1Samuɛl 23

David yì Keilà ku Horesà

1Gbè ɖèkaa, àmè ɖe va gblɔ̃ na David be: “Kpɔɖa, Filistìtɔwo va ɖè àhùa kpe na Keilà be èdùa, eye wo le hlà àgblèmè nuku kè wo yà ɖɛawo.” 2David biɔ Tɔhonɔ̀ be: “Ma yì kpe àhùa ku Filistìtɔ kèawoa?” Tɔhonɔ̀ ɖo e ŋuti na David be: “Yì kpe àhùa ku wo. Wò la ɖù woa ji, eye wò la hlùɛ̃ Keilà gã lè woa si. 3David be ŋutimewo gblɔ̃ na ɛ̀ be: “Kpɔɖa, mi le vɔ̃, lè Yudà-nyigbã ji lè fikèa vɔ̀. Leke be la nyi ɖo, ne mi yì Keilà, yì wɔ̀ àhùa ku Filistìtɔwo ò?” 4David gbà biɔ Tɔhonɔ̀ ke. Tɔhonɔ̀ ɖo e ŋuti na ɛ̀ be: “Sitè, ne wòa jè èmɔ yì Keilà! Mù la sɔ Filistìtɔwo do àsi na wò.” 5David ku yebe ŋutimewo yì Keilà, eye wo kpe àhùa ku Filistìtɔwo. Wo ɖù Filistìtɔwo ji, eye wo kplɔ̀ woabe èlãwo jo. Wo wù Filistìtɔ sùgbɔ. Lekea ye David hlùɛ̃ Keilàtɔwo gã so Filistìtɔwo si mè.

6Kè Ahimèlɛk be èvi Abiatàr si va David gbɔ lè Keilàa, e sɔ dàbla kɔ̀kɔ̀ɛa ɖo àsi.

7Ekè Saolò sè be David ɖo Keilà be èdùa mèa, e gblɔ̃ be: “Mawu sɔ David do àsi na mù, ɖoa, ye ŋutɔ do ye ɖokoe ègàmɔ mè, ekè be ɖo èdù kè be àgbo tuna ku lɔkèa mè.” 8Saolò na be àhùakɔ̃ bliboa bɔ̀, ne woa yì pòxla do Keilà be èdùa, ne woa bɔ̀ do David ku yebe àmèawo. 9Ekè David kpɔ be è yè ŋuti ye Saolò le ɖo èvuɛ̃ ɖoa, David gblɔ̃ na hũbonɔ Abiatàr be: “Sɔ dàbla kɔ̀kɔ̀ɛa va.” 10Eye David gblɔ̃ na Mawu be: “Tɔhonɔ̀, Izràɛl be Mawu, sumɔ̃vi wò sè be Saolò jro be yèa va Keilà, la va gbã èdùa ɖo ŋuti nyè. 11Keilà be èdù mè-mègãwo la sɔ mù do àsi na Saolò, ne e va trɔ do èdùa, sìgbè lekè mù sè èa nènea? Tɔhonɔ̀, Izràɛl be Mawu, tɔ wò jɔ̀, ɖo e ŋuti na sumɔ̃vi wòa!” Tɔhonɔ̀ ɖo e ŋuti be: “Saolò la va!” 12David gbà biɔ be: “Keilà be èdù mè-mègãwo la sɔ nyè ku àmè nyèwo do àsi na Saolòa?” Tɔhonɔ̀ ɖo e ŋuti be: “Ɛ̃ɛ, wo la sɔ mì do àsi na Saolò.” 13Ekèa yomè a, David kplɔ̀ yebe àmè kèwo la sù àgbètɔ àlɔ̀ àdɛ̃awo (600) jè èmɔ, jo lè Keilà, tùtà àfi bu. Kè Saolò sè be David si jo lè èdùa mèa, e ɖè àsi lè àhùa kè be ɖo be yèa wɔ̀ lè Keilàa ŋuti.

14David nɔ̀ Zif be zògbèa be àkpãwo mè, lè ètoawo ji. Wàlɛbɛ ŋua keŋuã, Saolò le ji ì pòxla, vɔ̀a Tɔhonɔ̀ mu sɔ ɛ̀ do àsi na Saolò ò. 15Ekè David kpɔ be Saolò jè ègbe, le ji la wù yèa, e nɔ̀ Zif be zògbèa ji, lè Horesà.

