1Samuɛl 30

David kpe àhùa ku Àmàlɛktɔwo

1Ŋùkèkè ètɔ̃gɔ̃a gbèa, ekè David ku yebe ŋutimewo va ɖo Siklag nyigbã jia, Àmàlɛk be àhùakɔ̃a va xa Nègev be àgowo ji ku Siklag. Wo xa Siklag be èdùa, wo gbã ɛ̀, eye wo tɔ ɛ̀ èzò 2Wo le èdùa mè be nyɔ̃nùwo, ɖèviwo ku àmè sĩsĩwo. Wo mu wù àmè ɖekpe ò, vɔ̀a, wo kplɔ̀ àmè sia àmè, eye wo gbà le woabe èmɔ, jo. 3Kè David ku yebe ŋutimewo va ɖo èdùa mèa, wo kpɔ be wo tɔ èzò èdùa, eye wo kplɔ̀ woa srɔ̃wo, woabe ŋusùviwo ku woabe nyɔ̃nùviwo jo. 4David ku yebe ŋutimewo fã àvi hèhèhè, eye wo làmɔɛ̃ kaka ènu tìkɔ̀ na wo. 5Wo kplɔ̀ David be èsrɔ̃ èvèawo ŋutɔ cã: Ahinɔ̀am, Yizreɛl nyɔ̃nùa ku Karmèl nyɔ̃nù Àbìgaɛl kè nyi Nabal be àhòsìa. 6Èhlò mè sãkɔ̃ na David, ɖoa, yebe ŋutimeawo tɔ gbɔ̃gblɔ̃ be yèwoa pò èkpe David wù. Àmè sia àmè le sè veve lè David be àhùakɔ̃a mè, wàlɛbɛ kè wo le bù woabe ŋusùviwo ku woabe nyɔ̃nùviwo ŋutia. Gãkea, Tɔhonɔ̀, David be Mawu a gbà na jìdo David.

7David gblɔ̃ na Abiatàr, hũbonɔ kè nyi Ahimèlɛk be èvia be: “Tɔ̀ wò jɔ̀, sɔ dàbla kɔ̀kɔ̀ɛa va na mù.” Eye Abiatàr sɔ dàbla kɔ̀kɔ̀ɛa va na David. 8David biɔ Tɔhonɔ̀ be: “Ne mù jè fìãfìtɔwo be èha kèa yomè a ɖe, mù la teŋu xe woa?” Tɔhonɔ̀ ɖo e ŋuti be: “Jè woa yomè. Wò la xe wo, eye wò la hlùɛ̃ tɔ̀ wòwo gã.”

9David jè èmɔ ku gbãdãgbã èkà woeàtɔ̃ (600), kaka va ɖo Besɔr be ètɔ̀ sɛ̃sɛ̃a to. Woa dòmètɔ kèwo ci ŋùgbeawo ci funua. 10David ku gbãdãgbã èkà èwo (400) sò Besɔr be ètɔ̀ sɛ̃sɛ̃a, yì ŋùkɔ̀, wàlɛbɛ kè àgbètɔ èkà àtɔ̃ (200) kpɔ̀tɛ kèwo ènu tìkɔ̀ na wunuawo ya ci ànyi. 11David be gbãdãgbãawo dogò Ejiptè ɖèkajɛ ɖe lè ègbea ji. Wo kplɔ̀ ɛ̀ va na David. Wo na ɛ̀ kpɔ̃nɔ be ɖù eye be nù èsì. 12Wo gbà na ɛ̀ èvò-klako ku vɛ̃-ku sɛ̃sɛ̃ pupu èkpò èvè. Ekè be ɖù ì vɔ̀a, ɖèkajɛ a be lãmè haya, ɖoa, ŋùkèkè ètɔ̃ ku èzã ètɔ̃ ye mu ɖùnu ò, eye mu nùsì cã ò. 13David biɔ ɛ̀ be: “Àmè kɛ be àmè ye wò nyi ò? Eye, fikɛ ye wò so ò?” Dèkajɛa ɖo e ŋuti be: “Ejiptètɔ ye mù nyi. Mù nyi Àmàlɛk ŋusù ɖe be kluvi. Ŋùkèkè ètɔ̃ ye nyi ekèa, kè àpetɔ nyè gble mù ɖɛa, ɖoa, lãmè mu le kɔ̀ na mù ò. 14Miawo ye yì xa Kereti-nyigbãa be àpùgo, Yudà-nyigbãa be àpùgo, Kàlɛb-nyigbãa be àpùgo, eye mi tɔ èzò Siklag.” 15David biɔ ɛ̀ be: “Wò la teŋu kplɔ̀ mù yì fìãfìtɔwo be èha kèa gbɔa?” Dèkajɛa ɖo e ŋuti na David be: “Ne wò fìã àjɔ̀gbè na mù, lè Mawu be nyikɔ mè, be wò mu la wù mù ò, eye wò mu la sɔ mù do àsi na àpetɔ nyè òa, mù la kplɔ̀ wò yì fìãfìtɔwo be èha ŋua gbɔ.”

