2Màkàbeòwo 12
12
Yudà biɔ èhlɔ̃ na Yopà ku Yàminà be Yudàtɔwo
1Kè Yudàtɔwo ku Lisìas gbe ɖùzò kè a vɔ̀ kpò a, Lisìas trɔ yì èfìɔ a gbɔ, eye Yudàtɔwo gbà tɔ woabe àgblèdèdè ji. 2Gãke a, lè àgo ŋua ji be èdùjiɖùtɔwo dòmè a, Tìmòteò ku Àpòlonìo, Gènèus be èvi a, Hìerònimò ku Dèmòfɔn, kudo Nìkànɔr kè nyi Kiprò be àgbàtè gbàdagbãwo be àhùaŋùkɔ̀nɔ̀tɔ a, mu le lɔ̃, le na Yudàtɔwo ne nɔ̀ àgbè, lè àgbɔ̃ jè èpò ku ŋutifafa mè ò. 3Wàlɛbɛ ŋua ye Yopa be èdù mètɔwo wɔ̀ ènu nyɔ̃ŋu gã ɖe. Wo wɔ̀nà sìgbè àmè kèwo mu ɖènà susu vuɛ̃ ɖekpe so Yudàtɔwo kèwo lè woabe èdù mè a ŋuti ò nène. Gbè ɖèka a, wo kpe Yudàtɔwɔ ku woa srɔ̃wo kudo woabe èviwo be yèwo a ɖìsà yì àpù ji, ku àklo ɖewo kè woa ŋutɔ, wo jràɖo ɖo ɖɛ, ɖo èvùɛ̃ kè a ŋuti a. 4Kè e nyi be èdù a mètɔwo kpata ye ɖo è, be yèwo a kpe Yudàtɔwo a, Yudàtɔwo mu jè àyè na ènu ɖekpe ò. Wo lɔ̃ ɖo kpekpe a ji, ɖo a, wo susu be e la nyi nɔ̀viwɔ̀wɔ be jèsì. Vɔ̀ a, kè èhũ a gbe ɖo àpù a ji boo kpò a, wo nyrɔ̃ woa kpata ɖo àpù a mè. Wo sù àgbètɔ èkà àtɔ̃ (200) tètè.
5Kè Yudà sè èhlɔ̃ kè wo dã ɖo yebe èdù mètɔwo ŋuti kpò a, e yɔ yebe gbàdagbãwo bɔ̀. 6Kè wo fã yɔ Mawu, kè ɖèka kpò ye nyi jɔ̀jɔ̀ɛwɔ̀wɔ be kòjoɖotɔ a, e yì ɖè àhùa kpe na àmè kèwo wù nɔ̀vi a kèwo nyi yebe kɔ̀ta mèviwo a. E sɔ èzã a wɔ̀ yetɔ̀, eye be tɔ̀zò àpùji-hũ jèpe a, e na àpùji-hũawo kpata fiɔ̃, eye be na wo wù àmè kèwo wla ɖo funuawo hànyã-hànyã. 7E yomè a, e trɔ jo, ɖo a, wo tù èdù-gbo a; gãke a, e ɖo è be yè la trɔ va, gbã Yopà be èdù blibo a. 8Yudà gbà sè be Yàmnìa be èdù mètɔwo cã le ji la wɔ̀ ènu kè Yopàtɔwo wɔ̀, sɔ crɔ̃ Yudàtɔ kèwo ye lè woabe èdù mè a. 9E gbà yì ɖè àhùa kpe na Yamnìa cã, èzã mè, eye be tɔzò àpùji-hũ jèpe a ku àpùji-hũ kèwo ye lè funuawo. Wo kpɔ èzò a be bìbi, so kaka Yèruzàlɛ̀m kè dìdì so Yamnìa gbɔ ku èmɔ̃ jijenu stadìa èkà àdɛ̃ (240), àlo, èkpeti èkà ci àtɔ̃ a (45). 