1Samuɛl 6
6
Wo trɔ Zòɖùɖu-Ɖakà a ɖoɖa Izràɛl
1Tɔhonɔ̀ be Zòɖùɖu-Ɖakà a nɔ̀ Filistìtɔwo be ànyigbã ji, wètri adrɛ̃ sɔ̃ŋu. 2Mɛmlɛ̃nua, Filistìtɔwo yɔ woabe hũbonɔwo ku woabe ènukãtɔwo bɔ̀, eye wo biɔ ènukãtɔawo be: “Leke ye mi la wɔ̀ Tɔhonɔ̀ be Zòɖùɖu-Ɖakà a ɖo ò? Mì gblɔ̃ lekè mi la trɔ ɛ̀ ɖoɖa èdù kè mè be soa mèa na mi.” 3Hũbonɔawo ku ènukãtɔawo ɖo e ŋuti be: “Ne mì jro be yèwoa trɔ Izràɛlviwo be Mawu be Zòɖùɖu-Ɖakà a ɖoɖaa, mì mu gbà trɔ ɛ̀ ɖoɖa gbalo ò. Vɔ̀a, mì sɔ àjɔ̀ ɖe kpe ɖo e ŋuti. Nène a, mìabe lãmè la xaya, eye mì la nya ènu kè ŋuti Mawu kèa mu nɔ̀tè èto dɔ̃dɔ̃ na mì ɖoa. 4Filistìtɔwo biɔ be: “Eŋuã ɖe, nukɛ ye mi la na ne àjɔ̀a ò?” Hũbonɔawo ku ènukãtɔawo cã biɔ be: “Vɔ̀a, àjɔ̀ kɛ ŋùku mè ye mi la na ɛ̀ ò?” Hũbonɔawo ku ènukãtɔawo ɖo e ŋuti be: “Kè Filistìtɔwo be ŋùkɔ̀nɔ̀tɔwo be hɛ̃hlɛ̃ mè nyi àtɔ̃a, mì la sɔ sìka wɔ̀ ènu tɛ̃tɛ̃a be tata àtɔ̃ ku àfĩ be tata àtɔ̃, sɔ na àjɔ̀, ɖoa, èdɔ̀lele ɖèka ye jè mìa ku mìabe àgbònùglawo keŋu ji. 5Yeŋutia, mì wɔ̀ ènutɛ̃tɛ̃ be èdɔ̀ kè mì lea be tata ku àfĩ kèwo gble ènu lè mìabe ànyigbã jiawo be tata, eye mìa na gogo Izràɛlviwo be Mawu a. Èta mu nyɔ òa, ne mì wɔ̀ ekèa, e la nɔ̀tè èto kè be le dɔ̃ na mìa ku mìabe vòduwo kudo mìabe èdùa. 6Mì mu gbà sĩkã sìgbè lekè Ejiptè be èfìɔ, Faraɔ̀n ku Ejiptètɔwo wɔ̀a nène ò. Mì ɖoŋù lekè Mawu kèa wɔ̀ ku Ejiptètɔwo, kaka na gà kè mè Ejiptètɔwo va lɔ̃ be Izràɛlviwo ne jo lè yèwo be èdù mèa. 7Ekèa ŋutia, fifìa, mì la wɔ̀ àgbãsɔkèkevi yeye, mì la sɔ ènyìnɔ èvè kèwo le na ànɔ èviwo, eye wo mu do èkɔ̀kùti na kpɔ òa. Mì la sɔ ènyìnɔawo do àgbãsɔkèkevia ŋuti, vɔ̀a, mì la kplɔ̀ woabe èviawo yì do ènyìkpa mè. 8Mì la kɔ Tɔhonɔ̀ be Zòɖùɖu-Ɖakà a ɖo àgbãsɔkèkevia ji. Mì la sɔ sìkanu kèwo mì sɔ le na àjɔ̀ Mawu a, ɖo fòtro viɖe mè, ɖo Zòɖùɖu-Ɖakà a be àxàdamè. E yomè a, mì la na ènyìnɔawo la dɔ̃ àgbãsɔkèkevia jo. 9Ne ènyìnɔawo tùtà Izràɛl-nyigbã be èmɔa ji, ɖota Bɛt-Semèk#6.9 Bɛt-Semèk nyi èdù ɖe kè sɔ èkpeti 25, sɔ dìdì so Yèruzàlɛm gbɔ, lè èwèzɛ̃pe be èdùa mèa, eŋuã, mì la nya be Izràɛl be Mawu a ye do àyà kèawo keŋu na mi. Vɔ̀, ne ènyìnɔawo mu tùtà Izràɛl-nyigbãa be èmɔ ji òa, mi la nya be mu nyi Izràɛlviwo be Mawu a ye do àyà na mi ò, be ènu kpò be nyi, jɔ̀ ɖo mia ji. 10Filistìtɔwo wɔ̀ ɖo ènu kè hũbonɔawo ku ènukãtɔawo gblɔ̃ na woa ji. Wo sɔ ènyìnɔ kèwo le na ànɔ èviwoa, èvè. Wo sɔ wo do àgbãsɔkèkevi ŋuti, eye wo kplɔ̀ ènyìviawo yì tu ɖo èkpa mè. 11Wo sɔ Tɔhonɔ̀ be Zòɖùɖu-Ɖakà ɖo kèkevia ŋuti ku fòtro vi kè mè àfĩ ku ènutɛ̃tɛ̃ be tataawo lèa.
