2Màkàbeòwo 15
15
Nìkànɔr gbe be yè mu la do bùbu jɛ̃gbɔ̃zã a ŋuti ò
1Nìkànɔr ku yebe gbàdagbãwo sè be Yudà ku ye tɔ̀wo lè Sàmarìa be ènutowo mè. E ɖo è be yè a ɖè àhùa kpe na wo, jɛ̃gbɔ̃zã gbè, kè èvùɛ̃ ɖekpe mu la jɔ̀ ɖo yèwo ji o. 2Yudàtɔ kèwo ji wo zĩ be wo a kplɔ̀ ɛ̀ do, ne wo a wɔ̀ àhùa lè Nìkànɔr be àhùakɔ̃ a mèawo gblɔ̃ na ɛ̀ be: “Mù gbà crɔ̃ wo, to èhlɔ̃dãdã be èmɔ̃ nyràhũ ŋua ji ò! Vɔ̀ bòhũ a, do bùbu ŋùkèke kè Mawu wɔ̀ tɔ̀xɛ, eye be kɔ̀ e ŋuti, lè ŋùkèkèwo kpata dòmè a ŋuti. Mù gbà ŋlɔ̃be be Mawu le kpɔ ènu sia ènu ò!” 3Vɔ̀ a, àmè vlowo be àmè vlo kè a biɔ sè be: “Èfìɔ ɖe lè jiŋùkusi kè ɖè ègbè be wo ne nɔ ɖù jɛ̃gbɔ̃zã à?” 4Yudàtɔawo ɖo e ŋuti na ɛ̀ be “Ɛ̃ɛ, Èfìɔ kè lè jiŋùkusi a ye nyi Tɔhonɔ̀ àgbè-àgbè kè ŋutɔ ye ɖè ègbè be wo ne do bùbu ŋùkèkè àdrɛ̃gɔ̃ a ŋuti.” 5Nìkànɔr ɖo e ŋuti be: “E nyɔ̃, ènyè ya, mù nyi èfìɔ lè ànyigbã ji: mù le ɖè ègbè na mì be mì a sɔ àhùawɔ̀nuwo, ne mì a wɔ̀ ènu kè la ɖè àlè na èfìɔ a.” Gãke a mu teŋu wɔ̀ ɖo yebe èhlɔ̃dãtɔ be ɖoɖo a ò.
Yudà do ŋùsɛ̃ ye tɔ̀wo
6Nìkànɔr ɖɔ ku jajra, le susu be yè la li jiɖùɖu be ŋùkuɖojikpe ɖo Yudà ku yetɔ̀wo be àmèkòtiwo tèpe. 7Vɔ̀ a, Màkàbeò le jìdo mà-hùã ɖe ɖo àsi, eye be kã ɖo e ji, be Tɔhonɔ̀ la va xɔ̀ na yè. 8Ekè a ŋuti be dozò lãmè na ye tɔ̀wo be wo mu gbà vɔ̃ àhùa kè vòdu sumɔ̃tɔwo ɖè kpe na wo a ò. Vɔ̀ a, wo ne nɔ bù hùe kèwo kpata nu, Tɔhonɔ̀ hlùɛ̃ wo gã va yì a, eye wo ne kã ɖo e ji be, fifì a cã be Ŋusɛ̃kpatatɔ a la gbà na wo èjiɖùɖu ke. 9Yudà le do wo ŋusɛ̃ ku ènyà kèwo so Mosè be Èse a ku Glɔ̃ɖɛtɔwo be Xomawo mè a. E gbà ɖoŋu àhùa kèwo keŋu wo wɔ̀ va yì ku èjiɖùɖu a; leke a ye be le do wo ŋusɛ̃ a yeŋu. 10Kè be gbìgbɔ̀ fɔ̃ èzò lè lãmè na wo leke a vɔ̀ a, e ɖè leke vòdu sumɔ̃tɔ kèawo mu wɔ̀nà ɖo àtãŋu kè wo kã a ji òa, fiɔ wo. 11Leke a ye Yudà bla àkpà na yebe gbàdagbã ɖe sia ɖe, mu nyi ku àkpoxɔ̀nu, àlo, èhùã ò, vɔ̀ a, ku ŋusɛ̃ kè yebe kãkã ɖo e ji be ènyàwo do lãmè na wo a.