10E jo lè Yàmnìa, ku yebe àhùakɔ̃ a, la yì kpe àhùa ku Tìmòteò. Kè wo zɔ̃, sìgbè stadìa àsiɖèkɛ (9), àlo, èkpeti èvè kpò, so èdù a gbɔ nène a, Àrabwo be gbàdagbã kèwo la sù hotu èvè èkàwìvɔàtɔ̃ a (5000) ku èsɔdotɔ èkà woèvè takpo a (500) va ɖè àhùa kpe na wo. 11Àhùa kè wo wɔ̀ a sɛ̃ŋu ŋutɔ, gãke a, kè Mawu be àlɔ̀ lè e mè a, Yudà be àhùakɔ̃ a ɖùji. Kè Yudà ɖù woa ji a, Àrab be zògbèji sãtɔawo biɔ so Yudà si be ne wɔ̀ ŋutifafa be èkàdodo ku yèwo. Wo fìã àjɔ̀gbè be yèwo la na ènyì ku ègbɔwo Yudàtɔwo, eye yèwo la gbà wɔ̀ èdɔ sùgbɔ buwo na wo. 12Yudà sè e gɔ̃mè be wo la teŋu wɔ̀ ènu sùgbɔ na yèwo, eye be wɔ̀ ŋutifafa be èkàdodo a ku wo. Kè wo gbe dà àsi ɖo èkàdodo a ji kpò a, Arabawo trɔ yì woabe gòxɔ̀wo mè.
13Yudà gbà ɖè àhùa kpe na èdù sɛ̃ŋu ɖe kè wo yɔna be Kaspin a. Èglìkpa trɔ do èdù a, eye vòdu sumɔ̃tɔwo be dùkɔ̃ vòvòvò sùgbɔ lè èdù kè a mè. 14Kè Yudàtɔwo zĩ woa ji a, èdù a mètɔwo susu be yèwo la teŋu kpe àkɔ ku wo, ɖo a, woabe èglìkpa a sɛ̃ŋu ŋutɔ, eye wo pòtɛ ènuɖùɖu sùgbɔ ɖɛ. Ekè a na be wo va le zũ Yudà ku yebe gbàdagbãwo, le gblɔ̃ èɖi-nyàwo ku bùsu-nyàwo ɖo woa ŋuti. Gbà wu a, wo le zũ Mawu ku ènyà kèwo mi mu la teŋu gbìgbɔ̀ gblɔ̃, lè fikè a ò a. 15Vɔ̀ a, Yudà ku yebe àhùakɔ̃ a fã yɔ xixe a be Apetɔ, Ŋusɛ̃kpatatɔ kè mù Yerikò be èglì, lè Yosùa be hùenu, wàlɛbɛ kè mu zã èglìgbãmɔ̃ ku àhùawɔ̀mɔ̃ ɖekpe ò a. E yomè a, wo sɔ àdã lũ ɖo èdù a be èglì a jì. 16Kè Mawu lɔ̃ ɖo e ji a, wo ɖo àlɔ̀ èdù a ji. Wo wù àmè àleke be, ètã ɖe kè gogo èdù a, eye be kèkè sìgbè stadìo èvè nène a be èsì ze sìgbè èhũ kè wo kɔ̀ ɖɛ a ye ɖɔ ɛ̀ nène.
Yudà ɖù àhùa ji lè Kàrnaim
(1Mak 5.37-44)
17Kè wo jo lè Kàspin a, Yudà ku yebe àhùakɔ̃ a zɔ̃ sìgbè stadìo 700/èkà woèadrɛ̃ takpo, àlo, èkpeti 140 èkà-tɔ̃ takpo nène a, wo va ɖo Karak, lè Yudàtɔ kèwo wo yɔna be Tubìtɔwo a be àgo ji. 18Wo mu kpɔ Tìmòteò ŋutɔ lè funu a ò; e jo, vɔ̀ a gble gbàdagbã be àhùakɔ̃ blibo ɖèka ɖo àgbògbò ɖe mè, ne wo a nɔ ɖia èdù a. 19Dòsìteò ku Sòsìpatèr kèwo nyi Màkàbeò be àhùagawo a yì funu a, eye wo crɔ̃ gbàdagbã kèwo wu àgbètɔ hotu àtɔ̃ (10000) kèwo Tìmòteò gble ɖɛ a. 20Ekè a yomè a, Màkàbeò mã yebe àhùakɔ̃ a ɖo èhasòso sùgbɔ mè. E sɔ àhùàgbèɖètɔwo ɖo woa nu, eye be jè Tìmòteò yomè. Tìmòteò ɖo àhùakɔ̃ gbàdagbã àfɔ̀zɔ̃tɔ hotu èkà takpo (120000) ku gbàdagbã èsɔdotɔ hotu ɖèka èkà-woèvè takpo (2500).
