2Samuɛl 21
21
Gibeɔ̀nviwo ku Saolò be èviwo
1Lè David be hùenua, àdɔ̀ va to, èpè ètɔ̃ sɔ̃ŋu. Kè David biɔ Tɔhonɔ̀ sèa, Tɔhonɔ̀ ɖo e ŋuti na ɛ̀ be: “Ènu kèa le jɔ̀, ɖo Saolò ku yebe èhlɔ̃dãdã be xòmèa ŋuti. Ɖoa, wo wù Gibeɔ̀ntɔwo.”
2Èfìɔa yɔ Gibeɔ̀ntɔwo, eye be pò nupo ku wo. Gibeɔ̀ntɔwo mu lè Izràɛlviwo dòmè ò. Vɔ̀a, wo do xòmè ku àmè kèwo ci àgbè, lè Àmorìtɔwo dòmèawo, eye Izràɛlviwo fìã àjɔ̀gbè na wo be yèwo la gble wo ɖo àgbè. Gãkea, ekè Saolò jro be yèa ɖè è fiɔ be yè le hùãŋu ɖo Izràɛlviwo ku Yudàviwo taa, e jro be yèa crɔ̃ wo. 3David biɔ wo sè be: “Nukɛ ye mù la wɔ̀ na mì ò? Leke ye mù la wɔ̀, la jrà àgɔ̀ kè wo jè do mìa ɖo, àleke be mìa teŋu tu sì na Tɔhonɔ̀ be ècrɔ̃nua ò?” 4Gibeɔ̀ntɔwo ɖo e ŋuti na ɛ̀ be: “Ènyà kè lè mia ku Saolò kudo yebe xòmèa dòmèa, mu nyi klòsalò loo, àlo, sìka ye la vɔ̀ ɛ̀ ò. Mu nyi ne mi wù Izràɛlvi ɖe cã ye la vɔ̀ ɛ̀ ò!” Èfìɔa gbà gblɔ̃ be: “Ènyà kè mì la gblɔ̃a, ènu ɖekpekpe kè mì jro a, mù la wɔ̀ ɛ̀ na mì.” 5Wo ɖo e ŋuti na èfìɔa be: “Saolò, ŋusù kè wù mi, ekè jro be yèa crɔ̃ mi, eye be susu ŋutɔ cã be yè crɔ̃ mi gbidi, vɔ̀ lè Izràɛl-nyigbã ji keŋuã, 6wo ne ɖè yebe jìjimèvi adrɛ̃ na mi, ne mìa klɛ̃ wo, lè àti ŋuti, lè Tɔhonɔ̀ be ŋùkɔ̀, lè Tɔhonɔ̀ be àmè cãcã Saolò be èdù, Gibea mè.” Èfìɔa gblɔ̃ be: “Mù la ɖè wo do àsi na mì.”
7Gãkea, èfìɔa ɖè Mefibosɛt kè nyi Yonatàn, Saolò be èvia ya to lè e mè, ɖo àjɔ̀gbè kè David ku Yonatàn, Saolò be èvia, wo fìã lè Tɔhonɔ̀ be ŋùkɔ̀a ŋuti. 8Eye èfìɔa na wo lè ŋusùvi èvè kèwo Rispa, Ayà be nyɔ̃nùvia jì na Saolòa, Armɔni ku Mefibosɛt kudo Mikàl, Saolò be nyɔ̃nùvia be èvi àtɔ̃ kèwo be jì na Adriɛl, Bàrzilaì, Meholà ŋusùa be èvia. 9Eye David sɔ wo do àsi na Gibeɔ̀ntɔwo, eye Gibeɔ̀ntɔwo klɛ̃ wo lè èto tamè, lè Tɔhonɔ̀ be ŋùkɔ̀. Wo àmè adrɛ̃awo ku ɖodu. Wo wù wo nukuyàya be ŋùkèkè cucugbãa gbè, wàlɛbɛ kè wo le tɔ èlù yàya jia.