Lè ènùwuwu a, e gblɔ̃ èdrɔ̃ ɖe kè be ku, èdrɔ̃ kè wo ɖo la xɔ̀sè a na wo, eye be do jìjɔ̀ɛ na woa kpata a, èdrɔ̃ kè lè sìgbè àvìmènu nène a. 12Ènu kè Yudà kpɔ lè àvimè a ye nyi ekè a: E kpɔ Ònià, mawunɔ gã xoxoa, àmè kè ɖɔ ku èdɛ̃ nyuɛ̃wo sɔ̃ŋu a, mu nyi ècitɔ ò, vɔ̀ a, e wɔ̀nà àdɔ̀mè nyuɛ̃; àɖàŋù be ènyàwo ɖèɖe kpò ye tona lè ènu mè na ɛ̀. So kaka ɖèvi mè ke, be kpla ènu nyuɛ̃ ku ènu jɔ̀jɔ̀ɛ wɔwɔ lè. Yudà kpɔ Ònià, be kɔ àlò yì è ji, eye be le fãkùe ɖo Yudàviwo be dùkɔ̃ blibo a ta. 13E yomè a, Yudà gbà kpɔ ŋusù èta ɣe ɖe, e nyi àmè ɖìnyi, eye àcɛ̀ kpàkpa le ze lè yebe àmèti a mè. 14Ònià gblɔ̃ be: “Yèremìa kè nyi Mawu kè lɔ̃ mi a be gblɔ̃ɖɛtɔ a ye nyi ekè a. E le fãkùe ɖo miawo kè nyi nɔ̀viawo ta sùgbɔ, eye be gbà le fãkù e ɖo Yèruzàlɛ̀m, èdù kɔ̀kɔ̀ɛ a ta.” 15Yèrèmià drɛ̃ yebe ɖùsi-lɔ̀, sɔ sìka be èwui ɖe ɖoɖa Yudà. Kè be le sɔ ɛ̀ na ɛ̀ a, e gblɔ̃ be: 16“Èwui kɔ̀kɔ̀ɛ kè a, nyi ènu kè Mawu le na wò a. E la na, wò la flì èkɛ̃tɔ wòwo hlɛ̃.
Àhùa a gble do Nìkànɔr, eye be ku.
(1Mak 7.39-50)
17Yudà be nupo ɖɔ̀hùĩ kè be pòa gbìgbɔ̀ do èzò lãmè na yebe gbàdagbãwo, e gbìgbɔ fɔ̃ woabe kàlĩwɔ̀wɔ, eye be na be woa dòmètɔ kèwo gbà nyi ɖèkajɛviwo a sù, la wɔ̀ àhù a, sìgbè kãlìsu sĩsĩwo nène. Wo sè e gɔ̃mè be Yèruzàlɛ̀m, Mawu sɛ̃sɛ̃ ku Mawuxɔ̀ a lè àfɔ̀ku mè. Ekè a ŋuti, Yudàtɔwo kpɔ be, mu hiã be yèwo a gbà do àsàɖà ò, vɔ̀ a, yèwo a ɖè àhùa a kpe na èkɛ̃tɔ a, zè ɖèka, àleke be ènyà mè sòso a ne so àkɔ kè gbàdagbã ɖe sia ɖe la sɔ ŋusɛ̃, la kpe ku èkɔ̃tɔwo be gbàdagbã ɖe sia ɖe a mè. 18Wo mu bù woa srɔ̃wo, woabe èviwo, woa nɔ̀viwo ku woabe xòmètɔwo ŋuti sùgbɔ ò. Mawuxɔ̀ Kɔ̀kɔ̀ɛ a ye nyi ènu kè lè veve ɖe na wo cucugbã a. 19Àkpɔ̃ ɖɔ àmè kèwo ci Yèruzàlɛ̀m be èdù a mèawo veve ɖe. Wo le hũhũ, wàlɛbɛ kè wo le bù àhùa kè la jɔ̀ lè àgblè a ji a ŋuti.
