2Samuɛl 22
22
David be èhàjìji
(Èhàw 18)
1David jì èhà na Tɔhonɔ̀, gbè kè gbè Tɔhonɔ̀ hlùɛ̃ ɛ̀ gã, so yebe èkɛ̃tɔwo keŋu ku Saolò si mèa.
2E gblɔ̃ be: “Tɔhonɔ̀ ye nyi àkpã nyè, àgbògbò nyè ku àmè kè jona mùa.
3Mawu ye nyi àkpã kè mè, mù bènà ɖoa,
Àkpoxɔ̀nu nyè, ku àpe èjiɖùɖu be àhùawɔ̀nu.
Mawu ye nyi àgbògbò-dù kè mè, mù wlana ɖoa,
ɖoa, e ye nyi wawlape nyè ku àpe xɔ̀namètɔ. Tɔhonɔ̀ ye hlùɛ̃nà mù gã, so àmè nyrãkuwo si.
4Àmè sia àmè ne kafu Mawu!
Ɖoa, kè mù gbà fã yɔ ɛ̀ kpòa, mù ɖù kɛ̃tɔ nyèwo ji.
5Kè èku be àsrɔ̀kewo pòxla mù, eye èvuɛ̃jɔ̀jɔ be ètɔ̀ wɔ̀adãwo le blù do mùa,
6wàlɛbɛ kè àvlìmè be èkàwo xasa do mù, eye wo li èku be ègàmɔwo ɖo ŋùkɔ̀ na mù a,
7wàlɛbɛ kè àkpɔ̃ ɖɔ mù a, mù fã yɔ Tɔhonɔ̀.
Mù do àpa yɔ Mawu nyè. Eye lè yebe èfìɔsa mèa, Mawu sè àpe ègbè ɖoɖa. Àpe àpaa ɖo yebe èto mè.
8Eye ànyigbã a hùã, eye be hũhũ;
jiŋùkusi be dodoewo pò tìtìtì, eye wo titɔ, ekè Mawu bijìa.
9Àzìzɔ ɖe tù so yebe ŋɔ̀ti mè.
Eye èzò bìbi ɖe to so yebe ènu mè, le fiɔ̃ ènu ku èzòka bìbiwo.
10E vlũ jiŋùkusi ɖɛ, eye be ɖì va.
Lili babla ɖe lè àfɔ̀ gɔ̃mè na ɛ̀.
11Eye be gbà do Kerubì ɖe, sìgbè èsɔ nène, sɔ zrò jo.
E le ze, lè àya be àwàdawo ji.
12E sɔ vìvìti kèwo trɔ do èawo sɔ tù èxɔ̀.
Eye lilikpo kèwo ɖɔ ku èsìwo
nyi èxɔ̀ mè sò vɔ na ɛ̀.
13Kɛ̃klɛ̃ sɛ̃sɛ̃ ɖe lè ŋùkɔ̀ na ɛ̀,
eye èzòkawo le zrò to lè e mè.
14Tɔhonɔ̀ be egbè le ɖì sɛ̃sɛ̃ ɖe lè jiŋùkusi, sìgbè èji ye le ɖè ègbè nène.
15E dà èji kè-èzo ɖoɖa àfi sia àfi, eye kɛ̃tɔwo kã hlɛ̃,
e dà àŋùti ɖoɖa àfi sia àfi, eye èkɛ̃tɔwo si.
16Ekè Tɔhonɔ̀ be àdɔ̀mèze be àya tɔ pòpoa, àpù be gɔ̃mè ze, eye yebe ŋɔ̀ti mè be àya be ŋusɛ̃ klo ènu lè xixea be dodoewo ŋuti.
17E drɛ̃ àlɔ̀, so jiŋùkusi, eye be dɔ̃ mù to lè èsì ɖɔɖɔawo mè.
18E hlùɛ̃ mù gã, lè èkɛ̃tɔ nyè be ŋusɛ̃ si.
E xɔ̀ mù lè èkɛ̃tɔ kèwo ye sɛ̃ŋu wu mùawo si.
19Wo va jè ji nyè, àpe gbɔ̀jɔ̀gbɔjɔ gbè.
Vɔ̀a Tɔhonɔ̀ va, eye mù gba ɖo e ŋuti.
20E hlɛ̃ mù to, eye be jo mù.
E ɖè mù, ɖoa e lɔ̃ mù.
21Tɔhonɔ̀ le le mù lekea, ɖo àpe ànùkua wɔ̀wɔ ŋuti.
E le le mù lekea, ɖo àpe àlɔwo kɔ̀.
22Ekè mù le zɔ̃ ɖo Tɔhonɔ̀ be èjro nua,
nyè mu trã èmɔ̃, jo lè Mawu nyè be ɖoɖowo ji ò.
23Yebe èsewo keŋu nyi kãligbɛ̃ lè ŋùkɔ̀ na mù.
Eye nyè mu zɛ̃nà to àkpa ɖèka na yebe ɖoɖowo ò.
24Mù zɔ̃ èmɔ jɔ̀jɔɛ ku Tɔhonɔ̀,
eye mù kpɔ ɖokoe nyè ji, ne nyè mu gbà jè àgɔ̀ ò.
25Ekèa ŋuti ye Tɔhonɔ̀ ɖo jɔ̀jɔɛ nyè tèpe na mù ɖo,
eye be le mù ɖo kɔ̀kɔ̀ɛ kè yebe ŋùkuviwo kpɔ lè ŋuti nyèa nu.
26Tɔhonɔ̀, wò wɔ̀nà ànùkua ku àmè kè wɔ̀nà ànùkua ku wòa;
Eye wò fiɔna ɖokoe wò, àgɔ̀ màɖo, ku àmè kè lè àgɔ̀ màɖoa.
