2Màkàbeòwo 13
13
Àtiokus na wo wù Mènèlaòs
1Lè èpè èkà ètɔ̃ takpo ci àsiɖèkɛ (149) mè a, Yudà ku yebe gbàdagbãwo sè be Àtiokus Epatɔr ku yebe àhùakɔ̃ gbogbo ɖe zɔ̃ gbànà, la va ɖè àhùa kpe na Yudà-nyigbã a. 2Lizìas kè nyi èdù-dɔwɔ̀tɔ cucugbã a, eye be nyi àmè kè kpɔ èfìɔ a be hɛ̃hɛ̃ gbɔ a kplɔ̀ ɛ̀ gbãnà. Woa dòmètɔ ɖe sia ɖe lè ŋùkɔ̀ na àhùakɔ̃ kè mè Grɛkwo be gbàdagbã àfɔ̀zɔ̃tɔ hotu èkà ci woeàtɔ̃ (110000) ku èsɔdotɔ hotu èvè èkà-gbãvɔ èvè takpo (5300) kudo àtiglinyì èwì vɔ-vè (22), gbàkudo àhùa-kèkèvi èkà adrɛ̃ takpo (300) kè mè àmèwo le àgɔ̃wo ɖo àsi lè a.
3Mènèlàos yì bɔ̀ ɖo woa ŋuti, ku àyè ɖèɖe. E le do ŋusɛ̃ èfìɔ a be ne zɔ̃ yì ŋùkɔ̀. E le do ègbè kè a, èto mè na Ãtiokus, sɔ le ɖè yebe lɔ̃lɔ̃ ku ènyuɛ̃ kè be le ji na woa de-nyigbã a, gãke a, lè nyàwototo mè a, ènu kè be le ji a ye nyi be yè a gbà trɔ ɖo mawunɔ gã be èdɔ kè yè wɔ̀nà sã a mè. 4Vɔ̀ a, Tɔhonɔ̀ kè nyi èfìɔwo be Èfìɔ a, na Àtiokus do àdɔ̀mèze do Mènèlàos. Kè Lisìas ɖè è fiɔ èfìɔ a be ènu bàɖa wɔ̀tɔ kè a ye le hɛ̃ yèwo be èvùɛ̃ kèwo kpata le jɔ̀ ɖo yèwo ji fifìa va a, èfìɔ a ɖè ègbè be wo ne kplɔ̀ Lisìas yì Bèreò, ne wo a wù ì, sɔ zɔ̃ ɖo èdù a mè be èkɔ̀nuwo ji.
5Èmɔ̃jikpɔ-xɔ̀ gã ɖe lè èdù a mè. E kɔkɔ yìji àbɔglìgo èkà ci-wo (50), eye be ɖo ku àfi. Èmɔ̃ ɖe trona lè èmɔ̃jikpɔ-xɔ̀ a be ètamè. Àmè ɖiɖina lè èmɔ̃ a mè, so àkpa ɖe sia ɖe, jènà àfi a mè. 6Funu a ye wo kɔkɔna àmè kèwo jè àgɔ̀, ne wo fĩfĩ, lè vòduxɔ̀ a mè, àlo, wo wɔ̀ ènu bàɖà ɖe kè nyrã sùgbɔ a, yìnà: wo tùtùnà wo ɖoɖa, ne wo a yì ku lè àfi a mè. 7Enu kè a ye wo ɖo ɖɛ na Mènèlàos, ŋusù mà-wɔ̀ ànùkua kè a, kè mu ɖo èse, àlo, xɔ̀sè ò a, eye be ku, kè àmè ɖe mu la teŋu ɖì ì ò a. 8Ènu kè jè na ɛ̀ a, kpò ye kpe è ŋua! E jè àgɔ̀ sùgbɔ do Tɔhonɔ̀ be vɔsakpe kè be èzɔ̀ ku àfi nyi ènu kɔ̀kɔ̀ɛ̀wo a, ekè a ŋuti ye àfi mè ye be va ku ɖo a yeŋu.