20Woa kpata, wo le nɔ̀tè kpɔ gàmè kè gogo vɔ̀, eye wo nyã be àvũ a le jè e gɔ̃mè a. Èkɛ̃tɔwo be àhùakɔ̃ a va bɔ̀, eye wo le ɖo, na àhùa a. Wo kplɔ̀ àtiglinyiawo va ɖo àfi kè la dɔ̃ èkɛ̃tɔawo ji a, eye wo ɖo èsɔwo ɖo èto èvèawo mè. 21Yudà Màkàbeò le ŋùkuvi ɖo àhùakɔ̃ a be gbàdagbã gbogbo kè a ku woabe àhùawɔ̀nu vòvòvòwo kudo woabe àtiglinyi kèwo be àdã wɔ̀wɔ le ze a ŋuti. e kɔ àlò yìji, fãkùe yɔ Tɔhonɔ̀ kè teŋu wɔ̀ ŋùdãnuwo a. E nyã be mu nyi àhùawɔ̀nuwo be ŋusɛ̃ mè ye jiɖùɖu a lè ò. Vɔ̀ bòhũ a, Mawu be ènyà mè sòso ye be nyi. E ye sɔna jìɖùɖu a nana àmè kèwo be jè na a. 22Yudà fãkùe be: “Tɔhonɔ̀, wàlɛbɛ kè Èzekìas nyi Yudà be èfìɔ a, èwò ye dɔ̃ àpo àtikplɔtɔ ɖoɖa, eye be crɔ̃ gbàdagbã 185.000/hotu èkà-ve ci woèvè èkà wivɔàtɔ̃, lè Sènakèrib be àhùakɔ̃ a mè. 23Tɔ̀wò jɔ̀, Oò, jiŋùkusi be èfìɔ, gbà dɔ̃ àtikplɔtɔ nyuɛ̃ a ɖèka ɖo ŋùkɔ̀ na mi, fifì a cã a, be ne ɖo vɔ̃vɔ̃ ku àdìka sò àmè, ɖo èkɛ̃tɔwo be àmèha a dòmè. 24Sɔ àpo ŋusɛ̃ a pò àmè kèwo dojì, zũ wò, eye wo va ɖè àhùa kpe na àpo dùkɔ̃ kɔ̀kɔ̀ɛ a.” Ènyà kèawo ye Yudà sɔ wu yebe kùefã nu.
25Nìkànɔr be àhùakɔ̃wo zɔ̃ gbãnà, ɖo èkpɛ̃ kuku ku àhùa be èhàjìjiwo ji. 26Yudà ku yebe gbàdagbãwo cã kpe àkɔ ku èkɛ̃tɔ a, wàlɛbɛ kè wo le fã yɔ Tɔhonɔ̀ be ne va do yèwo àlɔ̀ a. 27Eye, wàlɛbɛ kè wo le wɔ̀ àhùa ku àlɔ̀ a, wo le fãkùe ku woabe èji blibo, eye wo wù àmè hotu woèadrɛ̃ èkà-wìvɔàtɔ̃ (35.000) tètè. Mawu be ŋusɛ̃ kè be ɖè fiɔ wo leke a, na wo kpɔ jìjɔ̀ɛ ŋutɔ.
28Kè wo wɔ̀ àhùa a vɔ̀ a, wàlɛbɛ kè Yudàtɔwo le jo lè àhùa-gbe a ji ku jìjɔ̀ɛ a, wo va kè ɖo Nìkànɔr be àmèkpòti ŋuti ku yebe àhùawɔ̀nuwo kpata. 29Ekè a na zigìdi ku jìjɔ̀ɛ be hòwɔ̀wɔ! Yudàviwo kpata tɔ àkpedodo na Tɔhonɔ̀, lè wao tɔgbewo be ègbè mè.