27Wò nɔ̀nà kɔ̀kɔ̀ɛ ku àmè ke nɔ̀nà kɔ̀kɔ̀ɛa, eye wò sɛ̃na ètamè ku àmè kè wɔ̀nà ènu dakàa.
28Wò na na èjiɖùɖu dùkɔ̃ kè wo ɖìgbɔa,
eye wò tɛ̃na ŋùkuvi ɖo àmè kèwo kɔna woa ɖokoewo yìjia.
29Èwò ye nyi àpe kãligbɛ̃, Tɔhonɔ̀!
Tɔhonɔ̀ klɛ̃na ɖo àpe vìvìtiwo mè.
30Èwò ye nana mù ɖùnà àhùakɔ̃ ɖe ji,
ɛ̃ɛ! Mawu nyè ji mù tona, tìnàkpo flana èglì.
31Kplɔ̀tɔ jɔ̀jɔɛ ye Mawu kèa nyi,
eye yebe ènyàwo ɖo kãkã ɖo e ji.
E nyi àkpoxɔ̀nu na àmè kèwo keŋu bɔ̀nà ɖo e gbɔawo.
32Àmè kɛ koŋu ye nyi Mawu, ne mu nyi miabe Tɔhonɔ̀a ye ò?
Àmè kɛ koŋu ye nyi àkpãa, ne mu nyi miabe Mawu a ye ò?
33Mawu kèa ye nyi ŋusɛ̃tɔ kè kpɔna ji nyèa.
E ye nana àpe èmɔ ji kɔ̀nà.
34E nana àfɔ̀ nyèwo gɔ̃mè bina, sìgbè èzĩ tɔ̀ nène,
eye be sɔna mù ɖona ètɔwo ji.
35E ye fiɔna àhùawɔ̀wɔ àlɔ̀ nyèwo,
eye be nana àbɔ nyèwo teŋu dànà gàjɛ̃ be àŋù kè sɛ̃ŋu wuawo keŋu.
36Tɔhonɔ̀, wò sɔ àpo èjiɖùɖu be àkpoxɔ̀nu na mù, eye àpo lɔ̃lɔ̃ be àmè ji kpɔkpɔ le do mù ŋusɛ̃.
37Wò na mù gbà le pu dù kaba wu,
eye nyè mu klɛ̃nà èkpe ò.
38Ekèa na be mù kplɔ̀ kɛ̃tɔ nyèwo do, kaka mù crɔ̃ wo.
Ne nyè mu crɔ̃ wo ò a, nyè mu la trɔ va ŋùgbe ò.
39Mù crɔ̃ wo gbidi-gbidi, mù ja wo,
wo mu la gbà fɔ̃ ò, eye mù ɖo àfɔ̀ woa ji.
40Wò sɔ ŋusɛ̃ bla àlì ji na mù, ne ma wɔ̀ àhùa.
Eye wò bɔ̀bɔ̀ èkɛ̃tɔ nyèwo lè ŋùkɔ̀ na mù.
41Wɔ̀ na kɛ̃tɔ nyèwo trɔ ŋùgbe do mù, si jo,
eye mù crɔ̃ èkɛ̃tɔ nyèwo gbidi-gbidi.
42Wo do àpa, vɔ̀a, xɔ̀namètɔ ɖekpe mu lè na wo ò.
Wo do àpa, yɔ Tɔhonɔ̀, vɔ̀a, Tɔhonɔ̀ mu ɖo e ŋuti na wo ò.
43Mù gbã wo hãnyà hãnyà.
Mù tùkù wo, mù ɖo àfɔ̀ woa ji, sìgbè èkpa dòmè be bàba nène.
44Wò ɖè mù to lè dùkɔ̃ nyè be àglajèje mè.
Wò le mù ɖotè, lè dùkɔ̃wo nu,
eye dùkɔ̃ kè nyè mu jèsi ò a, sumɔ mù.
45Àmèjroviwo va le lìlì àsi èkpomè na mù.
Ne mù gbe ɖè ègbè kpòa, wo sènà ètonu,
eye wo puna-dù.
46Vɔ̃vɔ̃ le ɖo àmèjroviawo,
wo le hũhũ, wàlɛbɛ kè wo le to so woabe nɔ̀pea.
47Tɔhonɔ̀ lè àgbè!
Àkpe na àmè kè nyi àpe àkpãa;
Tɔhonɔ̀ Mawu jè na kafu!
E ye nyi àpe hlùɛ̃gã be àkpãa!
48Mawu kèa biɔna èhlɔ̃ na mù,
eye be bɔ̀bɔ̀nà dùkɔ̃wo ɖo gɔ̃mè na mù.
49Tɔhonɔ̀, wò xɔ̀ mù le èkɛ̃tɔ nyèwo si.
Wò na, mù ɖù ètamèsɛ̃tɔwo ji,
eye wò xɔ̀ mù lè àmè nyrãkuwo si.
50Ekèa ŋuti ye mù le kafu wò ɖo,
Tɔhonɔ̀, lè dùkɔ̃wo dòmè.
Eye mù le jì èhà, sɔ le kafu àpo nyikɔ.
51Tɔhonɔ̀ wɔ̀nà ènu jɔ̀asuwo,
sɔ xɔ̀nà na èfìɔ kè ye ŋutɔ cã a.
E wɔ̀nà ànùkua na yebe àmè si àmì na a.
E wɔ̀na ànùkua na David ku yebe jìjimèviwo!
Currently Selected:
2Samuɛl 22: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