21Kè Tìmòteò sè be Yudà lè èmɔ̃ ji gbãnà, le gogo yèwo a, Tìmòteò ɖo nyɔ̃nùwo ku ɖèviwo kudo àgbãwo ɖoɖa Kàrnaim be èdù a mè. Èdù kè a ji zĩzĩ sɛ̃ŋu ŋutɔ, eye, wo a lia èto, sɔ yì e mè, cã mu lè bɔ̀bɔ̀ɛ ɖe ò. Èto be èdɔ̃viwo mè kpò, wo tona, yìnà e mè. 22Kè gbàdagbãwo be èhasòso cucugbã a kè be ŋùkɔ̀ Yudà lè a va ɖo a, vɔ̃vɔ̃ kè ɖo èkɛ̃tɔwo a trɔ zũ àdìka sò àmè, wàlɛbɛ kè Mawu kè kpɔna ènu sia ènu a ɖè ye ɖokoe fiɔ, to ènu wɔ̀wɔ mè, lè woabe ŋùmè. Ekè a na be wo pò àgblì, kã hlɛ̃, tùtà èmɔ̃ vòvòvò ji, lè zigìdi mè, àleke be àmè sùgbɔ jè àfɔ̀ku lè woa dòmè, àlo, wo ci woa ŋutɔ, woabe àhùakɔ̃ mètɔwo be èwui nu. 23Yudà tĩ èhlɔ̃dãtɔ kèawo yomè ku àdã, eye be crɔ̃ àmè kèwo be hɛ̃hlɛ̃mè wu 3000/hotu woeàtɔ̃ a lè woa domè. 24Ke Tìmòteò ŋutɔ jè Dòsìteò ku Sòsìpatɛ̀r be gbàdagbãwo simè a, e sɔ àyè biɔ wo be wo ne ɖè àsi lè yè ŋuti, yè a jo, kè wo mu la wɔ̀ èvùɛ̃ ɖe na yè ò a. E gblɔ̃ na wo be, àmè sùgbɔ lè woa dòmè kè be xòmètɔwo be àgbè lè yèbe àsi mè. Eye, ne wo wɔ̀ èvùɛ̃ ɖe ku yè a, wo la wù woabe xòmètɔ kèawo kpata. 25E kã àtaŋu na wo be yè la na, wo la ɖè àsi lè xòmètɔ kèawo ŋuti, àgbè-àgbè, lè lãmèsɛ̃ mè. Ekè a na be Yudàtɔwo ɖè àsi lè e ŋuti, ne wo a sɔ hlɛ̃ woabe àmèwo be àgbè gã.
26Ekè a yomè a, Yudà yì ɖo àlɔ̀ Kàrnàim ku yebe vòduxɔ̀ kè wo tù na vòdu-nɔ̀ Àtàrgàtis a ji. E na wo crɔ̃ àmè hotu woèvè èkàwìvɔàtɔ̃ (25000) lè fufu a.
Yudà gbɔ̀ va Yèruzàlɛ̀m ku èjiɖùɖu be àyosòso.
