔ̃a be: “E sù vɔ̀! Fifìa, àlɔ̀ wò ne ɖiɖi.” Wàlɛbɛ ŋua, Tɔhonɔ̀ be àtikplɔtɔa gogo Àravnà, lè àfi kè Yebusì ŋusùa pònà èlù lèa gbɔ. 17Ekè David kpɔ àlekè àtikplɔtɔa le wù àmè lè dùkɔ̃a mè ɖoa, e gblɔ̃ na Tɔhonɔ̀ be: “Ènyè ye wɔ̀ èvuɛ̃, ènyè ye jè àgɔ̀. Vɔ̀a, àlɛ̃ kèawo ya ɖe, nukɛ ye wo wɔ̀ ò? Tɔhonɔ̀, àpo àlɔ̀ ne jè àxue nyè ku xòmè nyèa ji kpò!”

David tù vɔsakpe na Tɔhonɔ̀

(1Kro 21.18-26)

18Gad yì kpɔ David, gbè ŋua gbè, eye be gblɔ̃ na ɛ̀ be: “Yì, ne wòa li vɔsakpe na Tɔhonɔ̀ ɖo Àravnà, Yebusì ŋusùa be èlù pòpea.” 19David yì, eye be zɔ̃ ɖo ègbè kè Tɔhonɔ̀ ɖè na ɛ̀, to Gad jia nu. 20Ekè Àravnà kɔ ŋùmè yì jia, e kpɔ èfìɔa ku yebe èdùdɔnunɔ̀tɔwo gbãnà e gbɔ; Àravnà to va, cɔ̃ ŋùmè ànyi ɖo èfìɔa be ŋùkɔ̀. 21Àravnà gblɔ̃ be: “Nukɛ ŋuti èfìɔ bùbùtɔ va yebe sumɔ̃vi gbɔ ɖo ò?” David ɖo e ŋuti be: “Mù jro la plè èlù pòpea lè àsi wò, ne ma tù vɔsakpe ɖo e ji na Tɔhonɔ̀, ne èdɔ̀ vuɛ̃ a nu ne sò, lè dùkɔ̃a mè.” 22Àravnà gblɔ̃ na David be: “Àpetɔ nyè, èfìɔ bùbùtɔ ne sɔ ènu kè jro èa, ne bèa wɔ̀ vɔsa mèmea na Mawu. Kpɔɖa, ènyì nyèwo ye nyi ekèawo, na vɔsa mèmea. Kèkevi ku ènu kèwo ènyìwo sɔ dɔ̃na ɛ̀awo ye nyi ekèawo na èzòa.” 23Àravnà sɔ ènu kèawo keŋu na èfìɔa, eye Àravnà gblɔ̃ na èfìɔa be: “Tɔhonɔ̀, àpo Mawu ne xɔ̀ àpo vɔsa.” 24Vɔ̀a, èfìɔa gblɔ̃ na Àravnà be: “Gbèɖe! Mù la plè è lè àsi wò, ɖo yebe èci nu. Nyè mu la teŋu wɔ̀ ènumème vɔsa na Tɔhonɔ̀, Mawu nyè gbalo ò!”

Eye David sɔ klòsalò-gà èkà ci èwo (50), plè èlù pòpea ku ènyìawo. 25David li vɔsakpe ɖo funua na Tɔhonɔ̀, eye be wɔ̀ ènumème vɔsa ku àkpedodo be vɔsa. Ekèa yomè a, Tɔhonɔ̀ kɔ̀ àdɔ̀mè ɖo dùkɔ̃a ŋuti, eye èdɔ̀ vuɛ̃ a nu sò, le Izràɛl be ànyigbã a ji.

Currently Selected:

2Samuɛl 24: GEN

Highlight

Copy

Compare