2Samuɛl 19

1Ekè èfìɔa sè ènyà kèa, e pò kpàkpàkpà. E yì èxɔ̀ kè lè èdù-gboa tamèa mè, yì fã àvi. E le gblɔ̃ be: “Aò, èvi nyè Àbsàlɔm! Aò, èvi nyè! Nukɛ ŋuti nyè ŋutɔ, nyè mu ku ɖo tèpe wò ò? Aò, Àbsàlɔm nyè!” 2Wo yì gblɔ̃ na Yoab be: “Kpɔɖa, èfìɔa le fã àvi, eye be le na àle ɖo Àbsàlɔm ŋuti.” 3Lekea ye èjiɖùɖua trɔ zũ èfũlòlo na àhùakɔ̃ bliboa, ɖoa, àhùakɔ̃a sè, gbè ŋua gbè be: “Èfìɔa le xànu ɖo èvia ŋuti ŋutɔ.” 4Gbãdãgbãawo gbɔ̀ va ɖo èdùa mè, lè bèbe mè, sìgbè gbãdãgbã kèwo èŋù le kpɛ̃, be yèwo si, lè àhùa-gbe jia nène. 5Èfìɔa yaa, e sɔ àvɔ cɔ̃ ŋùmè, eye be kpɔ̀tɔ̀ lè àpa ji, le gblɔ̃ be: “Aò, èvi nyè Àbsàlɔm! Aò, èvi nyè! Àbsàlɔm nyè! Aò, èvi nyè!”

6Yoab va kpɔ èfìɔa le èxɔ̀a mè, eye be gblɔ̃ na èfìɔa be: “Egbèa, wò le do ŋùkpɛ̃ àpo gbãdãgbã kèwo ye hlùɛ̃ wò gã, hlùɛ̃ ŋusùviwo, nyɔ̃nùviwo, èsrɔ̃wo ku àzìãvi wòwo gãa. 7Wò yaa, wɔ̀ lɔ̃nà àmè kèwo ye crìnà wòa, wò crìnà àmè kèwo ye lɔ̃nà wòa. Egbèa, wò ɖè è fiɔ be àhùakɔ̃ wò be ŋùkɔ̀nɔ̀tɔwo ku gbãdãgbã kèwo sumɔna wòawo mu ɖì ènu ɖekpe na wò ò. E nyɔ! Mù kpɔ fifì be, ne Àbsàlɔm gbà kpɔ̀tɔ̀ ci àgbè, eye miawo keŋu, mi kua, e la kè jɔ̀jì na wò wu! 8Fifìa, wò la sitè, eye wò la yì gblɔ̃ ènyà ɖe, la sɔ do ŋusɛ̃ gbãdãgbã wòawo. Ɖoa, mù tà Tɔhonɔ̀ na wò be, ne wò mu yì ò a, woa dòmètɔ ɖekpe mu la gbà nɔ̀ ŋuti wò, ŋùkèkè ɖèka tigɔ̃ kpe è ò! Ekèa la nyrã na wò wu ènu kèwo keŋu jɔ̀ ɖo ji wò, so àpo ɖèvi mè, kaka va na fifìa.” 9Ekèa yomè a, èfìɔa sitè, eye be va nɔ̀ ànyi lè àgboa nu. Wo yì gblɔ̃ ɛ̀ na àhùakɔ̃a be: “Kpɔɖa, èfìɔa va nɔ̀ ànyi ɖo èdù-gboa nu!” Eye gbãdãgbãwo keŋu va bɔ̀ ɖo ŋùkɔ̀ na èfìɔa.

Dùkɔ̃a biɔ David be ne trɔ gbɔ̀

Àbsàlɔm be gbãdãgbãwo keŋu si, eye woa dòmètɔ ɖe sia ɖe yì yebe àxomè. 10Lè Izràɛlviwo be kɔ̀tawo keŋu mèa, dùkɔ̃a keŋu le dɔ̃ ènyà veve ɖe. Wo le gblɔ̃ be: “Èfìɔ David hlùɛ̃ mi, lè miabe èkɛ̃tɔwo si mè. Veve tɔa, e xɔ̀ mi lè Filistìtɔwo si mè. Vɔ̀a, fifìa, ye ŋutɔ va si jo lè èdùa mè, lè Àbsàlɔm nu. 11Vɔ̀a, Àbsàlɔm kè mi sɔ ɖofìɔa ku lè àhùa-gbe ji. Fifìa, nukɛ ye mi gbà le nɔ̀tè kpɔ, ne mia na, ne èfìɔ David bèa trɔ gbɔ̀ ò?”