12Ènyìnɔawo sɔ èmɔ tɛ̃ɛ, ɖota Bɛt-Semèk. Wo le èmɔ ɖèka ŋua, le fã, eye wo mu zɛ̃ yì ɖùsi, àlo èmìɔ̃ mè ò. Filistìtɔwo be ŋùkɔ̀nɔ̀tɔwo kplɔ̀ àgbãsɔkèkevia do kaka va Bɛt-Semèk be lipò ji. 13Bɛt-Semèk be èdù mètɔwo lè àgblè mè, le yà èlù, lè bàlìa mè. Wo fɔ̃ ŋùmè yìji eye, wàlɛbɛ kè wo kpɔ Tɔhonɔ̀ be Zòɖùɖu-Ɖakà a, èjì jɔ̀ wo. 14Ekè àgbãsɔkèkevia ɖo Bɛt-Semèk, lè ŋusù ɖe kè wo yɔna be Yosùa be àgblè mèa, ènyìnɔawo nɔ̀tè ɖo èkpe gã ɖe gbɔ. Àgblèa mètɔwo#6.14 Lè Izràɛlviwo be èse mèa, mu nyi àmè sia àmè ye wɔ̀nà vɔsa-dɔ ò. Levì be jìjimèviwo ye wɔ̀nà ɛ̀. Vɔ̀a, kè Bɛt-Semèktɔwo lè àgblèa, wo ɖo la wɔ̀ èkɔ̀nua gbɔ̀xue Zòɖùɖu-Ɖakà a ne ɖo èdùa mè. fɛ̃ àti kè wo sɔ wɔ̀ àgbãsɔkèkevia, eye wo le ènyìnɔawo sɔ wɔ̀ ènumème vɔsa na Tɔhonɔ̀ gbè ŋua gbè.
15Levìwo ɖiɖi Tɔhonɔ̀ be Zòɖùɖu-Ɖakà a ku fòtro vi kè mè sìka be ènutata kèwo ye kplɔ̀ àɖakà a doawo lèa, so kèkevia ji va ɖo èkpe gãa ji. E yomè a, Bɛt-Semèktɔwo wɔ̀ ènumème vɔsa. Wo wù èlã, sɔ wɔ̀ ɖèkawɔ̀wɔ vɔsa na Tɔhonɔ̀. 16Kè Filistìtɔwo bè ŋùkɔ̀nɔ̀tɔ àtɔ̃awo kpɔ ènu kè jɔ̀, gbè ŋua gbèa, wo gbìgbɔ̀ trɔ yì Ekrɔ̀n.
17Ènutɛ̃tɛ̃ be sìkanu tata kèwo Filistìtɔwo sɔ na àjɔ̀ Tɔhonɔ̀a be hɛ̃hlɛ̃ mè ye nyi ekèa: Asdɔ̀d be èdù tɔ̀ nyi ɖèka; Gazà be èdù tɔ̀ nyi ɖèka; Àskalɔ̀n be èdù tɔ̀ nyi ɖèka; Gat be èdù tɔ̀ nyi ɖèka, eye Ekrɔ̀n be èdù cã tɔ̀ nyi ɖèka. 18Wo gbà na àfĩ be sìkanu tata kèwo be hɛ̃hlɛ̃mè lè èdù-nyigbãwo, èdù gãwo, àgbògbò-dùwo, èdùwo, kɔpewo ku àgblè kɔpe kèwo nu Filistìtɔwo be ŋùkɔ̀nɔ̀tɔ àtɔ̃awo lèawo nu. Èkpe gã kè ji wo kɔ Tɔhonɔ̀ be Zòɖùɖu-Ɖakà a ɖo lè Yosùa be àgblè mèa gbà nyi ènu kèa be ŋùkuɖojinu kaka va na egbè.
19Tɔhonɔ̀ pò àmè lè Bɛt-Semèk ŋusùwo dòmè pu ànyi, ɖoa, wo kpɔ Tɔhonɔ̀ be Zòɖùɖu-Ɖakà a mè. E pò àgbètɔ èkàvè-takpo ci èwo pu ànyi lè dùkɔ̃a dòmè#6.19 Ŋɔ̀ŋlɔ̃ ɖewo gblɔ̃ be hotu èwì vɔ àtɔ̃ àlo àkpe èkà ci èwo ku èkà èvè takpo ci èwo. Ekèa na be èdùa mètɔ kèwo ye kpɔ̀tɔ̀ ci àgbèawo lòfũ, ɖoa, Tɔhonɔ̀ dɔ̃ èto na wo veve ɖe ŋutɔ. 20Bɛt-Semèktɔwo gblɔ̃ be: “Àmè kɛ ye la teŋu tɔtè ɖo Tɔhonɔ̀, Mawu kɔ̀kɔ̀ɛ kèa be ŋùkɔ̀ ò? Eye kaka fikɛ ŋutɔ ye mi la kɔkɔ yebe àɖakà kɔ̀kɔ̀ɛa jo yì ò? 21Wo dɔ̃ àmè ɖoɖa Kiriat-Yearìmtɔwo be wo ne gblɔ̃ na wo be: “Filistìtɔwo kɔ Tɔhonɔ̀ be àɖakàa ɖoɖa mìa gbɔ. Mì va kɔ ɛ̀ yì mìa gbɔ.”
Currently Selected:
1Samuɛl 6: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
