1Samuɛl 24

Saolò ci David simè

1David jo lè àgo ŋuawo ji, eye be yì ci Ein-Gèdi, àkpã be ètowo be èdù ɖe gbɔ. 2Ekè Saolò trɔ lè Filistìtɔwo yomè gbɔ̀a, wo gblɔ̃ na ɛ̀ be: “Kpɔɖa, fifìa, David lè Ein-Gèdi be zògbèa ji.” 3Saolò cã gbãdãgbã trì àkɔ hotu ɖèka èkà èwì vɔ àtɔ̃ (3000), lè Izràɛl be dùkɔ̃a keŋu mè, eye be jè David ku yebe àmèawo yomè, le ji wo lè àyɔ̀gbɔwo be àkpãa be ŋùkɔ̀. 4Kè Saolò ɖo àlɛ̃kpawo gbɔ, lè èmɔa toa, e kpɔ àkpãdo ɖe. E ɖo e mè, na bèa yì àfɔ̀ ji. Wàlɛbɛ ŋua, David ku yebe àmèwo bè ɖo àkpãdo ŋua be gòglòpe. 5David be àmèwo ɖèkpa na David be: “Egbè ye nyi gbè kè gbè be ènyà Tɔhonɔ̀ gblɔ̃ na wò kpɔ be: 'Kpɔɖa, mù la sɔ kɛ̃tɔ wò do àsi na wò, eye wò la wɔ̀ ènu kè wò jro a ku ì.” Eye David sitè, wɔ̀ ɖɔ̀ɖɔ̀ɖɔ̀, sò Saolò be àwùgãa be ètomè. 6Vɔ̀a, wàlɛbɛ kè be gbe wɔ̀ ekèa kpòa, David kpɔ be yèbe èjì le pò sɛ̃sɛ̃ ɖe#24.6 Woa kã àmè be àwù be ètomè, lè Yudàviwo dea gɔ̃mè ye nyi be wo ɖìgbɔ àmèa, ɖoa, e kã èfìɔ Saolò be àwùgã be ètomè. 7David gblɔ̃ na yebe àmèawo be: “Tɔhonɔ̀ mu gbà na, ne ma ɖè àpetɔ nyè be àgbè, sìgbè àlekè mì le gblɔ̃a nène ò, ɖoa, Tɔhonɔ̀ ŋutɔ ye sì àmì na ɛ̀.” 8David sɔ ènyà kèawo tɔtè yebe àmè kèwo jro be yèwoa zrò jè Saolò jia.

Ekè Saolò sitèa, e to lè àkpãdoa mè, eye be jo, jè yebe èmɔ. 9E yomè a, David to lè àkpãdoa mè, eye be do àpa ɖoɖa Saolò be: “Àpetɔ nyè, èfìɔ bùbùtɔ!” Saolò trɔ kpɔ ŋùgbe. E kpɔ David bɔ̀bɔ̀ cɔ̃ ŋùmè ànyi ku bùbu. 10Eye David biɔ Saolò be: “Èfìɔ bùbùtɔ, nukɛ ŋuti ye wò sɔna àmè kèwo ye gblɔ̃nà na wò be David le ji èvuɛ̃ na wòawo be ènyà sɔ wɔ̀nàdɔ ɖo ò? 11Wò ŋutɔ wò kpɔ egbè be Tɔhonɔ̀ sɔ wò do àsi na mù, lè àkpãdoa mè. Àmèwo gblɔ̃ be ma wù wò, vɔ̀a, mù ku ŋuzĩzĩ na wò, eye mù gblɔ̃ be: 'Nyè mu la wù àpetɔ nyè bùbùtɔ ò, ɖoa, Tɔhonɔ̀ ŋutɔ ye do àmì èta na ɛ̀.' 12Kpɔɖa, Oò, ètɔ nyè, èfìɔ bùbùtɔ, ɛ̃ɛ, kpɔ ènu kè lè àlɔ̀ mè na mù a ɖa: àpo àwùgã be ètomè ye! Ekè e nyi be àwùgã wòa be ètomè kpò mù kã, eye nyè mu wù wò òa, sè e mè, eye wò ŋutɔ wò kpɔ be nyè mu ɖo ènu bàɖà, àlo, àglajèje be susu ɖekpe ɖe ɖo ŋuti wò ò, eye nyè mu wɔ̀ èvuɛ̃ ɖekpe ɖo ŋuti wò ò. Vɔ̀a, wò ya, wò le tĩ yo nyè mè, be yèa wù mù. 13Tɔhonɔ̀ ŋutɔ ne sò kòjo na nyè ku wò! Tɔhonɔ̀ ŋutɔ ye la biɔ wò èhlɔ̃ na mù. Nyè ŋutɔ, nyè mu la tɔ àsi ŋuti wò ò. 14Sã xoxotɔwo ɖona èlo be: 'Ènu vuɛ̃ kpò ye sona àmè vuɛ̃ɖìwo gbɔ.' Vɔ̀a, ènyè ya, nyè mu la wɔ̀ èvuɛ̃ ɖekpe ku wò ò. 15Èfìɔ bùbùtɔ, àmè kɛ yomè ye Izràɛl be èfìɔ bùbùtɔa sɔ àhùakɔ̃ bliboa jè ò? Àmè kɛ yomè ye wò le tĩ ò? Ènyè kè mu tovò na àvũ kuku, eye nyè mu sù èyɔ̀ɛvi ŋutɔ cã òa ye! 16Tɔhonɔ̀ ne ɖo kòjo, eye ne sò kòjo na nyè ku wò! Ne kpɔ ènyà mè, ne ɖè kunù na mù, ne sò jɔ̀jɔɛ, ne bèa hlùɛ̃ mù gã so àsi wò!”

17Ekè David wu yebe nupoa nu vɔ̀a, Saolò biɔ ɛ̀ be: “David, èvi nyè, ègbè wò ye nyi ekèa?” Ekèa yomè a, Saolò wo ku àvi, eye be fã àvi sɛ̃sɛ̃ ɖe ku hèhè dodo. 18Saolò gblɔ̃ na David be: “David, wò nyi àmè jɔ̀jɔɛ wu mù. Wò wɔ̀ ènu nyuɛ̃ na mù, vɔ̀a, ènyè ya, èvuɛ̃ ye mù sɔ le ɖo e tèpe na wò. 19Egbèa, wò ɖè àpo àdɔ̀mè nyuɛ̃ ɖo ŋuti nyè fiɔ mù. Ɖoa, Tɔhonɔ̀ ye sɔ mù do àsi na wò, vɔ̀a, èwò ya, wò mu wù mù ò. 20Ne àmè ɖe klɛ̃ yebe kɛ̃tɔ lè àvò mèa ɖe, e ɖènà àsi lè ye ŋuti, be jona kpooa? Tɔhonɔ̀ ne ɖo ènu kè wò wɔ̀ na mù egbèa tèpe na wò. 21Fifìa, mù nya be wò la ɖùfìɔ, eye Izràɛl be èfìɔɖùɖua la likè lè àsi wò mè. 22Fifìa, tà Tɔhonɔ̀ na mù be wò mu la crɔ̃ jìjimèvi nyèwo, eye wò mu la gũ nyikɔ nyè lè ètɔ nyè be àxomè, wàlɛbɛ kè nyè mu la gbà nɔ̀ ànyi òa. 23David tà ɛ̀ na Saolò. Ekèa yomè a, Saolò trɔ yì àxue, eye David ku yebe àmèawo gbìgbɔ̀ lia ètoa, yì woabe bèbèpea.

Currently Selected:

1Samuɛl 24: GEN

Highlight

Copy

Compare