12Èfìɔ David cã do àŋɛ̀ kèa ɖoɖa hũbonɔ Sadɔk ku Abiatàr be: “Mì pò nupo ku Yudà be jìjimèviwo be àmèsĩsĩwo be: 'Nukɛ ŋuti ye mì be yèwo ye la nyi àmè kpɔ̀tɛ kèwo ye la kplɔ̀ èfìɔa yì àxomè ɖo, wàlɛbɛ kè ènyà kèwo Izràɛl be dùkɔ̃ bliboa le gblɔ̃a, va ɖo èfìɔa gbɔ, lè àfi kè be lèa ò? 13Nɔ̀vi nyèwo ye mì nyi. Èpu nyè ku ŋutilã nyè ye mì nyi. Nukɛ ŋuti, mì be yèwo la nyi àmè kpɔ̀tɛ kèwo ye la va kplɔ̀ èfìɔa gbɔ̀ ɖo ò?' 14Eye mìa yì biɔ Àmasà be: 'Mu nyi èpu nyè ku ŋutilã nyè ye wò nyia?' Mawu ne dɔ̃ èto na mù veve ɖe, ne nyè mu sɔ wò ɖo Yoab tèpe, lè àhùakɔ̃ nyèa nu, kaka sɔ yì ò a!” 15Nène a, David be ènyà gbɔ̃gblɔ̃ trɔ Yudà-nyigbã jitɔwo keŋu be èjì, sìgbè àmè ɖèka be èjì nène. Àmè kèawo do àŋɛ̀ ɖoɖa èfìɔa be: “Èwò ku àpo sumɔ̃viwo kpata, mì trɔ gbɔ̀!”

David sɔ Simei be àgɔ̀jèje kè è

16Ekè èfìɔ David trɔ gbãnà Yèruzàlɛm be èdùa mèa, Yudà-nyigbã jitɔwo keŋu va Gilgàl, la dogò è: ne woa kplɔ̀ ɛ̀ sɔ sò Yɔrdàn be ètɔ̀a. 17Simei, Gerà, Bɛnyamìn be jìjimè ŋusù, so Bàhurìm, ɖèbla va Gilgàl ku Yudà-nyigbã jitɔwo, la va dogò èfìɔ David. 18Bɛnyamìn be jìjimèvi èkà èwi vɔ àtɔ̃ (1000) kpe ɖo Sibà, Saolò be xòmèa be sumɔ̃vi, ku yebe ŋusùvi woètɔ̃ kudo yebe sumɔ̃vi èwì ŋuti, kplɔ̀ Simei va. Àmè kèawo ɖo la ɖèbla va ɖo ètɔ̀a to, jè ŋùkɔ̀ na èfìɔa, 19wàlɛbɛ kè ètɔ̀ji-hũ la kɔ èfìɔ be xòmèa, sɔ sò ètɔ̀a, ne woa wɔ̀ ènu kè èfìɔa jro a. Ekè èfìɔ le sò Yɔrdàn be ètɔ̀a, Simei, Gerà be èvia, cɔ̃ ŋùmè ànyi ɖo èfìɔa be àfɔ̀ nu. 20E gblɔ̃ na èfìɔa be: 'Àpetɔ nyè, èfìɔ bùbùtɔ mu gbà sɔ àgɔ̀ na mù ò. Tɔ̀ wò jɔ̀! Mù gbà ɖoŋù àgɔ̀ kè sumɔ̃vi wò jè, gbè kè gbè, àpetɔ nyè, èfìɔ bùbùtɔ jo lè Yèruzàlɛm ò. Ènu kèa mu gbà ci èjì mè na èfìɔ bùbùtɔ ò! 21Ɖoa, sumɔ̃vi wòa nya ɛ̀ be: “Mù jè àgɔ̀.” Vɔ̀a, egbèa, mù va, jè ŋùkɔ̀ na Yosɛ̀f be jìjimèa keŋu, la va dogò àpetɔ nyè, èfìɔ bùbùtɔ.” 22Abisai, Seruyà be ŋusuvia gblɔ̃ be: “Ekèa kpò ŋuti ye wo mu la wù Simei, àmè kè sɛ̃kpɛ̃ na Tɔhonɔ̀ be àmè sì àmì na ò a?” 23Eye David gblɔ̃ be: “Ènyà kɛ ye kã mìa Seruyà be èviwo ò? Nukɛ ŋuti ye mì jro be ma ɖì àmè kè le do èhùɛ do àmèa ɖo ò? Egbè be ŋùkèkè kèa ji, ye wo la wù àmè lè, le Izràɛl-nyigbã jia? Nyè mu kã ɖo e ji be mù nyi èfìɔ lè Izràɛl nu egbèa?” 24Eye èfìɔa gblɔ̃ na Simei be: “Wò mu la ku ò.” Eye èfìɔa kã àtãŋu na Simei ɖo e ji.