16Gbè ɖèkaa, Yonatàn, Saolò be èvia yì David gbɔ lè Horesà. Yonatàn sɔ Mawu be jìdo sɔ do ŋusɛ̃ David. 17Yonatàn gblɔ̃ na David be: “Mù gbà vɔ̃ ò. Ètɔ nyè Saolò mu la teŋu tɔ àsi wò ò. Èwò ye la ɖùfìɔ lè Izràɛl be ànyigbã ji, eye ènyè yaa, mù la nyi cãmì kè la kplɔ̀ wò do a. Ètɔ nyè Saolò ŋutɔ cã nya ekèa.” 18Wo àmè èvèawo ɖù èzò lè Tɔhonɔ̀ be ŋùkɔ̀. David ci Horesà, eye Yonatàn trɔ gbɔ̀ va àxue.

Saolò le nyà David ɖo nu

19Àmèwo so Zif yì Gibea, lè Saolò gbɔ. Wo gblɔ̃ na ɛ̀ be: “Wò nya be David bè ɖo mia gbɔ, lè èto-nyigbãwo ji, lè Horesà, lè Hakilà be ètokɔ̃ɛ̃a tamè, lè ègbe-nyigbã gbàjà kè wo mu dè òa be àpùgoa? 20Ye ŋutia, èfìɔ bùbùtɔ, ne wò be yèa le è, lè àvò mèa, gbe va kpò. Mia ŋutɔwo, mi la do è àsi na wò. 21Saolò ɖo e ŋuti na wo be “Tɔhonɔ̀ ne tu sì na mì, àmè kèwo ku ŋuzĩzĩ na mùawo!” 22Fifìa, mì gbìgbɔ̀ yì kù e mè kpɔ kito-kito, mì jè àgbàgba, ne mìa nya àfi kè tututu be lèa, mìa nya yebe àfɔ̀topewo. Mìa nya ne àmè ɖe kpɔ ɛ̀ lè funua. Wo gblɔ̃ na mù be e jènà àyè ŋutɔ. 23Mì jè àgbàgba, ne mìa ji wawlape kèwo kpata be teŋu wla ɖoa. Ne mì kã ɖo woa jia, mìa trɔ va kpɔ mù. Mù la yì ku mì, eye, ne e lè mìa be ànyigbã jia, mù la kãkã Yudà be ànyigbãa keŋu ji, la sɔ ji ì, la kpɔ ɛ̀.”

24Àmèawo jè ŋùkɔ̀ na Saolò, trɔ yì Zif. Wàlɛbɛ ŋua, David ku yebe àmèawo ya lè Maɔ̀n be zògbè-nyigbã gbàjà kè lè àgblè-nyigbã kè wo mu dè òa ji, lè àpùgo. 25Saolò ku yebe àmèwo le sã, le ji David pòxla. Ekè David sè èa, e ɖì va àkpãwo dòmè, lè Maɔ̀n be zògbè ji. Ekè wo gblɔ̃ ɛ̀ na Saolòa, e jè David yomè, va Maɔ̀n be zògbèa ji. 26Saolò ku yebe àmèawo le zɔ̃ to ètoa be àkpa ɖèka, wàlɛbɛ kè David cã le zɔ̃ to ètoa be àkpa èvègɔ̃a. David le ɖèbla, àleke be Saolò mu gbà le è ò, ɖoa, Saolò ku yebe àmèawo le jè àgbàgba, la trɔ do wo, la bɔ̀ do wo, la le wo kloe. 27Wàlɛbɛ ŋua ye àŋɛ̀do va na Saolò be: “Va kaba, ɖoa, Filistìtɔwo ɖè àhùa kpe na èdùaa!” 28Saolò trɔ lè David yomè, zè ɖèka, eye be va jè ŋùkɔ̀ Filistìtɔwo. Ekèa ŋuti ye wo ɖo nyikɔ na tèpe kèa be “kãklã be àkpã” ɖo.

Currently Selected:

1Samuɛl 23: GEN

Highlight

Copy

Compare