10Ekèa yomè a, Rispa, Ayà be nyɔ̃nùvi kè nyi Saolò be àzìãvia, sɔ kòtòku ɖo ɖo àkpãa ji, nɔ̀ funua, so nukuyàya be gɔ̃mèjèje, kaka na wàlɛbɛ kè èji tɔ jàja ɖo ŋutilãawo jia. Lè ŋùkèkè mèa, mu nana èmɔ̃ àyamè xèviwo, ne woa jè ɖo ŋutilãawo ji ò. Nène a kea, mu lɔ̃nà na ègbemè-lãwo be woa gogo ŋutilãawo ò. 11Wo gblɔ̃ ènu kè Rispa, Ayà be nyɔ̃nùvi, kè nyi Saolò be àzìãvia wɔ̀a na David. 12Eye David yì xɔ̀ Saolò ku Saolò be èvi Yonatàn be èpuawo lè Yabɛ̀s be èdù mètɔwo si, lè Gilead-nyigbã ji. Yabɛ̀s be èdù mètɔwo so Gilead-nyigbã ji, yì fĩ Saolò ku èvia Yonatàn be èpuwo lè Bɛt-Sehan be gbàjà ji, àfì kè Filistìtɔwo sɔ wo kù ènu ŋuti lè, gbè kè gbè Filistìtɔwo wù Saolò lè Gilbòaa. 13David fɔ̀ Saolò ku èvia Yonatàn be èpuwo so funua va, eye wo bɔ̀ àmè kèwo wo klɛ̃ lè àtiwo ŋutia cã be èpuwo. 14Wo ɖì Saolò ku èvia Yonatàn be èpuwo lè Selà, lè Bɛnyamìn-nyigbã ji, ɖo ètɔa Kis be èyɔ̀do mè.
Ekè wo zɔ̃ ɖo èfìɔa be ɖoɖowo keŋu ji vɔ̀a, Mawu gbà le ɖo èto èdùa be kuefã.
David gbà kpe àhùa ku Filistìtɔwo
15Àhùa gbà jɔ̀ lè Filistìtɔwo ku Izràɛlviwo dòmè ke. David ku yebe gbãdãgbãwo yì kpe àhùa ku Filistìtɔwo. E va e mè be ènu tìkɔ̀ na David. 16Yisbi-Be-Nɔb kè nyi Harafà be jìjimèvia ɖo è be yèa wù David. Yisbi be èhuã be ènugbɔ be kpɛ̃kpɛ̃ mè lè sekɛ̀l àlɔ̀ ètɔ̃; yebe àhùawɔ̀nuwo lè yeye. 17Gãkea, Abisai, Seruyà be èvia va xɔ̀ na David, eye Abisai wù Filistìtɔa. Ekèa yomè a, David be gbãdãgbãwo na David fìã àjɔ̀gbè, eye wo gblɔ̃ na ɛ̀ be: “Wò mu la gbà to va àhùagbe ji ku mi, ne wòa va ci èfìɔɖùɖu be èzò kè lè sìsi lè miabe èdù, ku Izràɛl-dùkɔ̃a mèa ò.”
18Ekèa yomè a, àhùa bu gbà jɔ̀ ku Filistìtɔwo, lè Gob. Gà ŋua mè ye Sibekai so Husà be èdù mè, ɖù Saf, Harafà be jìjimèviwo dòmètɔ ɖèka ji, eye be wù ì. 19Lè àhùa bu mè, ku Filistìtɔwo, lè Gob, Elhanan kè nyi Yare-Oregim, Bɛtlɛhɛ̀m ŋusù ɖe be èvia wù Gòliat kè so Gat#21.19 Ŋɔ̀nlɔ̃a mè mu kɔ̀ lè fikèa nyuɛ̃ ɖe ò. Woa kpɔ 1 Sam 5.8, eye yebe èhuã trì sìgbè àvɔlɔ̃tɔ be èhũvi nènea. 20Àhùa bu gbà jɔ̀ lè Gat. Kãlìsu ɖe lè, kè be àlɔ̀ ɖe sia ɖe ɖo àlɔ̀vi àdɛ̃, eye yebe àfɔ̀ ɖe sia ɖe ɖo àfɔ̀vi àdɛ̃. Yebe àlɔ̀vi ku àfɔ̀viawo keŋu lè èwì vɔ ènè. Ye cã nyi Harafà be jìjimèvi. 21E jige lè Izràɛlviwo ŋuti, eye David be fòfo, Simèa be èvi, Yehonatàn wù ì.
22Àmè ènè kèawo keŋu nyi Harafà be jìjimèviwo, eye David ku yebe gbãdãgbãwo wù wo.
Currently Selected:
2Samuɛl 21: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
