2Samuɛl 18

Àbsàlɔm ci àhùa

1David bɔ̀ àhùakɔ̃ kè lè e ŋutia, eye be ɖo ŋùkɔ̀nɔ̀tɔwo ɖo gbãdãgbã èkà èwì vɔ àtɔ̃wo (1000) ku èkà èvè takpowo (100) nu. 2David sɔ àhùakɔ̃a be mamã ètɔ̃gɔ̃a ɖèka do àsi na Yoab, Seruyà be èvia; e gbà sɔ mamã ètɔ̃gɔ̃a ɖèka do àsi na Abisai, Yoab be nɔ̀via, eye be sɔ mamã ɖèka kpɔ̀tɛa do àsi na Itai kè nyi Gitì ŋusùa. Ekèa yomè a, David ɖè ègbè na àhùakɔ̃a be ne jè èmɔ, eye be gblɔ̃ be: “Nyè cã, mù la yì ku mì!” 3Vɔ̀a, àhùakɔ̃a mètɔwo gblɔ̃ be: “Gbèɖe! Wò mu la yì ku mi ò! Ɖoa, ne mi si, lè èkɛ̃tɔwo nua, wo mu la kpɔ ɛ̀ be e nyi ènu ɖe ò. Ne wo wù miabe àhùakɔ̃a be mamã mè ŋutɔ cã a, wo mu la kpɔ ɛ̀ be e nyi ènu ɖe ò. Vɔ̀a, èwò yaa, wò lè sìgbè mia dòmètɔ hotu àtɔ̃ nène. Ekèa ŋutia, e la nyɔ wu bòhũ be wò yaa, wòa ci èdùa mè, àleke be, ne e va hiãa, wòa teŋu so èdùa mè, va xɔ̀ na mi.” 4Èfìɔa ɖo e ŋuti na wo be: “E nyɔ! Mù la wɔ̀ ɖo ènyà kè mì gblɔ̃a ji.” Eye, wàlɛbɛ kè àhùakɔ̃a to va le yì, lè gbãdãgbã èkà èwì vɔ àtɔ̃wo ku èkà èvè takpowo be ɖoɖo nua, èfìɔa lè èdù be àgbɔa nu. 5Èfìɔa gbà ɖè ègbè na Yoab, Abisai ku Itai be: “Mì wɔ̀ blɛ̀wù ku Àbsàlɔm, ɖèkajɛvia na mù.” Gbãdãgbãwo keŋu sè kè èfìɔa le ɖè ègbè kèa na àhùa ŋùkɔ̀nɔ̀tɔawo, so Àbsàlɔm ŋutia. 6David be àhùakɔ̃a jo yì àhùa-gbe ji, yì kpã ŋùkɔ̀ Izràɛl be àhùakɔ̃a, eye àhùaa fɛ̃ àti lè Efràyim be àvea mè. 7David be àhùakɔ̃awo ɖù Izràɛl tɔ̀awo ji veve ɖe, eye àgbètɔ hotu èwo ci àhùa. 8Àhùaa so funua, kãkã ɖo àgo ŋuawo keŋu ji, eye àmè kèwo bu woabe àgbè, lè àvea mèawo be hɛ̃hlɛ̃ mè wu àmè kèwo ci èwui nuawo.

