2Samuɛl 17

1E yomè a, Ahitofɛl gblɔ̃ na Àbsàlɔm be: “Ɖè èmɔ na mù, ne ma cã gbãdãgbã hotu-àdɛ̃, ne mia jè David yomè, egbè èzã mè. 2Ne ènu tìkɔ̀ na ɛ̀a, mù la yì kɔ̀ ɖo e ji, lè àvò mè. Mù la do vɔ̃vɔ̃ na ɛ̀, eye yebe àhùakɔ̃a keŋu la si, eye wàlɛbɛ kè èfìɔa ɖèka la ci ànyia, mù la wù ì. 3E yomè a, mù la kplɔ̀ àmèha bliboa gbɔ̀ va gbɔ wò. Ne àmè kè wò jro la crɔ̃a gbe ku kpòa, dùkɔ̃ bliboa keŋu la trɔ gbɔ̀ va, na wò, eye wò la nɔ̀ àgbè lè ŋuti fàfa mè.”

4Susu kèa jè ŋùmè na Àbsàlɔm ku Izràɛl be àmèsĩsĩwo keŋu. 5Àbsàlɔm gblɔ̃ be: “Yɔ Husai, Arkì ŋusùa cã va, ne mia kpɔ ènu kè e cã susu, so ènyà kèa ŋutia ɖa!” 6Ekè Husai yì Àbsàlɔm gbɔa, Àbsàlɔm gblɔ̃ na ɛ̀ be: “Ènyà kè Ahitofɛl gblɔ̃a ye nyì ekèa. Ɖe ye mi la wɔ̀ ɖo e jia? Ne mi mu la wɔ̀ ɖo e ji ò a, wò ŋutɔ gblɔ̃ ɛ̀.” 7Husai ɖo e ŋuti na Àbsàlɔm be: “Àɖàŋù kè Ahitofɛl ɖo fifìa mu nyi ekè sɔ̀gbèa ò.” 8Husai yì e ji, gblɔ̃ be: “Wò ŋutɔ, wò jèsi ètɔ wò ku yebe àmèwo be wo nyi kãlìwo. Àdã lè ŋùmè na wo, sìgbè sisiblìsi kè ŋuti wo sɔ èvi jo lè, lè ègbe mèa nène. Ètɔ wò kè nyi àhùawɔ̀tɔa, mu la ci àhùkɔ̃a gbɔ dɔ̃ ò. 9Wàlɛbɛ kè mi lè kèa, e la bè ɖo àkpã-do ɖe mè, àlo, àfi bu. Eye, ne so gɔ̃mè jèje a kpò, àmèwo ci àhùa lè mia dòmèa, àmèwo la sè è, eye wo la gblɔ̃ be: 'Àhùakɔ̃ kè lè Àbsàlɔm yomè be àmèwo le ci àhùa!' 10Eye gbãdãgbã kè nyi kãlìwɔ̀tɔ, eye yebe èjì lè sìgbè èkpɔ̃ be èjì nène ŋutɔ cã a, la gbɔjɔ ɖoa, Izràɛl dùkɔ̃ bliboa nya be ètɔ wòa, kãlìwɔ̀tɔ ye be nyi, eye àmè kèwo keŋu lè e ŋutiawo keŋu nyi gbãdãgbã ŋusù kãlìwɔ̀tɔwo. 11Ènyè yaa, àɖàŋù nyèa ye nyì ekèa be: Wò la yɔ Izràɛlviwo be gbãdãgbãwo keŋu, so Dàn-nyigbã ji, kaka va Beɛr-Ceba be ànyigbã ji bɔ̀, àleke be woa sùgbɔ, sìgbè èkɔkui lè àpùta nène, eye wò ŋutɔ wò la nɔ̀ ŋùkɔ̀ na wo. 12Mi la jè David ji, lè àfi ɖekpekpe kè be la nɔ̀a. Mi la yì jè e ji, sìgbè leke àhũ jènà ànyigbã jia nène. David ŋutɔ ku àmè kèwo keŋu lè e ŋutiawo dòmètɔ ɖekpe mu la kpɔ̀tɔ̀ ò. 13Ne wo si, la yì bɔ̀ lè èdù ɖe mèa, eŋuã, Izràɛlviwo be gbãdãgbãwo keŋu la hɛ̃ èkà va èdù kèa mè; mi la do èkà èdùa mètɔwo, la dɔ̃ wo yì kɔ̀ ɖo ètɔ̀ wɔ̀-àdãa mè, àleke be èkpekui ɖèka pɛ mu la gbà ze lè ètɔ̀a mè ò.”

14Àbsàlɔm ku Izràɛl ŋusùwo gblɔ̃ be: “Husai, Arkì ŋusùa be àɖàŋù nyɔ wu Ahitofɛl be àɖàŋù.” Lè nyàwototo mèa, Tɔhonɔ̀ ye ji be yèa gble Ahitofɛl be àɖàŋù kè mu nyrã ò a mè, ne bèa sɔ hɛ̃ jɔ̀gbèvuɛ̃ va Àbsàlɔm ji.