(1Mak 5.45-54)
27Kè Yudà ɖù èkɛ̃tɔ kèawo ji, ɖo èhũ mè, yomè a, ye ku yebe àhùakɔ̃ a tùtà Efrɔ̃n. Efrɔ̃n nyi àgbògbò be èdù ɖe kè mè dùkɔ̃ vòvòvòwo lè a. Ɖèkajɛvi trìagbàwo xɔ̀ èglìkpa a ŋuti do èse, eye wo le wɔ̀ àvũ kàlĩtɔ̀. Àhùawɔ̀mɔ̃, àŋù, èhùã ku èlãnu sùgbɔ kpe ɖo ènuɖùɖu kè wo bɔ̀ ɖɛ a ŋuti, lè èdù a ŋutɔ mè. 28Vɔ̀ a Yudàtɔwo fã yɔ Tɔhonɔ̀ kè ɖo ŋusɛ̃ la crɔ̃ èkɛ̃tɔwo hɔ̃hlɔ̃ a. wo ɖo àlɔ̀ èdù a ji, eye wo wù àgbètɔ kèwo be hɛ̃hlɛ̃mè sù 25.000/hotu woèvè èkà wìvɔàtɔ̃, lè àmè kèwo ye le hlùɛ̃ èdù a taawo domè.
29Ke wo jo lè funu a, wo zɔ̃, la yì ɖè àhùa kpe na Sìtòpòlis, kè dìdì lè Yèruzàlɛ̀m gbɔ ku stadìa èkàwoeàtɔ̃ a (600). 30Vɔ̀ a, Yudàtɔ kèwo lè èdù a mèawo gblɔ̃ na Yudà be èdù a mètɔwo wɔ̀nà ènyùɛ̃ na Yudàviwo, eye wo dona àlɔ̀ yèwo, lè hùenu sɛ̃ŋuwo mè. 31Yudà ku yebe àhùakɔ̃ a do àkpe na èdù a mètɔwo, eye wo biɔ so èdù a mètɔwo si be wo ne gbà nɔ wɔ̀ àdɔ̀mè nyuɛ̃ kè a na Yudàviwo, lè èsɔ̀mè, wè sia wè. E yomè a, wo trɔ yì Yèruzàlɛ̀m, ɖo a, Kùasiɖawo be Àzãɖùɖu a gogo vɔ̀.
Yudà ɖù Gɔrjìa be àhùakɔ̃wo ji
32Kè wo ɖù Kùasiɖawo be Àzã kè wo yɔna be Pɛ̃tèkot a yomè a, Yudà ku yebe àhùakɔ̃ a zɔ̃ yì kpe àkɔ ku Gɔrjìa, ìdùmeà be èdùiɖùtɔ a. 33Gɔrjìa kplɔ̀ gbàdagbã àfɔ̀zɔ̃tɔ hotu ɖèka èkàwìvɔàtɔ̃ (3000) ku èsɔdotɔ èkà èwo (400) va àhùa-gbè a ji. 34Kè wo jè àhùa a gɔ̃mè a, Yudàtɔwo ɖewo ci àhùa. 35Ŋusù ɖe kè wo yɔna be Dòsìteò, eye be nyi èsɔdotɔ kàlĩwɔ̀tɔ ɖe, so Bàkènɔr be àhùakɔ̃ a mè a jè Gɔrjìa be àwùgã a ji, eye be dɔ̃ ɛ̀ jo ku ŋusɛ̃. E jro be yè a le ènu bàɖa wɔ̀tɔ kè a, àgbè-àgbè. Vɔ̀ a, Trakò be èsɔdotɔawo dòmètɔ ɖèka a zɔ̃ ɖo Dòsìteò ji, eye be sò àbɔ jo na ɛ̀. Ekè a na be Gorjìa si jo, eye be yì wla ɖo Màrisa be èdù mè.
36Vɔ̀ a, Àzarìa ku yebe àhùakɔ̃ a le wɔ̀ àvũ a, e dìdì, eye ènu tìkɔ̀ na wo. Ekè a ŋuti a, Yudà fã yɔ Tohonɔ̀, gblɔ̃ na ɛ̀ be ne ɖè è fiɔ be yè lè Yudà be àhùakɔ̃wo ji nyàwo, eye èyè ye lè ŋùkɔ̀ na wo, lè àhùa a mè. 37E yomè a, e kpà àhùa-bòbo, lè tɔgbeawo be ègbè mè, eye be to èhà ɖoɖa, eye be ɖè àhùa kpe na Gɔrjìa be àhùakɔ̃ a, wàlɛbɛ kè àhùakɔ̃ mu kpɔ le kpɔ èmɔ̃ na ɛ̀ ò a. Ekè a na be wo kã hlɛ̃, eye wo si jo.