16Ŋusùa kplɔ̀ David kaka yì àfi kè Àmàlɛktɔwo lèa. Wo kpɔ Àmàlɛktɔwo kãkã ɖo àgoa keŋu ji. Wo le ɖù àzã ku ènu kèwo wo hlà lè Filistìtɔwo be ànyigbãwo jia, wo le kpɔ jìjɔɛ ɖo ènu gbogbo kèwo wo hlà lè Filistìtɔwo ku Yudàtɔwo be ànyigbãwo jia ŋuti. 17David ɖè èwui ɖo woa dòmè, so fɔ̃fɔ̃ mè, kaka sɔ yì ŋùkèkè èvègɔ̃a be fìɛ̃si mè. Àmàlɛktɔwo dòmètɔ ɖekpe mu teŋu si, tovò na ɖèkajɛvi èkà èwo (400) kèwo lia èsɔ èkpovènɔ̀ ɖewo ji, si jo. 18David teŋu xɔ̀ ènu kèwo keŋu Àmàlɛktɔwo sɔ joawo. Vevetɔa, e hlùɛ̃ èsrɔ̃a èvèawo. 19Àmè ɖekpe mu hùetè lè ɖèviawo ku àmè sĩsĩawo dòmè ò. Àmè ɖekpe mu hùetè lè woabe nyɔ̃nùviwo, àlo woabe ŋusùviwo dòmè ò. Woabe ènu kèwo Àmàlɛktɔwo hlà joawo keŋu sɔ̀gbè, eye David gbìgbɔ̀ sɔ ènuawo keŋu gbɔ̀. 20Ekèa yomè a, David le Àmàlɛktɔwo be èlãhawo cã, ègbɔwo, ènyìwo, eye, àmè kèwo le kplɔ̀ èlã kèawoa le gblɔ̃ be: “David be àmɔ̀nyɔ̀nuawo ye nyi ekèawo!”

21David trɔ va àmè èkà àtɔ̃ (200) kèwo ènu tìkɔ̀ na, eye wo mu teŋu kplɔ̀ David do ò, vɔ̀ ci Besɔr be ètɔ̀ sɛ̃sɛ̃a toa gbɔ. Wo va dogò David ku yebe àhùakɔ̃a. David ku àhùakɔ̃a zɔ̃ va dogbè na wo. 22Wàlɛbɛ ŋua, ènu mà-nyãtɔ ku àmè bàɖà kèwo ye lè àmè kèwo kplɔ̀ David yì ègbe a jiawo dòmèawo kɔ ègbè yì èji, gblɔ̃ be: “Ekè àmè kèawo mu yì ègbe a ji ku mi ò a, wo mu la xɔ̀ ènu ɖekpe lè ènu kèwo mi hɛ̃ gbɔ̀awo mè ò. Mi la trɔ woa srɔ̃wo ku woabe èviwo na wo. Wo ne kplɔ̀ wo, ne wo a jo!” 23Vɔ̀ a, David ɖo e ŋuti na wo be: “Nɔ̀vi nyèwo, mì mu la wɔ̀ nène ɖoɖa woa gbɔ, ku ènu kèwo Tɔhonɔ̀ na miawo ò. Tɔhonɔ̀ ye kpɔ mia ji, eye be sɔ fìãfìtɔwo be èha kè va zrò jè mia jia, do àsi na mi. 24Àmè ɖekpe mu la teŋu dà àsi ɖo ènyà kè mì le gblɔ̃a ji ò.

Àmè kè yì àhùagbe ji

ku àmè kè nɔ̀ àgbãawo gbɔa

la ɖo màmã ɖèka.

Wo la mã ènuawo sɔ̀sɔɛ.”

25So gbè ŋua gbèa, David sɔ ènyà kèa do èse na Izràɛlviwo. Wo gbà le zɔ̃ ɖo èse kèa ji, kaka va na egbè.

26Kè David trɔ yì Siklag nyigbã jia, David dè ènu kèawo be èɖe ɖoɖa Yudà-nyigbã jitɔwo be àmè sĩsĩ kèwo nyi David be èxlɔ̃wo lè yebe èdù mèa, ku àŋɛ̀do kèa be: “Ekèa ye nyi mìabe àgbãmèkãnu kè mi hlà lè Tɔhonɔ̀ be kɛ̃tɔwo sia.” 27David sɔ àgbãmèkãnu ɖoɖa àmè sĩsĩ kèwo lè Betɛ̀l, Ramɔ̀t lè Nègev be ànyigbãwo jia. E sɔ ɖoɖa àmè sĩsĩ kèwo ye lè Yatìr, 28eye be gbà sɔ àgbãmèkãnu ɖoɖa àmè sĩsĩ kèwo lè Àroà cã. E sɔ ɖoɖa àmè kèwo ye lè Sifemɔt, ɖoɖa àmè kèwo ye lè Estemɔa, 29E sɔ ɖoɖa àmè kèwo ye lè Rakal, kèwo ye lè Yerahmèl be èdù gãwo mèawo cã. E sɔ ɖoɖa àmè kèwo ye lè Kenìtɔwo be èdù gãwo mèawo, 30E sɔ ɖoɖa àmè kèwo ye lè Hɔrma a, àmè kèwo ye lè Bɔr-Asan, kudo àmè kèwo ye lè Atak-dù mèa cã, 31e sɔ ɖoɖa àmè kèwo ye lè Hebrɔ̀n, gbà sɔ ɖoɖa àmè sĩsĩ kèwo ye lè èdù kèwo keŋu mè David ku yebe ŋuti mèawo toawo mè.

Currently Selected:

1Samuɛl 30: GEN

Highlight

Copy

Compare