David jrà ye ku Mefibosɛt dòmè ɖo

25Mefibosɛt, Saolò be tɔgbeyɔvia cã va dogò èfìɔa. So kaka gbè kè gbè èfìɔa jo lè èdùa mè, kaka va na gbè kè gbè èfìɔa trɔ gbɔ̀ va Yèruzàlɛm, lè ŋuti fàfa mèa, Mefibosɛt mu kpà yebe ègɛ̃ ò; mu gbà klɔ yebe àfɔ̀wo kpɔ, kaka la va nyà yebe àwùwo ò. 26Vɔ̀a, ekè Mefibosɛt va dogò èfìɔa lè Yèruzàlɛm be èdùa mèa, èfìɔa biɔ ɛ̀ be: “Mefibosɛt, nukɛ ŋuti wò mu kplɔ̀ mù do jo ò?” 27Mefibosɛt ɖo e ŋuti be: “Àpetɔ nyè, èfìɔ bùbùtɔ, sumɔ̃vi nyè ye flù mù. Ɖoa, sumɔ̃vi wò gblɔ̃ be: 'Ekè nyè mu teŋu zɔ̃nà ò a, mù la na woa bla àkpà na èsɔ-àkɛtɛ-nɔ nyèa, mù la lia e ji, eye mù la kplɔ̀ èfìɔa do.' 28Vɔ̀a, sumɔ̃vi nyèa va ɖa àjè ɖo sumɔ̃vi wò si na àpetɔ nyè, èfìɔ bùbùtɔ. Gãkea, àpetɔ nyè èfìɔ bùbùtɔ lè sìgbè Mawu be àtikplɔtɔ nène. Ne wɔ̀ ènu kè jè ŋùmè na ɛ̀a. 29Èfìɔ bùbùtɔ kpɔ be àmè kèwo ye jè na èkuawo kpò ye lè tɔgbe nyè Saolò be xòmèa mè. Gãkea, wò ɖè èmɔ be sumɔ̃vi wò, ne nɔ̀ èwò ku àmè kèwo ye ɖùnà ènuawo dòmè. Èmɔnu ɖekpe mu gbà lè àsi nyè, ne ma gbà biɔ àdɔ̀mè nyuɛ̃ bu, èfìɔ bùbùtɔ ò.” 30Èfìɔa gblɔ̃ be: “E nyɔ! Ènupo fuu mu gbà hiã ò. Mù ɖo è be: Èwò ku Sibà, mì la mã Saolò be àgblè-nyigbãwo lè mìa nɔ̀nɔwo dòmè.” 31Eye Mefibosɛt ɖo e ŋuti na èfìɔa be: “Sibà ɖèka teŋu sɔ ànyigbãawo keŋu fàa. Kè èfìɔ bùbùtɔ gbe gbɔ̀ va àxue, lè ŋuti fàfa mè kpòa, e sù.”

