1Samuɛl 31

Saolò ku

1E va va e mè be Filistìtɔwo be àhùakɔ̃wo gbà ɖè àhùa kpe na Izràɛlviwo lè Gilbòa be ètoa ji. Izràɛl be àhùakɔ̃a si lè Filistìtɔwo be ŋùkɔ̀, eye woa dòmètɔ sùgbɔ ku. 2Filistìtɔwo xa Saolò ku yebe ŋusùviawo. Wo wù Yonatàn, Abinadab ku Malkisua, Saolò be ŋusùviwo. 3Ekèa yomè a, àhùaa kpataa va ci Saolò ji. Kè be kpɔ be àŋùtu dàtɔwo va kè ɖo yè ŋutia, vɔ̃vɔ̃ gã ɖe ɖo è, eye be pò tìtìtì. 4Saolò gblɔ̃ na yebe àdèkplɔ̀vi a be: “Lìɔ èwui wò to, ne wòa sɔ trɔ̃ mù, ne mu nyi nène òa, àtɔ̀tɔ̀nɔ̀, vòdu sumɔtɔ kèawo la va ɖìgbɔ mù!” Vɔ̀a, Saolò be àdèkplɔ̀vi a gbe, ɖoa, e le vɔ̃ ŋutɔ. Eye Saolò sɔ èwuia, eye be sɔ ye ɖokoe trɔ̃ e nu. 5Kè Saolò be àdèkplɔ̀vi a kpɔ be Saolò kua, ye cã sɔ ye ɖokoe trɔ̃ yebe èwui nu, eye be ku kudo Saolò. 6Gbè ŋua gbèa, Saolò ku yebe ŋusùvi ètɔ̃, kudo yebe àdèkplɔ̀vi a, wo ku ɖodu, sɔ kpe ɖo yebe ŋutimewo keŋu ŋuti.

7Kè Izràɛlvi kèwo ye nɔ̀nà bàlìa be àkpa ɖèa ku kèwo ye nɔ̀nà Yɔrdàn be ètɔ̀a be àgo ɖe a jiawo kpɔ be Izràɛl be gbãdãgbãwo si, eye Saolò ku yebe ŋusùviwo kua, woawo cã, wo si gble woabe èdùwo ɖɛ. Filistìtɔwo va, eye wo ci èdùawo mè.

8Ekè èŋù kè, eye Filistìtɔwo va, la ɖè ènuzãzãwo lè àmè kèwo kuawo ŋutia, wo kpɔ Saolò ku yebe ŋusùviawo be àmèkpòtiwo lè Gilbòa be ètoa ji. 9Wo sò Saolò be èta, eye wo ɖè yebe àhùawɔ̀nuwo lè e ŋuti. Wo sɔ ètaa ku àhùawɔ̀nu kèawo ɖìsà lè Filistìtɔwo be ànyigbã ji, ne woa kãkã ènyà nyuɛ̃ kèa lè woabe vòduxɔwo mè, ne dùkɔ̃a keŋu ne nya. 10Wo sɔ Saolò be àhùawɔ̀nuawo ɖo Filistìtɔwo be vòdu Àstartè be èxɔ̀ mè, eye wo ka Saolò be àmèkpòtia ɖo Bɛt-Seàn be èdùa be èglìkpa ŋuti.

11Yabɛ̀s be èdùa mètɔwo, lè Gilead-nyigbã ji, sè ènu kè Filistìtɔwo wɔ̀ ku Saolò. 12Ŋusù kãlìsuka kèwo ye lè Yabɛ̀s be èdùa mèawo jè èmɔ, eye wo zɔ̃ èzã bliboa, va Bɛt-Sean. Wo ɖè Saolò ku èviawo be àmèkpòtiawo lè Bɛt-Sean be èglì-kpaa ŋuti, eye wo trɔ gbɔ̀ va Yabɛ̀s, àfi kè wo va tɔ wo èzò lèa. 13Wo sɔ Saolò ku yebe ŋusùviawo be èpuawo yì ɖì lè Yabɛ̀s ɖo banìti gɔ̃mè, eye wo blanu, ŋùkèkè adrɛ̃.

Currently Selected:

1Samuɛl 31: GEN

Highlight

Copy

Compare