Wo wɔ̀ vɔsa ɖo àmèkukuwo ta.
38Kè wo wɔ̀ àhùa a vɔ̀ a, Yudà bɔ̀ yebe àhùakɔ̃ a, eye wo yì Àdùlam be èdù mè. Kè jɛ̃gbɔ̃zã a le jè e gɔ̃mè a, wo lè woa ɖokoewo ɖì, sìgbè leke woa detɔwo wɔ̀nà ɛ̀ a nène. Àdùlam ye wo ɖù jɛ̃gbɔ̃zã a lè.
39Kè èŋù kè a, wo va kpɔ be e lè veve ɖe na Yudà ku yebe gbàdagbãawo be wo ne kɔkɔ Yudàtɔ kèwo ci àhùaawo be àmèkpòtiawo yì mlɔ̃ woa tɔgbewo gbɔ, lè xòmè be yɔ̀dowo mè. 40Vɔ̀ a, e va va e mè be wo kpɔ̀ èbo be ènu kèwo so Jàmnìa be vòduwo gbɔ a, lè àmè kuku awo be àwù mè. Vɔ̀ a, èse a gbe ènu kèawo zãzã, na Yudàtɔwo. Ènu kè a na be àmè sia àmè sè ènu kè ŋuti gbàdagbã kèawo ku ɖo a gɔ̃mè. 41Ekè a na be woa kpata, wo kafu Tɔhonɔ̀ kè ɖona kòjo jɔ̀jɔ̀ɛ, eye be ɖènà ènu kè lè wawla mè a fiɔna a. 42Wo to ekè a ji, blìbɔ̀ na Tɔhonɔ̀, sɔ le biɔ ɛ̀ be, ne tutu àgɔ̀ kè yèwo jè a keŋu-keŋu jo. Yudà, ŋusù kè nyi kàlĩsu gã ɖe a biɔ so yebe àhùakɔ̃wo si be wo mu gbà nɔ wɔ̀ èvùɛ̃ kè a hati ò: àmè sia àmè ŋutɔ teŋu kpɔ jɔ̀gbèvuɛ̃ gã kè jɔ̀ ɖo àgɔ̀jètɔawo ji a, ku yebe ŋùkuvi.
43Yudà na yebe gbàdagbãwo jɔ̀ ègà, eye wo kpɔ sìgbè klòsalò-gà hotu ɖèka (2000) nène. E sɔ ègà kè a ɖoɖa Yèruzàlɛ̀m, ne wo a sɔ savɔ, sɔ biɔ sɔsɔkè, so Mawu si, ɖo èvùɛ̃wo ta. Wɔ̀na kè a nyi ènu gã ɖe kè mi ɖo la kafu, ɖo a, e le ɖèfiɔ be Yudà xɔ̀ àmè kukuwo be fɔ̃fɔ̃ so èkuwo de ji sè. 44Lè nyàwototo mè a, ne mu xɔ̀sè be gbàdagbã kèwo ku a la fɔ̃ so èkuwo de ò a, e la nyi ènu mà-ɖèvi ku bòmècinu be wo a fãkùe ɖo woa ta. 45Yudà gbà kã ɖo e ji be èfɛ̃tu nyuɛ̃ ɖe le nɔ̀tè kpɔ àmè kèwo tɛna ɖo Mawu ŋùti kaka kuna a. Ekè a nyi kãkã ɖo ènu ji kɔ̀kɔ̀ɛ kè jè na xɔ̀sètɔ a! Ènu kè a ŋuti ye be wɔ̀ vɔsa ɖo àmèkukuwo ta ɖo, àleke be wo a sɔ woabe èvùɛ̃wo kè wo, ne woa vɔ̀ sɔ woabe èvùɛ̃wo be àgbã si.
Currently Selected:
2Màkàbeòwo 12: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.