30Yudà kè nyi àmè cucugbã kè sɔna yebe ŋutilã ku èkla blibo a wɔ̀nà àvũ ɖo yebe èdù mèviwo ta a, eye, be lɔ̃ yebe dùkɔ̃ a, so kaka yebe ɖèvi mè ke a, ɖè ègbè be wo ne sò èta na Nìkànɔr, wo a sò yebe ɖùsi-lɔ̀ kpe ɖo e ŋuti, ne wo a sɔ wo yì Yèruzàlɛm. 31Ye ŋutɔ cã yì, eye be yɔ èdù a mètɔwo bɔ̀ ɖo mawuxɔ̀ a mè, eye mawunɔwo nɔ̀ vɔsakpe a be ŋùkɔ̀. E yomè a, e dɔ̃ wo yì yɔ gbàdagbã kèwo nyi ɖiatɔwo, lè àgbògbò a mè a va. 32E sɔ Nìkànɔr, àmè vlo a be èta a ku àbɔ kè be vlũ, wàlɛbɛ kè be le gblɔ̃ bùsunyà, jì mà-kplatɔ̀ ɖo Mawu ku Ŋusɛ̃kpatatɔ a be Mawuxɔ̀ a ŋuti a fiɔ woa kpata. 33E yomè a, e ɖè ègbè be wo ne sò àmèvlo kè a be àɖe, ne wo a flì ì wliwliwli, dà ɖoɖa xèviwo. E na wo do-kà àbɔ a, kpà ŋùkɔ̀ mawuxɔ̀ a, ne be a sɔ fiɔ, ènu kè ègòyiyi be àɖàhùa a hɛ̃ va na Nìkànɔr. 34Eye, àmè kèwo kpata lè funu a, wo kɔ ŋumè ɖoɖa jiŋùkusi, eye wo do àkpe na gogo be tɔhonɔ̀ a be: “Kafu na Àmè kè kpɔ yebe nɔ̀pe ji, kè èɖi mu jè e ŋuti ò à!” 35Yudà do-kà Nìkànɔr be èta cã ɖo àgbògbò a be èglì ŋuti, àleke be àmèwo kpata ne kpɔ hlùɛ̃gã kè Tɔhonɔ̀ na yebe dùkɔ̃ a ku ŋùku.
36Àɖàŋùɖèha a be àmè sia àmè dà àkɔ̀, sɔ ɖo è be wo mu ɖo la ŋlɔ̃be ŋùkèkè ŋua gbèɖe ò. Wo la nɔ ɖoŋù ì, èpè sia èpè, lè àzã kè la nɔ jè ŋùkɔ̀ na àzã kè nyi Màrdokìa be Àzã a gbè. Ekè a le nyi wètri woèvègɔ̃ (12) kè wo yɔna lè Aràmgbè mè be Àdrar a be ŋùkèkè woètɔ̃gɔ̃ a (13) gbè.
Ènuŋlɔ̃tɔ a be èta pò-nyà
37Nène a ye Nìkànɔr be àgbè a va yì ɖo a yeŋu. So kaka gà ŋua mèa, Yèruzàlɛ̀m be èdù a ci Yudàviwo be àlɔ̀ mè. Ekèa ŋuti nyè cã mù la wu àpe èxotùtu a nu ɖo fikè a. 38Ne ènu kè mù ŋlɔ̀ a nyɔ̃, eye be nyã sèsè a, eŋua, mù kpɔ ènu kè mù le ji a. Vɔ̀ a, ne mu sɔ̀gbè ò, eye mu jè àmè ɖe be ŋùmè òa, eŋua, nyè cã mù wɔ̀ ènu kè mù teŋu a. 39Ɖo a, mi nyã be mu nyɔ̃ be àmè ne nù àhà ɖèɖe, àlo, èsì ɖèɖe kpò ò. Vɔ̀ a, e vivina be wo a nù àhà kè wo kù èsì tɔ a. Nène a ye nyi àɖàŋù kè wo sɔ ŋlɔ̃nà èxotùnyà kè la vivi sèse, na àmè kèwo le sè è a, àlo, na àmè kèwo le hlɛ̃ ɛ̀ a. Ènyà kè a ye mù sɔ le wu èxotùnyà kè mù ŋlɔ̃ a nu.
Currently Selected:
2Màkàbeòwo 15: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.