9E va jɔ̀ be Àbsàlɔm va dogò David be gbãdãgbã ɖewo. Àbsàlɔm le do èsɔàkɛtɛ-su ɖe. Èsɔàkɛtɛ-sua pudù to àti sɛ̃ŋu gã ɖe kè vũ yebe àlɔ̀zɛ̃wo ɖo ànyi a gɔ̃mè. Àbsàlɔm be èta ci àlɔ̀zɛ̃awo mè, wàlɛbɛ kè èsɔàkɛtɛ-sua pudù joa. Àbsàlɔm ci èji ku ànyigbã a dòmè, lè àya mè. 10David be gbãdãgbãawo dòmètɔ ɖèka kpɔ ɛ̀, eye be yì gblɔ̃ na Yoab be “Mù kpɔ Àbsàlɔm ci àya mè, lè àti sɛ̃ŋu ɖe ŋuti.” 11Yoab gblɔ̃ na ŋusùa be: “Ekè wò kpɔ ɛ̀a, nukɛ ŋuti, wò mu dà ènu ì pu ànyi, ɖo funua zè ɖèka ò? Ne ɖe ye wò kè wù ìa, mù la kè na wò klòsalò-gà èwo, eye wò la gbà xɔ̀ èkà.” 12Ŋusùa gblɔ̃ na Yoab be: “Ne wò hlɛ̃ klòsalò-gà èkà èwì vɔ àtɔ̃ (1000) ɖo àlɔ̀ mè na mù ŋutɔ cãa, nyè mu la tɔ àsi èfìɔ be èvia ŋuti ò, ɖoa, miabe ŋùku mè ye èfìɔa ɖè ègbè na wò ku Abisai kudo Itai be: 'Mì wɔ̀ blɛ̀wù ku Àbsàlɔm, ɖèkajɛvia, na mù!' 13Eye, ne mù wù ì vɔ̀, gblɔ̃ be nyè mu sè èfìɔa be ègbè kè be ɖè na mì ò a, èfìɔa la va nya be mù ɖàjè, ɖoa, èfìɔa nyana ènu sia ènu, eye wò ŋutɔ cã a, wò mu la xɔ̀ ènyà ɖo ènu nyè ò.” 14Yoab gblɔ̃ be: “Nyè mu la gu gàmè, la nɔ ɖo èto wò, lè fikèa ò!” Yoab sɔ èhuã ètɔ̃#18.14 Èhuã: Lè Hebrùgbe mèa, èkpò ènu cɔ̃kui ye wo gblɔ̃, ɖo àsi, eye be yì sɔ wo trɔ̃ Àbsàlɔm kè kpɔ̀tɔ̀ lè àgbè, lè àya mè, lè àtia ŋutia be èji nu. 15E yomè a, Yoab be àdèkplɔ̀vi èwo cã sɔ ènu trɔ̃ Àbsàlɔm, eye wo wù ì. 16Ekèa yomè a, Yoab na, wo ku èzè, eye àhùakɔ̃a trɔ lè Izràɛlviwo be gbãdãgbãwo yomè, ɖoa, Yoab na àhùaa tɔtè. 17Wo sɔ Àbsàlɔm be àmèkpòtia dãŋùgbe ɖo èdo gã ɖe mè, lè àvea mè. E yomè a, wo fɔ̀ èkpe li èkɔ gã ɖe ɖo e ji. Wàlɛbɛ ŋua, Izràɛlviwo be àhùakɔ̃ kèwo ye lè Àbsàlɔm yomè awo si jo, eye àmè sia àmè yì àxomè.

18Wàlɛbɛ kè Àbsàlɔm nɔ̀ àgbèa, e na wo li èkpe ɖe kè lè tèpe kè wo yɔna be Èfìɔ be Bàlì mèa, ɖoa e gblɔ̃nà be: “Ŋusùvi ɖekpe mu lè àsi nyè kè la le nyìkɔ nyè ɖotè ò.” Àbsàlɔm sɔ yebe nyìkɔ na èkpe kè wo lia, eye wo gbà yɔna ɛ̀ egbè be 'Àbsàlɔm be Kpèli'.

David sè be Àbsàlɔm ku

19Ahimas, Sadɔk be èvia gblɔ̃ na Yoab be: “Ɖè èmɔ̃ na mù, ne ma pu dù, sɔ ènyà nyuɛ̃a yì na èfìɔa, be Tɔhonɔ̀ sò jɔ̀jɔɛ na ɛ̀, ekè Tɔhonɔ̀ hlùɛ̃ èfìɔa gã, so yebe èkɛ̃tɔwo si mèa.” 20Yoab ɖo e ŋuti na Ahimas be: “Egbèa, mu la nyi ènyà nyuɛ̃ ye wò le hɛ̃ yì ò, ɖoa, èfìɔa be èvi ye ku.” 21Eye Yoab gblɔ̃ na Kusì be kluvi ɖe be: “Èwò yaa, yì gblɔ̃ ènu kè wò kpɔa na èfìɔa!” Kusì ŋusùa do èta gũ na Yoab eye be pu dù jo. 22Sadɔk be èvi, Ahimas gbà gblɔ̃ na Yoab be: “Nyè cã mù la pudù, la jè Kusì ŋusùa yomè! Ɖè èmɔ̃ na mù, ne ma yì! Ènu kè la jɔ̀ a, ne jɔ̀!” Yoab gbà gblɔ̃ be: “Èvi nyè, nukɛ ŋuti wò cã, wò jro be yèa pudù yì kpò ye, ekè àŋɛ̀ kèa mu nyi ènyà nyuɛ̃ kè la hɛ̃ àjɔ̀ ɖe va na wò ò?” 23Ahimas ɖo e ŋuti be: “Mù la pudù yì! Ènu kè la jɔ̀ a, ne jɔ̀!” Yoab gblɔ̃ na ɛ̀ be: “Eŋuã yì!” Eye Ahimas pudù jè Yɔrdàn be ètɔ̀a be ànyigbã gbàjàa be èmɔ̃ ji, eye be yì to Kusì ŋusùa ŋuti.