Bàrzilaì

32Bàrzilaì, Gilead ŋusùa, cã so Rogelim va dogò èfìɔa, sɔ sò Yɔrdàn be ètɔ̀a, eye wo klã èmɔ le ètɔ̀a to. 33Bàrzilaì sĩ sùgbɔ. E ɖo èpè èkà èvè. Àmè ɖìnyi be nyi, eye àlɔ̀mè lè e si. Wàlɛbɛ kè èfìɔa jo, yì ci Mahanaim a, Bàrzilaì ye sɔna ènu ɖùɖu ku ènu zãzãwo ɖoɖana èfìɔa. 34Èfìɔa gblɔ̃ na Bàrzilaì be: “Bàrzilaì, kplɔ̀ mù do yì Yèruzàlɛm. Wò la nɔ̀ gbɔ nyè, eye mù la lebè na wò.” 35Bàrzilaì ɖo e ŋuti na èfìɔa be: “Èpè nenè ye gbà kpɔ̀tɔ̀ na mù, ne ma nɔ̀ àgbè, ne ma kplɔ̀ èfìɔ do yì Yèruzàlɛm ò? 36Egbèa, èpè èkà èvè (80) ye mù ɖo. Mù la gbà teŋu do vòvòtoto ènu nyuɛ̃ ku ènu mà-nyɔ̃ dòmèa? Èfìɔ bùbùtɔ be sumɔ̃via gbà nya vivisèse lè ènu kè be ɖùnà ku ènu kè be nùnàa mèa? Mù la gbà teŋu sè èhàjìtɔ-ŋusùwo ku èhàjìtɔ-nyɔ̃nùwo be ègbèa? Nukɛ ŋuti, àpo sumɔ̃vi la gbà va nyi àgbã na àpetɔ nyè èfìɔ bùbùtɔ ɖo ò? 37Ɖe kpò sumɔ̃vi wò teŋu kplɔ̀ èfìɔ bùbùtɔ, sɔ sò Yɔrdàn be ètɔ̀a. Nukɛ ŋuti èfìɔ bùbùtɔ jro be yèa ɖo e tèpe na mù ku àjɔ̀ kèa hati ɖo ò? 38Tɔ̀ wò jɔ̀. Ɖè èmɔ na sumɔ̃vi wò, ne bèa trɔ yì àxue, ne ma ku lè ètɔ nyè ku ènɔ̀ nyèwo be ɖìpe gbɔ. Vɔ̀a, kpɔɖa, sumɔ̃vi wò, Kimham ye nyi ekèa. E ya, ne kplɔ̀ èfìɔ bùbùtɔ do, eye èfìɔ bùbùtɔ ne wɔ̀ ènu kè be jro la wɔ̀a, na e ya bòhũ.” 39Èfìɔa ɖo e ŋuti be: “E nyɔ! Kimham ne kplɔ̀ mù do. Mù la wɔ̀ ènu kè wò jro a na ɛ̀. Eye ènu kè wò jro, so gbɔ nyè kpòa, mù la wɔ̀ ɛ̀ na wò.

40Dùkɔ̃a keŋu sò Yɔrdàn be ètɔ̀a. E yomè a, èfìɔa cã sò è. Èfìɔa kpla àsi èkɔ̀ na Bàrzilaì, eye be tusì na ɛ̀. Bàrzilaì trɔ yì àxue. 41Èfìɔa tùtà Gilgàl, eye Kimham kplɔ̀ ɛ̀ do.

Izràɛlviwo ku Yudàviwo be àjrè

Yudà-nyigbã jitɔwo keŋu ku Izràɛl-nyigbã jitɔ kèwo ye so àvegoawo be mamã mè kplɔ̀ èfìɔ sò ètɔ̀a. 42Ekè Izràɛl-nyigbã ji ŋusùwo so àvego, va dogò èfìɔa, wo biɔ èfìɔa be: “Nukɛ ŋuti mia nɔ̀vi Yudà ŋusùwo fĩ wò lè mia si, eye wo kplɔ̀ èfìɔ bùbùtɔa ku yebe xòmètɔwo sò Yɔrdàn be ètɔ̀a, wàlɛbɛ kè David be gbãdãgbãwo lè èfìɔa ŋuti ò?” 43Yudà ŋusùwo keŋu ɖo e ŋuti na Izràɛl ŋusùwo be: “Ekè miabe èfìɔa so miabe kɔ̀ta mèa ŋuti ye. Nukɛ ye le ve mìawo ya fifì ò? Ɖe ye mi ɖù èfìɔa be ènu ɖe loo, àlo, mi xɔ̀ ènu nana ɖe lè e si?” 44Izràɛl ŋusùwo ɖo e ŋuti na Yudà ŋusùwo be: “Miawo yaa, mi ɖo àkpa èwo, lè èfìɔɖùɖu gomè, eye lè David gomèa, mi nyi àmè gãxo na mì. Vɔ̀a ɖe, nukɛ ŋuti ye mì jro be yèwoa ɖìgbɔ mi ò? Àlo, mu nyi miawo ye gblɔ̃ cucugbãa be, mia kplɔ̀ miabe èfìɔa gbɔ̀ ò a?” Vɔ̀a, Yudà ŋusùwo be ènyà sɛ̃ŋu wu Izràɛl ŋusùwo, lè ènyà dɔ̃dɔ̃ mè.

Currently Selected:

2Samuɛl 19: GEN

Highlight

Copy

Compare