Yudà ɖù Àtiokus ji lè Mòdin
9Èfìɔ Àtiokus yì yebe àzɔ̃lĩ a ji, wàlɛbɛ kè be le ɖè susu jiŋɔ̃wo a. E le ɖo è be yè a wɔ̀ ènu kèwo nyrã wu ekèwo yètɔ susu a ku Yudàtɔwo. 10Kè Yudà sè è a, e ɖo è na yebe dùkɔ̃ a be wo ne blìbɔ̀ na Tɔhonɔ̀, èzã ku keɖè, ne Tɔhonɔ̀ ne va xɔ̀ na yèwo, fifì a wu hùewo kèŋu nu. 11Èkɛ̃tɔ vòdusɛ̃tɔwo le ji la ɖè woabe Èse a jo lè woa si, la xɔ̀ woabe èdù a ku woabe Mawuxɔ̀ Kɔ̀kɔɛ a jo lè woa si. Vɔ̀ a, dùkɔ̃ kè a tɔ gbɔ̃gbɔ̃ lè vòvo mè a, mu kpɔ dìdì ò. Yudàtɔwo ɖo la fã yɔ Tohonɔ̀, ne Mawu mu gbà ɖè àsi lè woa ŋuti, ne wo a gbà jè vòdu sumɔ̃tɔ nyrãku kèawo be àlɔ̀ mè ke ò. 12Ènu kè a ye woa kpata, wo wɔ̀ ɖodu: ŋùkèkè ètɔ̃ sɔ̃ŋu a, wo cɔ̃ ŋùmè ànyi, le blìbɔ̀ na Tɔhonɔ̀, Mawu kè ɖo ku ènyùɛ̃ wɔ̀wɔ a, wo le fã àɖàsì, wàlɛbɛ kè wo le bla ènu a. E yomèa, Yudà gblɔ̃ àkɔfa-nyà na wo, eye be ɖè ègbè na wo be, wo ne jràɖo na àhùa wɔ̀wɔ.
13Kè be dogò ku Yudàtowo be àmèsĩsĩwo be àɖàŋùɖoha a tɔ̀xɛ ɖe yomè a, Yudà ɖo è be yè a sɔ ènyà a kpata do àsi na Mawu, ne yèwo a so jè èmɔ̃, kè yè mu la gbà nɔ̀tè be èfìɔ a be àhùakɔ̃ a, ne va cɔ̃ Yudà-nyigbã ji, àlo, ne va ɖo àlɔ̀ Yèruzàlɛ̀m be èdù a ji, gbɔ̀xue ò. 14Yudà sɔ àhùa a do àsi na xixe a be Ɖotɔ. E yomè a, e pò ètoɖo na yebe gbàdagbãwo be wo ne wɔ̀ àvũ kàlĩtɔ̀, kaka yì èku mè, ɖo woabe Èse a ku woabe èkɔ̀dowo ta, ɖo Yèruzàlɛ̀m, Mawuxɔ̀ a ku woabe èdù blibo a ta.
Yudà be àhùakɔ̃ a do àsàɖa ɖo Modìn be èdù a gbɔ. 15E sɔ ègbè do àsi kè a na yebe gbàdagbãwo be: “Mawu ye la ɖùji!” Yudà cã ɖèkajɛvi kèwo nyi kàlĩwɔ̀tɔwo lè gbàdagbãwo dòmè wu a, eye èzã mè a, wo ɖè àhùa kpe na èkɛ̃tɔwo be àsàɖa a be tèpe kè èfìɔ a be gòxɔ̀ lè a. Wo wù àgbètɔ sìgbè hotu ɖèka (2000) nène. Wo gbà wù àtiglinyi kè lòlò wu a, ku àmè kè dona ɛ̀ a. 16Àdìka sò àmè ku vɔ̃vɔ̃ gã ɖe nɔ̀ àsàɖa blibo a ji, kaka na gà kè mè, Yudà ku yebe gbàdagbãwo trɔ jo ku èjiɖùɖu, 17wàlɛbɛ kè èŋù tɔ kèkè a. Mawu be àlɔ̀do ku yebe àmè ji kpɔkpɔ ye na be wo teŋu wɔ̀ kàlĩsu be ènu kè a.