24Wàlɛbɛ ŋua, David nɔ̀ ànyi lè èdù-gbɔa be hɔ̃tru èvèawo dòmè. Èmɔjikpɔtɔ ɖèka lè èmɔjikpɔ-xɔ̀ kè lè èdù-kpaa tamèa mè, le kpɔ èmɔ̃a ji ɖoɖa. Ekè e kɔ ŋùmè yì èjia, e kpɔ ŋusù ɖe, ye ɖèka lè èdù ji gbãnà. 25Èmɔjikpɔtɔa do àpa sɔ sìa èfìɔa. Èfìɔa ɖo e ŋuti be: “Ne ye ɖèka ye gbãnàa, eŋuã, ègbè nyuɛ̃ ɖe ye lè ènu na ɛ̀, be hɛ̃ gbãnà.” Wàlɛbɛ kè ŋusùa pu dù gbãnàa, 26èmɔjikpɔtɔa gbà kpɔ ŋusù bu, gbà lè èdu ji gbãnà. Èmɔjikpɔtɔa do àpa gblɔ̃ ɛ̀ ɖoɖa àgbonu-ɖiatɔa be: “Kpɔɖa, ŋusù ɖèka bu ye nyi ekèa pu dù gbãnà!” Èfìɔa gblɔ̃ be: “E ye cã hɛ̃ ènyà nyuɛ̃ ɖe gbãnà.” 27Èmɔjikpɔtɔa gblɔ̃ be: “Mù le jèsi ŋusù cucugbã tɔ̀a be èdùpupu. Ahimas, Sadɔk be èvia tɔ̀ ye.” Èfìɔa gblɔ̃ be: “Àmè nyuɛ̃ ɖe ye be nyi. Àŋɛ̀ nyuɛ̃ ɖe ye be hɛ̃ gbãnà.”

28Ekè Ahimas va ɖoa, e do àpa, gblɔ̃ na èfìɔa be: “Ŋuti fàfa!” E cɔ̃ ŋùmè ànyi lè èfìɔa be ŋùkɔ̀, eye be gblɔ̃ be: “Èfìɔ bùbùtɔ, woa kafu Tɔhonɔ̀, èfìɔ bùbùtɔ be Mawu kè sɔ ŋusù kèwo ye jè àgla ɖo èfìɔ bùbùtɔ ŋutiawo do àsia!” 29Èfìɔa biɔ ɛ̀ sè be: “Àbsàlɔm, ɖèkajɛvia lè sɛ̃sɛ̃ ɖe a?” Ahimas ɖo e ŋuti be: “Wàlɛbɛ kè Yoab le dɔ̃ èfìɔ bùbùtɔ be sumɔ̃vi ɖèka ku sumɔ̃vi wòa, mù kpɔ be èzĩtɔ̀tɔ gã ɖe lè, vɔ̀a nyè mu nya ènu kè ŋuti ye ò.” 30Èfìɔa gblɔ̃ na ɛ̀ be: “E nyɔ! Va yì nɔ̀ àkpa ɖèka.” Ahimas zɛ̃, eye be yì nɔ̀ àkpa ɖèka. 31Ekèa yomè a, Kusì ŋusùa va ɖo. Kusì ŋusùa gblɔ̃ na èfìɔa be: “Mù hɛ̃ ègbè nyuɛ̃ ɖe va na èfìɔ bùbùtɔ be: Tɔhonɔ̀ sò jɔ̀jɔɛ na wò, lè àmè kèwo keŋu jè àgla ɖo ŋuti wòawo simè egbè.” 32Èfìɔ biɔ Kusì ŋusùa sè be: “Àbsàlɔm, ɖèkajɛvia lè sɛ̃sɛ̃ ɖe a?” Kusì ŋusùa ɖo e ŋuti be: “Ènu kè jɔ̀ ɖo ɖèkajɛvi kèa jia, la jɔ̀ ɖo èfìɔ bùbùtɔ be èkɛ̃tɔwo ku àmè kèwo keŋu le ji èvuɛ̃ na èfìɔ bùbùtɔa ji!”

Currently Selected:

2Samuɛl 18: GEN

Highlight

Copy

Compare