15Husai yì gblɔ̃ na hũbonɔwo, Sadɔk ku Abiatàr be: “Àɖàŋù kè Ahitofɛl ɖo na Àbsàlɔm ku Izràɛl be àmèsĩsĩwoa ye nyi ekèa. Àɖàŋù kè nyè cã mù ɖo na woa ye nyi ekèa. 16Fifìa, mì dɔ̃ àmè kaba, ɖoɖa David. Mi na ne wo ne to na ɛ̀ be: 'Mù gbà ci Yɔrdàn be ètɔ̀a sòpe dɔ̃ lè zògbè a be gbàjàa ji egbè ò. E lè veve ɖe be wòa sò ètɔ̀a bòhũ, ne mu nyi nène ò a, wo la crɔ̃ èfìɔ bùbùtɔ ku àmèha kè kpata kplɔ̀ ɛ̀ do a.'”

17Yonatàn, Abiatàr be èvia, ku Ahimas, Sadɔk be èvia, lè ènunyatɔwo be ètɔ̀a nu, lè Ein-Rogɛl. Sumɔvi nyɔ̃nù ɖe ɖo la hɛ̃ àŋɛ̀doa va na wo, eye woawo ŋutɔ, wo ɖo la sɔ àŋɛ̀doa yì na èfìɔ David, ɖoa, wo mu ɖo la ɖo èdùa mè, ne àmèwo ne va kpɔ wo ò. 18Gãkea, ɖèkajɛ ɖe kpɔ wo, eye be yì to na Àbsàlɔm. Àmèdɔ̃dɔ̃ èvèawo ɖèbla jo, eye wo yì Bàhurìm ŋusù ɖe be àxomè. Vudo ɖe lè àxuea mè, eye wo ɖo vudoa mè. 19Àxuenɔ̀a vlũ àvɔ ɖo vudoa nu, eye be sia èbli ɖo àvɔa ji, àleke be wo mu la teŋu susu ènu ɖekpe so e ŋuti ò. 20Àbsàlɔm be àmèdɔ̃dɔ̃wo va ɖo nyɔ̃nùa gbɔ, biɔ ɛ̀ sè be: “Fikɛ ye Ahimas ku Yonatàn lè ò?” Nyɔ̃nùa ɖo e ŋuti na wo be: “Wo va yì ètɔ̀a godo.” Ekè àmèdɔ̃dɔ̃awo ji Yonatàn ku Ahimas, vɔ̀a, wo mu kpɔ wo ò a, wo gbà trɔ yì Yèruzàlɛm. 21Ekè Àbsàlɔm be àmè dɔ̃dɔ̃awo jo vɔ̀a, Yonatàn ku Ahimas trɔ to so vudoa mè; wo yì do àŋɛ̀a na èfìɔ David eye wo wu e nu be: “Ne sɔ̀, mì jè èmɔ! Àɖàŋù kè Ahitofɛl ɖo na Àbsàlɔm, ɖo mìa ŋutia ye nyi eŋuã. Mi sò ètɔ̀a kaba!” 22David ku àmèha kè lè e ŋutia jè èmɔ̃; wo tɔ ètɔ̀a sòso, eye kaka fɔ̃fɔ̃mè la ɖoa, àmè ɖekpe mu kpɔ̀tɔ̀ kè mu so ètɔ̀a ò.

23Ekè Ahitofɛl kpɔ be wo mu ɖo èto yèbe àɖàŋù ò a, e bla àkpà na yebe èsɔàkɛtɛ, eye be jo yì yebe àxomè, lè woa de. E wɔ̀ ɖoɖowo na yebe xòmèa, eye be do èkà ève. Wo ɖì ì ɖo ètɔa be yɔ̀do mè.

David ɖo Mahanaim

24Wàlɛbɛ kè David le ɖo Mahanaim be èdùa mèa ye Àbsàlɔm le sò Yɔrdàn ètɔ̀a ku Izràɛlviwo be àhùakɔ̃wo keŋu. 25Àbsàlɔm cã Àmasà, sɔ ɖo Izràɛlviwo be àhùakɔ̃a nu, lè Yoab tèpe. Vɔ̀a, Àmasà nyi Yitrà, Izràɛl ŋusù ɖe be èvi kè Àbìgaɛl ji na ɛ̀a. Àbìgaɛl nyi Nahas be èvi, Seruyà, Yoab be ènɔ̀ be yomètɔ̀. 26Àbsàlɔm do àsàɖa ku Izràɛl dùkɔ̃a ɖo Gilead-nyigbã ji.

27Ekè David gbe va ɖo Mahanaim kpòa, Sobi, Nahas be èvi so Amɔ̀n be jìjimèviwo be ànyigbã ji, lè Rabà, va ku Makìr, Amiɛl be èvi, so Lodebar kudo Bàrzilaì, Gilead ŋusù so Rogelim. 28Wo hɛ̃ àbawo, àbajivɔwo, àgbãwo, ku èlù, èpò, èwɔ, èblitɔ̀tɔ, àtiku sɛ̃sɛ̃wo, àtiji be àyi, èklùi, ku nuku mèmewo, 29ànyi-si, bɔtà, àlɛ̃wo kudo ènyì-lã gbàkudo ènu ɖùɖu buwo va na David ku àmèha kè kplɔ̀ ɛ̀ do a, ɖo, wo le gblɔ̃ be: “Àdɔ̀ wù àmèha a, ènu tìkɔ̀ na wo, eye sìkɔ cã tì wo, lè zògbè a ji.”

Currently Selected:

2Samuɛl 17: GEN

Highlight

Copy

Compare