Àtiokus jrà ye ku Yudàviwo dòmè ɖo.
(1Mak 6.48-63)
18Èfìɔ Ãtiokus sɔ vevesèse kpɔ Yudàtɔwo be kàlĩnu wɔ̀wɔ, eye be sù na ɛ̀. Ekè a ŋuti be jro be yè a sɔ àyè, sɔ xɔ̀ Yudàtɔwo be tèpewo lè woa si. 19E sɔ àhùa ɖo Bait-Sur be èdù kè nyi àgbògbò sɛ̃ŋu ɖe be èdù a ŋuti, vɔ̀ a, Yudàtɔwo nyà ɛ̀ ɖoɖa ŋùgbe. Kè e trɔ va a, wo ɖù e ji veve ɖe. 20Yudà sɔna ènu kè hiã, na Bait-Sur be èdù mètɔ kèwo ji, wo le zĩ a, ɖoɖana wo. 21Vɔ̀a, Yudàtɔwo be gbàdagbã ɖe kè wo yɔna be Ròdòkus a gblɔ̃ àhùa be ènyà wawla ɖewo ɖoɖa èkɛ̃tɔawo. Kè wo ji ì a, wo le è, eye wo wù ì. 22Èfìɔ a gbà pò nupo ku àmè kèwo le hlùɛ̃ Bait-Sur be èdù a ta a, zè èvègɔ̃ a. E gblɔ̃ na wo be yèwo a wɔ̀ ŋutifafa, eye, kè wo lɔ̃ ɖo e ji a, e kplɔ̀ yebe àhùakɔ̃ a jo. 23E gbà trɔ, kpà ŋùkɔ̀ Yudà ku yebe gbàdagbãwo ke, vɔ̀ a wo gbà ɖù e ji ke.
Èfìɔ a sɔ Fìlipò ɖo èdɔ a nu, lè Ãtiokìa, kè be jo a, be ne nɔ kpɔ èfìɔɖùpe a ji. Kè be va sè be Fìlipò jè àgbla a, ekè a titɔ èfìɔ a. Èfìɔ a va jè ènyà mè jòjro ku Yudàviwo, ne woa ku ì, wo a gbà nɔ̀ nyuɛ̃ ɖe. E va lɔ̃ ɖo ènu kèwo Yudàtɔwo le ji a ji, eye be fìã àjɔ̀gbè be yè la do bùbu woabe jènawo kpata ji. Ne be a sɔ ɖo èkpe ɖèkawɔ̀wɔ kè a ji a, Èfìɔ a wɔ̀ vɔsa, sɔ do bùbu Mawuxɔ̀ a ŋuti, eye be wɔ̀ ènunana fàa. 24E xɔ̀ Yudà Màkàbeò nyuɛ̃ ɖe.
E yomè a, èfìɔ a cã Hèjèmònidò be ne nyi èdùjiɖùtɔ lè àgo kè so Tòlèmàis, kaka yì ɖo Gerà a. 25Ye ŋutɔ yì Tòlèmàis, vɔ̀ a, èdù a mètɔwo mu kpɔ jìjɔ̀ɛ so èkàdodo kè be wɔ̀ ku Yudàviwo a ŋuti ò. E ve àdɔ̀mè na wo, àleke be wo biɔ be wo ne gũ èkàdodo kè a nu. 26Lisìas sitè, hlùɛ̃ èta na èkàdodo kè a, leke be la teŋu ì a. E teŋu na yebe ètoɖotɔwo sè e mè; e na woabe susu mè va fa, eye wo va le kpɔ Yudàtɔwo ɖo èbu. Ekè a yomè a, e trɔ jo yì Ãtiokìa.
Leke a ye èfìɔ Àtiokus va ɖè àhùa kpe na Yudàviwo, ku leke be va si ɖo a yeŋu.
Currently Selected:
2Màkàbeòwo 13: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.